Nu’i Dirhmun

Telefa neih hnu ahcun tlongtlai lio bantuk in ii manh kho asi nawn lo. Tomen a ngah nawn lo. Biasongtlorh lengmang men a ngah nawn lo. 

Ih hmuh a khop kho nawn lo. Zaan ah fale an ih zawng ah it ve colh lo in phone kan zoh ta ahcun ih manh lo pang a ol ngaite. Sun an ih ah le tiburh rawlzalh le innsungtang ttulherh tuah asi fawn tikah duhhmasisawk ii khuasak cu a ngah lo lawlaw si ko. 

Duh tik poh ah rawl ei a ngah nawn lo. Fale an ngam lio te ah ei a hau. Fale an pawkhawh ka te ah ei thiam a hau. Fale an ii hngilh sung tibantuk ah ei a hau. 

Duhduh in tlan a ngah nawn lo. Thupi hlapa a um tidah lo ahcun duhtawk in phone sonh a ngah nawn lo. Thlahlawh um lo mi rian tibantuk khalah caan pek kho asi nawn lo. Mi inn ah va len lengmang manh khal asi nawn lo. Mileng khal saupi neih kho asi nawn lo. 

Kanmai huammi le duhmi vialte re ta dih in kan fale ih an duhnak kan zul an hau ii an ttul mi tuahsak an hau. An hngaksiat lio an kan ttul bik lio caan ah kan hnen in an ttul mi an ngah lo ahcun an upat tikah an thinlung kan neh kho hni nawn lo lai. An ttulherh mi a pesan kho tu, an lungawi ter tu, an duhnak zul kho tu midang, thildang, hmundang ah an kaltak te lai. Cupawl cu; zu le sa, rithai si, lengfa/tlangval, zukhmawm, tibantuk an si te kho men. Thil zeipoh hi innsungkhar in ai thok dih timi thei bu in innsungkhar ih a thupit zia a muril hi hngilh hrimhrim hlah uhsi!

Cuiruangah nau no nei kan hawi le pawl hi an dam le dam lo text message in simaw, phone tawi te sonh nak in si maw suthlam ttheu uhsi! An taksa dam nan an thinlung dam lo tla si kho men. Sautuk in phone sonh, leen, rianfial lengmang tibantuk belte khi fimkhur ten um kho ii zuam uhsi! 

Lethnubik ah: a leng ah rianttuan lo in, lo ah kal lo in, dum ah kal lo in inn ah nau a um mi nupinu pawl khi rian a ttuan/nei lo ti nawn hlah uhsi! Inn ah rian a ttuan tin kan hmuh dan le kan kawh dan thleng cang uhsi! Nau kilkhawi le innsungtang rian vialte hi hnen um la sehla rian pa hnih asi timi hi ruatsak thiam cang uhsi! Inn ah rian a ttuan tu nih rian hnih a cem tinak asi cu. Nikhat ah nazi 24 a um ih an ii hngilh caan te lawng khi an ii hngat caan cu asi. 

Nu le pawl hi dawt lo awk ttha an si hrimhrim lo! 

Happy Mother’s Day Nunu - Mai Esther Dimte (HLD)

Ka duhdawt zet mi Nunu,

NU ttha dang tampi an um ko nan na fale kan hrangahcun NU ttha bik na si.

Ka pa hrangah nupi ttha le rinum zet mi na si.

Kan sentet lai ihsin tuisun ni tiang innsungsaang hrangah a sur a han tilo in hna na ttuan. Mi law zet na si. Mi teima zet na si. Mi fel zet na si.

Khuavaang hlan ah tho in Biakinn ah thla na va cam ttheu. Kan Bawipa Jesuh Khrih misual pawl hrang a thih ni Friday tinten biakinn ah rawl ul in thla na cam ttheu. Kan na caan ah na thlacamnak aw cu kan thinlung thazaang hrangah si ttha bik asi. Thlacam nun nei zet mi NU kan lo nei cu a sunglawi tuk asi.

Midang hrangahcun mi siava zet, mi sual zet, le duhkop lo zet tla na si men ko ding nan cucu a thupi mi asi lo. Leilungtlun dan asiko. Minung duhnak cu khuasia le khuavaang hmanh in a kim ter thei lo pi.

A lo hmuhsuam tu le na riah lo siat ter tu pawl cu Pathian in a lo letrul sak ringring ttheu. Curuangah na riahsia ter ding cu ziang dang hnak in ka ttih sawn asi. Na duhlo zawng ih ka ttong pang mi le ka tuah pang mi a um silen Bawikhrih hmin in ngaidam ka lo dil. Duhdawtnak thawn in ngaithiam hram aw maw.

Na fale kan hrangahcun kan nu lawng na si lo ih kan pa khal na si. Nunau hnattuan le mipa hnattuan thleidang lo in na ttuan thei thluh mi hi upat lo awk na ttha lo. Zohtthimtlak nu rori na si.

“NU” timi ttongfang ka thei tinten ka mitthlam ah na rinum zia, na raltthat zia, thlacam nun na nei zia, na teimaak zia, na law zia, le Pathian na rinsan zia pawl an ra cuang asi.

Nangmah vek NU kan nei cu thluasuah tumbik kan dong mi asi. Kan lungawi tuk! Kan lo duhdawt tuk! Pathian in damcahnak le sansaunak thluasuah lo pek hram ko seh!

NU pawl sunlawih ni ah ka lo duhdawtnak cu leilungtlun mi hmuahhmuah thei ding in ka phuang asi. Cucu na hrangah ka laksawng asi. Ka lungawi!

Happy Mother’s Day Nunu!