T’ongkam parah t’uanvo lak a thupi – Mai Esther Dimte (HLD)

            Nitin kan nunnak ah mah ttong mi vek ih ttuanvo lak ngaingai tu le mi hnangamnak hrang men ah ttong hluahhlo tahrat ih ttong mi par khal ah ttuanvo lak lo tu tin phun hnih in kan um. Himi phunhnih sungah ziangvek so na si? Zokhal in kan mah ih kan ttong vek cekci in ttuanvo lak ngam tu le a lak ringring tu kan si kan ti thluh cio ko ding. A ngaingai ten a thei tu cu kan mah le kan ttong a rak thei tu lawng an si. Tahtthimnak ah ka nau hniang bik nu te kumthum a si lai ihsin USA ah ka feh ih a tu cu kum 10 a kim zo. A liam cia kumhnih ah a nih kumriat a si ih cunah kum ih Krismas zikah ah phone kan biak awk. A nih cun “uu, ka lo ngai tuk thlang, ziangtikah na ra tlung ding?” in ti. Keinih cun thuhla saupi ruat lo in le a hlan ih ka ttong cia mi khal ruat cuca lo in “kei khal ka lo ngai zet ve thlang, hmaikum len ka rak tlung ding” tin ka sawn. Cutikah ka nau duhnung te ih in let dan te cun ka thinlung i tham zet ih thu i ruat ter nasa. Ziangtin in let tilen “uu, cutin na ti nak hi kumtinten ka rak siar ringring ih kumnga a kim thlang nan a tu tiang le na rak tlung dah fawn lo” in ti.

            Caantampi ahcun fimzirnak hi tlawnginn lawngah kan ruat ttheu. Kan hnak ih cathiam le mifim hnen lawngah theihkaunak le thuruat theinak kan zir ngah ding tin kan ruat ttheu. Sampar mi le kum upa tar pawl hnen lawngah ruahnak tthattha kan ngah thei ding ih thu kan ron thei ding tin kan ruat cio men ding. Sihmanhsehla a ngaingai ten ti ahcun kan hnak ih kum kul lenglo a nauhak mi kan nau le khal nih kan ruat ban dah lo mi thuhla in ruat ter ih kan lung in fim ter thei a si. Ka naunu kumriat nu te hnen in ziangsi ka zir ngah ti silen dunghmai ruat lo in a tu rori ih mi pakhat a lungawi ding mi a si taak ah tin ol zet ih ka ttong mi ttongfang pakhat te ruangah ruahsannak tampi thawn in sut tu ka naunu te thinlungah nasazet in hna a ttuan thei timi hi a si. Cu mi in a suahpi mi cu neta ka tlung ngaingai thlang ding ka ti tikah in zum nawn lo men thei. Ka ttongkam pakhat hrangah ttuanvo lak ngam tu a si lo tin in hmu thei. Silolen mah ttong mi vek ih tuah dah lo tu tin tla in hmu thei. In hmuh thei dan a phun kan sim ahcun pahra lenglo a um thei ko ding. Sihmanhsehla cui pahra pawl hnak in a thupi sawn mi cu kan ttongkam khat te ruangah mi thinlung ah ziangtluk in hmun kan lak ih an ruahsannak le an khuaruahnak kan thleng ter thei timi ruat phah ringring in ralring ten thu kan sim a ttul a si.

            Veitampi cu mi parah sualnak kan tuah tikah ngaidam kan dil ah simaw, kanmah lila ngaidam in rak dil ah simaw kan thinlung takten kan ngaidam lo a si khal len ttongkam mawi nak ah ngaidam awk cia kan si nak kan sim awk ttheu. Mi nih kan thin in heng ter caan ah, thuphan in sim caan ah, an thukam an pelh caan ah, an thu an thleng rero ruangah, in relsiat mi kan thei sal tikah, kan tuah lo mi thil tuah in puh tikah…tvp… in a phunphun ruangah kan tum lo mi le kan mai dinhmun thawn a kaih awk lo mi ttong mawi lo zet ttong kan hmang ttheu. Ziangruangah hitin kan hmang ti a si len kan cal zawn ih a um mi kan hmailam thluak sung ih thisen a cak tuk ih kan bop lam ah a kuat manh lo ruangah thaisun hrang ruat ciamciam ta lo in tuisun hrang kan diriamnak hrangah kan ttong mi a si. Ziangvek dinhmun ah kan din khal len, ziangvek hna kan ttuan khal len, zovek minung thawn kan biak awk khal len, ziangtluk mi lian kan si khal len, ziangtluk mifim kan si khal len dunghmai zoh lo in kan ttong a si ahcun cui kan ttongkam ruangah mi nih in upat ding zat upat kan si lo ding ih mi nih in rinsan ding zat khal in rinsantlak kan si lo ding. Culawnghmanh si lo in neta ah mi in thurontlak khal ah in ruat lo ding ih kan ttongkam hmuahhmuah cu thuk zet le kau zet in in ngeihsak lo ding a si. Cuvek dinhmun kan thleng lo nak dingah cun kan thinheng lai caan ah le kan lungawi tuk lai caan ah kan ttongkam a hleice in kan ralring a ttul a si. Culen, kan tuah thei lo ding mi le kan tuah ngai lo ding ti kan thei mi parah ol-sam zet in mi an lungawinak a si ahcun a tawk tin ttong lo ding a si. 

Mikhual nih a theih ding mi pahra - Mai Esther Dimte (HLD)

Leilungtlun um mi minung hmuahhmuah hi mikhual kan si. Mi hrek khat cu ramdang ah mikhual kan si. Mi hrek khat cu kan ram sung lila ah mikhual kan si. Khoi nah ram, khoi nah peng, khoi nah khua ih mikhual kan si hmanh ah hi a tanglam pawl hi kan theihhngilh lo dingah an thupi nasa. Innteek te nih kanmah ruangah neta ah mikhual an nei duh nawn lo pang a si ahcun a poi zet ding. Curuangah, zo vek innteek khal in kanmah vek mikhual an nei duh ringring nak dingah le mikhual nei ih a sunglawi zia, a nuam zia le a tthat zia pawl an tep ngah thei nak dingahcun nangmah le keimah zovek mikhual kan si timi parah a tthumh awk a si. Mikhual a si mi hmuahmuah in an thei ding a thupi mi tampi sung ih sin pahra pawl cu a tanglam vek in an si.

       1.      A rat nak hmun ah a tlung sal tengteng ding. A thlen tikah innteek te hnen ah thuhla a     simthanh sal tengteng ding. 

       2.      Innteek te ih thilri pawl amah thu in a tlun pi lo ding

       3.      Innteek te an tho thluh hnu pi tiang a it ringring lai tu a si lo ding

       4.      Innteek te rawl an ei hlan ah amah ten rawl a rak ei lo ding

       5.      Innteek te an it thluh hnu ah hnaset ruri lo ding

       6.      Innteek te ih thilri a hmang ttul tikah a sut ta ringring ding. Siannak a lak ta ding

       7.      Nithum hnak ih tam um tu mikhual cun innteek te hrangah a mawitawk laksawng si maw, bazaar kainak simaw a bawm ve ding. Sumpai lam si lo hmanh ah a dangdang khal bawm thei tawk in bawm tu a si ding

       8.      Innteek te nih anmah um lo caan khal ah inn ah an taan ding khop in rinh-um zet mi a si ding. Innteek te nauhak nei an si len an fa le pawl thawn rualrem le nuam aw zet in a um thei tu a si ding

       9.      Innteek te zu in mi an si lo ahcun an inn ah zu in ve lo ding. Zuri hnu khal ah inn tlung lo ding. Zuri ahcun hotel ah si lo len zu in nak hmun ah riak men ding

      10.  Innteek te nih an lo hmuak/thlah ding an hnattuan a si lo ih nangmah nih na fial/dil hai ruangah an tuah ding mi a si sawn. Curuangah, innteek te an manh maw manh lo ti sut ta lo in duhduh in tirh fial lo in a ttul ngaingai nak lawngah upat hmaizahnak thawn fial ding a si.