Zeiruangah dah mi kan bomh? Mai Esther Dimte (HLD)

Nifatin kan nunnak ah kan pawngkam kan zoh tikah kan mah hnak in a rum deuh mi an um bantuk in kan mah hnak in a sifak deuh mi zong an um ve. Caan khat lio ah mi nih bomh a herh mi kan rak si kho men na in nihin ni ahcun kan mah lila kha mi bawm tu kan si kho tthiamtthiam ko. Cucu kan duh zong ah duh lo zong ah kan hmuh mi le kan ton mi a si. Mi cheu khat nih cuh an mah harsatnak an ton lio ah mi nih an rak bomh hna ca-ah harsatnak a tong tu hna kha an va bomh ve nak thawng in leiba cham tthan an duh ruangah mi an bomh. Mi cheu nih cun mibomh cu Pathian rianttuan pei a si cu ti in an mah nih Pathian bia an chim kho lo ruangah an ngeihchiah tu in mi an va bomh. Mi cheu nih cun hminthan duh ah le laar duh ah mi an bomh ve. Mi cheu nih cun mi hnak in tam deuh pe tu si an duh ruangah an ngeih chin lo pi in mi an bomh ih an mah cu harsa in an um tawn. Pakhat le pakhat mi kan va bomhnak a ruang hi an i khat cio lai lo. Atu ah a thliten biahalnak tuah uh si law "zeiruangah dah mi na bomh?" tin ho hmanh theih lo ding in i hal cio uh si law kan lungthin chung i a um taktak mi bia a chuak kho ttheu lai riah ruahchannak ka ngei. Cu ka ruahchannak cu mi kan bomh nak a ruang cu bomh an herh bak tiah kan ruah ruangah le an mah bawm kho tu dirhmun ah kan um ruangah kan bomh hna timi a si cio ttheu lai ka ti.

Mibomh a ttha ti cu a ho paoh nih theih mi le mitampi nih tuah an duh mi a si ko. Sihmanhsehlaw kan ngeihchiah nih a tlinh tawk lawng in kan bomh hi fim bia a si lai tiah ka ruah. Culawng hmanh si lo in kan bomh mi hna hi bomh herh taktak mi an si maw? Sumsaw hen kan bomh hna lio ah anmah ten an nihlawh an rak pe ve maw? Kan bomh hna lo sual a si ahcun zeidah planning dang an ngeih. Pakhat ngah hlah sehlaw a dang hitin kan tuah lai timi planning an ngeih cia lawngah bomh tlak mi an si lai. Ramtthangcho hna tampi nih an i palh tawn mi cu ramdang sifak ram ah bomh nak an pek hna tikah an khua/ram chungah a herh bak mi le bomhnak a dih tikah khua/ram mi hna nih an mah ten an pehzulh kho ding mi an tuak piak lo ca-ah paisa tampi cu thlilak ih voih thawh bang in an hloh dih tawn. Ramdang mi sin in bomhnak a lut tamtuk nak sifak ram pawl ih an nuntu khuasaknak a tthangcho hlei lo lengah an tha lam a thu dih. A lak ih hmuh mi cu a lak in a dih tthan lai timi ah an tla lengmang ko. An thlanhri put in an hmuh mi phaisa a si lo tikah fawi tuk in an ngah ih fawi tuk in an hman ve. Cutikah an sifaknak dirhmun in an kai kho bal lo. Ramdang mi nih zeitluk in an zuan hnawh zongah an mah kel te an si peng rih ko. Sihmanhsehlaw nihin ni ah Laimi mi bawmbu tampi hna ih kan rianttuan ning zoh tikah lung a hmui ngaingai. Kan lung ai rualnak zong a lang ih Chin ah pumkhat kan si nak zong a lang chin thluahmah cang.

Atutan kan Laimi chungah harsatnak a tong mi tampi hna i an dirhmun zoh tikah ngeih a chia tuk ih ruah zong an tam hringhran. An mah pawl bawm ding in Laimi lawng si lo in kawlmi le ram dang mi tampi nih paisa hen, nihlawh hen, ruahnak hen tin an rak ttan pi cio ih a ran nak kho chung in zuanhnawh cio an si. Hitikah bawmtu cah siseh, bomh mi cah siseh an karlak ah pehtlainak kha dawtnak a si awk a si. Cui dawtnak nih a zulh ding mi cu an herh mi tirawl le beunak inn pek kha a si. Nihin ah ting 100 kan ngeih ruangah a dih lak in kan pek dih hna ding a si lo. Zeiruangah kan ti a si ahcun puicim zatlaknak a tong mi hna hi inn lawng si lo in an lo rawl facang hmun tamtuk a rawk tikah hmaikum chung cu rawl ei ding an harsa hrimhrim lai ti cu theih cia mi a si. Cu ca-ah bomhnak kan pek hna tikah a hmaisabik ah a biapibik cu hngakchia si hna sehlaw a pahnih nak ah a biapi mi cu tar nu tar pa si hna seh. Cuhnu ah nutling patling si hna seh. Cuhnu ah inn le lo si hna seh. Thil le ri cu a rawk kho mi an si. Sihmanhsehla minung nunnak cu ser tthan awk a ttha mi a si lo. Upa cu anmah ten ti an i leuh kho ih luatnak an kawl kho nan hngakchia cu an dir nak hmun ah tilian zong nih panh hna sehlaw a tli kho ding an si lo. Tar nu tar pa zong cu tthiamtthiam. A dang zeitindah kan bomh rih hna lai tiah cun tilian le ruahlian nih a chuahpit mi tichia le nawncek ruangah zawtnak tampi a chuak lai. Cui zawtnak in an nunnak a liam nak hnga lo a tu in ngandamnak lam ttha ten zoh piak le si ei awk pek an hau. Inn le lo a rawk mi an tam ngai ko nan a tu ah inn lianpi sak nak caan a si rih lo. Atu cu ti nih a silh dih ruangah sinfen aih ding a ngei lo mi hna sinfen kan pek hna awk caan a si. Run tu le bawm tu a ngei lo mi hngakchia le tar pawl bomh caan le runh caan a si. Atu caan cu ramkhel kong ah kan buai lengmang caan a si lo. Atu caan cu mi kan rel caan le kan soi caan a si lo. A ttap mi hna kan ttah pi caan a si. Ti a hal mi le rawl a ttam mi hna din ei ding kan pek hna caan a si.

Komen thlichia le ruahpi ruangah zatlak puicimh a tong mi hna ca-ah a hmun ih a um mi na si ahcun na nihlawh hlawh khat tel va chuah ve. Lam hla ah a um mi na si ahcun na rianttuannak ih na hmuh mi nikhat man tel cu thawh ve. Nangmah na kal kho lo hmanh ah na paisa cu a kal kho ko. Na fangdip cu a kal kho ko. Atu caan ah na tuah kho mi na theih ko bu in tuah lo in na um sual a si ahcun tuhnu kum 30 ah na fale, na tu le nih Komen kong an in hal te tikah chim ding na ngei sual lai lo. Cutikah na chir te nak hnga lo atu ah na paisabawm von kau law von chuah ve cang ko. Petu le pekmi cu an lunglomh nak ai khat zungzal. Na pek siang zat in Pathian nih thluachuah a let in an pek ve tthan lai. Dawtnak lungthin le zawnruahnak hen bomhnak a pe tu miphun hawidawt vialte nan paisa le nan thilri cu Bawipa nih rimhmui khanghthawinak a cohlan bantuk in in cohlan piak hna sehlaw harsatnak a tong tu hna ca-ah tthahnem santlai bomhnak lianpi si hram ko seh tin thlazaa cam bu in.....