Hlawtnak (or) Cohlan lonak (Mark 6:1-13)

            Minung kan si bantukin kan thil ti kho nak le hawi hlei i kan thiam deuh nak hmun ah tangdorten um kho hi a har ngaingai.  Culawng hmanh si lo in mi nih kan cungah thatlonak an tuah tikah ngeihthiam nun neih kho hi thil ol ai asi hrimhrim lo.  Aliamcia AD kum 2,000 lenglo hrawng i Jesuh a mipum in vuleicung a rak tlanlen lio ah khan ngeihthiam nun nei in le zawnruahnak lungthin thawn kan raal kan dawt kho nak lai, vancung pennak kong vuleicung miphun zakip nih an theih theh kho nak lai, sersiamtu pathian nih a huham le a thiltikhonak cu mi vialte nih kan pom kho nak dingah kumthum sung an kan zirh. Cuihlei ah pathian nih a pek mi huham thawngin thil maksak phun zakim rak tuah in pathian sunlawinak a rak langh ter.  Asinan, a minung hawipi le a khuapi, a sungkhat unau pawl nih cun pathian nih "khuaruahhar thil ti kho nak huham" a pek mi cu lungawipi awk hna an rak thiam lo.  Ni sawmli sung rawl ul in thla a cam hnu, dungzultu hleihnih hril in pathian thusim ah khuakip le ramkip i a vaak hnu ah a suahsemnak khua ah kir tahrat in Sabbath ni ah Judah pawl an i pumhkhawmnak Sinakok ah cun vancungpennak thu asim i a khuapi pawl nih cun hipa hi Joseph i fapa kha asi lo maw? tiah Jesu’i fimthiamnak le theihhngalhnak vialte cu mangbang phah bu in nehsawhnak le zeirel lo nak thawn an rak caihphai. Mitampi cu an thin a rak phang ziar men lai i zeitikah seh tlaih le khih kan ton lai ti lawng te ruat in thinham tlai lo in an rak um men ko lai.  Jesuh hi kan rawlbel an kan khuaisak tu asi ko lai, meilam an kan thlah sak tu asi ko lai tin a phunphun in a khuapi hawi nih cun an rak rel lengmang men ko lai.  An ti bet hrih ding mi cu “na rat nak hmun kha hngilh hlah! Lettama pa’i fapa na si kha hngilh hlah” tin a pathian riantuannak ah an rak hnaihnawh lengmang men ko lai.  Asinan, Jesuh nih an duh lo mi pathian thu cu a hranhram in a sim hni lo ii a kal tak hni lehlam.  Amai suahsemnak khua nih zei ah an rak rel lo ruangah khuadang ramdang ah pathian thu sim phah in mifak a dam ter, mitcaw khua a hmuh ter, hnaset a dam ter, mizeng a dam ter i kebai a dam ter.  Culawng hmanh si hrih lo in khuasia khuavang nih an molh mi a dam ter hni ii mithi khal a thawh ter hni.  Hi thil vial te ati kho tu Jesu khrih pathian fapa a suahsempi khuapi nih an cohlan lo ruangah hi thlasuahnak vial te an dong lo.  Jesuh a khuapi pawl nih an cohlan lo lio ah mawh a phurh hni lo i an sualnak a ngeihthiam hni.

Zumtu unau, nang le kei teh mi cah thiltha kan tuah, khuapi vantlang cah kan i zuam in kan tikcucaan kan pe kan ti lio ah mi kut uisu pek men kan tong pang maw?  Kan minung hawi dang pawl i thangthat le sunloih kan ton lio ah kan mai khuami i volhpamh le zeirel lo nak kan tong pang maw?  Mihring le theihhngalh lo mi nih an kan daw in an kan khiahram lengmang ko nan kan mai khua mi nih an dung an kan tulh men pang maw?  Ramthlo mi kan si hi an kan zahpi pang maw?  Kan mah tawk ten, kan ti kho tawk ten le kan thiam zawng ten tei mak kan thlak lengmang lio ah mehtok khih tu men lawng kan tong lengmang pang maw?  Unau, hi thil vialte hi kan mah lawng si lo, an kan rundamtu Jesuh khrih khal nih a rak ton mi lawng te an si dih i a dungzultu le tuan lio pathian riantuantu tampi khal nih an rak ton cio mi an si dih.  Kan khua kan ram cah pathian mihman pawl zei kan rel lo le thazangpek hna kan thiam lo ah cun thlasuah sungtu cu kan mah fawh kan si ko lai cu.  Cuiruangah, pakhat le pakhat kan thiam lo nak zawnte ah ii ruat tonh uhsila cutin kan khua le kan ram cah rinsantlak Nusal tha Pacang tha si i zuam cio hram uh si!  Cucu, pathian duhzawng khal asi i au paoh nih kan duh mi khal asi ve.
Jesuh nih a dungzultu pawl a zirh hni mi cu “va kal uh la ka thuthangtha va sim uh! Khuasung mi nih an in mikhual hni silen cui inn ah cun khuadang nan kal hlan lo tiang i thum uh, cun tlun inn an in onh duh hni lo silen nan kedan nih a pal mi leivut kha hei thing ta uh” ati hni. Hinih hin tampi an kan zirh. Soiseltu pawl i relsiatnak, hawi le komh pawl i nahneihnak, mi hngal pawl i en tei nak le zeirellonak vialte cu kan bawipa jesuh khrih i bomhnak thawng in kan kedan tang ai kop mi hawmhne kan thin bang in thing uhsila lam thar zawh in pathian ram le a minung cah kan ti kho nak zawnten i zuam ko uh si! Thlasuah pe tu cu minung an si lo i pathian hoi asi ti thei buten kan lam har hmanh seh nikhat ni ah lomh man laksawng kan co te ko lai.

Casiartu nan zate cungah pathian thlasuahnak atu le kumkhua in um caancin hram ko seh!