Nupi Pasal kan hawl tikah - Mai Esther Dimte (HLD)

            Dawtnak kan ti lengmang mi hi fak deuh ih kan ruat ahcun a thuk tuk i minung ih awkam men ih sim thiam le rel thiam ding mi hmanh khi asi lo. Cui dawtnak ruangahcun ai thei dah lo mi kan i thei, ai komh dah lo mi kan i komh, ai hmu dah lo mi kan i hmu ih hmunkhat ah um khat kho nak ding kan ngeihtuah. Kum 17 hrawng kan hong kim in cun lengfa pawl nih tlangval pawl thawn an mit ai ton caan ah um dan an thiam lo. Cubantuk in tlangval pawl khal um dan an thiam ve lo. Cutin i hmuh duh sinsin nak lungthin sung ah a suak ih i ton kho sal nak le i hmuh kho nak ding lam hawl asi cang. Zumtu kan si bantuk in kan nih cu vuleicung minung pawl karh ter ding ah Pathian nih an kan duhsak tin kan hngaksiat lio ten rak zirh mi le a rak i nunpi mi kan si. Cutin asilen kan mah ten le tuah awk a tha fawn lo zeitinseh innsungkhar dinh dingah kan hawl lai? Kan zoh ding mi thil tampi sung in a thupibik tiah ka ruah mi pahra in ka rak ngan lai.

1.      Zumtu mi piangthar asi lai

2.      Keimah le ka innsungkhar a daw tu asi lai

3.      Ka sining ten a ka cohlang kho tu asi lai

4.      Fimthiamnak a mawitawk a nei mi asi lai

5.      Mi hmai ah thusim kho tu asi lai

6.      Mi sifak mi rethei bawm duh tu le khuaram le miphun dawtu asi lai

7.      Mai aw lawng si lo in aw dang khal a mawitawk a thiam tu asi lai

8.      Casiar huam tu le cangan huam tu asi lai

9.      Zaangduh mi le riantuan cak mi asi lai

10.  Angandam mi asi lai

Hipawl a zaten a tlinh theh kho ngaingai tu cu an um theng lo lai. Sihmanhsehla hi vial sung in a seu tluk tel a tlinh lo ahcun zeitihmanh in innsungkhar a dinh kho tu asinak ngeih a um lo. Cuiruangah mipa cah lawng si lo in minu cah khal ah kan si ning, kan nun ning le kan nitin khuasak tintuk dan ah ralring ten le fimkhur ten kan um ih mi nih kan theih lo kar te ah a thup ten an kan ngiat ringring timi kan hnakthuar ah kan tenh ringring a hau.

Lengfa tlangval kan si lio ah innsungkhar kan dinh tikah cubantuk tuah sehla, kha bantuk tuah sehla, tangka cu tin hlawh sehla, tangka cu tin karh ter sehla, tangka cu tin hmang sehla tibantuk le fate zeitikah nei sehla, fate paziat nei sehla tibantuk saduhthahnak tha ten i simhruah cia theh ding hi a thupi tuk mi asi. Hitin thuhla fiang ten khat lam khat lam kan duh nak veve kan i simh hnu ah kan lung a tling lo mi kan i sim lai, kan duh nak ai bang lo mi ah kan i sim sawn lai, remh tul mi kan remh lai ii bet tul mi kan bet lai. Culawnglawngah innsungkhar kan dinh ngaingai tikah ol ai ten zohthimhtlak innsungkhar mawi kan si kho lai. Hibantuk ruahnak suah khat le ruahnak i seuh a duh lo mi pa/nu cu pasal/nupi ding ngaingai ah an i tlak lo tinak asi. Thil zeipoh ah a hlan khan ten khua a khaang kho tu le hlawntlinnak hmuh ah siseh, sunralnak ton tikah siseh ralring ten timtuahnak a nei cia tu lawnglawng an tlu lan lo ih an cak sin lengmang ti hi hlanlio para ah siar cawk lo kan hmuh i tuisan khal ah mit hmuh le kut tham kho ding in kan kiangkap ah kan hmuh kho. Cuiruangah pasal rua, nupi rua kan si maw ti thaten i ruat cang uh si! Kan dawt mi nu/pa cu an sining ten kan cohlan awk asi ko lo maw? A tlamtlin lo nak ah mehtok khih sak tu si lo in zeitinseh a tlamtlin kho nak dingah ka bomh kho lai ti hoi in kan zoh ih kan dawt ahcun nikhatkhat ahcun a tlamtling te hrimhrim lai. Kan hngaksiat lio ahcun kan mah ten rawl kan ei thiam lo, ti kan ding thiam lo, hnipuan kan i thleng thiam lo ih mi nih an kan tuah sak dih. Kan mai lungretheih hau lo in zeipoh khua an kan khan sak dih. Sihmanhsehla kan hong upa ih nupi pasal neih kan hong cut hnu ahcun kan hngaksiat lio bantuk in mi va rinh awk an tha nawn lo. Kan mah bak nih ka kan sah a hau. Kan mah bak nih lam kan sial a hau. Kan mah bak nih thuthennak kan tuah a hau ih kan mah bak nih duh hril nak kan tuah a hau. A karlak ah sungkhat unau le hawikomh pawl hnen ah ruahnak tete cu deih a tul dan bantuk in deih ding asinan a zate riorio in cun deih lo ding. “Sibawi a tam tuk ahcun naute a thi” ih “saya an tam tuk ahcun lawng khal ti sung ah a pil.” Zei thil poh hi a mah le a mawitawk ten a hman zia thiam ahcun lungvar mansung bantuk an si dih ko nan luan tuk in kan hman pang ahcun mai miduh co lo in an kan tuah kho tu an rak si lala. Cuiruangah, pasal nusal na kam i seh aw la na duh mi cu na mehtok in khih ko. Na khih nak hmun khal ah panh ve ko. Zeihmanh i fahsak ding a um lo.  

Veitampi cu Pathian thusim pawl nih kan hnakruh cah hin Pathian hnen ah thla kan cam ih kan deih awk asi ko an ti. Veikhat veihnih ahcun “Pathian nih kan cah a ret cia mi cu deih sal a hau maw si?” tin khua ka ruat theu nan a ngaingai ten ti ahcun “khi pa ra ka pe, khi nu ra ka pe” ti hnak in “Bawipa na ka pek mi nu/pa ah kai lungsak lai” ti tu in thla kan cam kho ding a thupi deuh. Thla kan cam lengmang ko bu in, kan mi duh mi cung khal ah rinh um ten kan hngak ringring ko bu in, an kan hmu tu poh nih “Pathian samhrisih nan si ko lai” an kan ti lengmang ko bu in thil pakhatkhat ruangah kan karlak ah then nak a suak pang khal silen lungfak tuk ih kan um ding le lung thin kek kuai ih kan um ding Pathian nih an kan siang lo. Cuihnak in kan cah a tha deuh mi an kan ret sak ruangah asi ti hoi in ruahsannak thar thawn a hnen ah thla kan cam sal ding an kan duh sak hoi. Kan Bible ca sungah thihnak le nunnak ih an huham cu kan lei ah a um a ti. Cubantuk in lengfa le tlangval kan i co ding le co lo ding ih a huham khal kan lei ah a um. Mi pakhat ih rin ka khat ruangah kan i co kho ih mi pakhat ih rin ka khat ruang khal ah kan i co lo kho thotho. Kawl nih cun “kan mai duh mi hnak in an mah nih an kan duh tu hawl ding” an ti. Sihmanhsehla kei nih cun kan mah khal nih kan duh mi, an mah khal nih an kan duh ve mi hawl ding ka ti. Khat lam lawng ih duhnak a um ahcun innsungkhar ai nuam kho hlei lo lai. Cuiruangah bangrepten kan i dawt veve ih kan zawn kan i ruat veve a hau tin ka hmuh.  

Zumtu Khrifa pakhat kan si ahcun zei thil kan ton mi poh ah Pathian remruat asi tin a tuar zia thiam tu kan si kho nak dingah kan mah le kan mah lungfim kan i suah lengmang a hau. Pathian nih minu a rak sersiam lio ah khan mipa ih a hnakruh a lak i cutin a rak sersiam mi asibantuk in tlangval pawl nan hnakruh a bau mi hawl dingah Pathian sawm uh! Lengfa pawl khal nan hnakruh nei tu nih nan pahnih ten nan i manh veve tikah an in hmuh kho nak lai Pathian hnen ah thlacam ve uh! “Pathian khuakhan dan in siseh” tin thla kan cam hnu ahcun thinsau ten kan hngak ding le rinh um ten kan hngak tenman ding cu kan rian asi. Kan nupi ding le kan pasal ding hi nupi pasal sawhsawh si lo in kan santlaih lo nak ah ai bawmsan tu, kan tulsamhnak ah ai somhdawl tu, kan tlaksamnak ah ai namneh lo tu kan si ih kan pahnih cu pakhat kan si cang lai ti thei buten upatnak le tihzahnak thawn kan zoh hni ih kan sonhbiak hni an hau. Culawnghmanh si lo in kan mah nih kan dawt zat in an kan dawt ve ti tiang thei buten Pathian hmai le minung hmai ah duhnungzaa nunziamawi zohthimhtlak ih nungcang tu lengfa rinh um le tlangval rinh um kan si theh kho cio nak dingah Pathian nih kan thlacamnak kan ngai sak hram sehla kan zaten kan miduh ron kan co ter hram ko seh! Mai miduh a co cang tu pawl khal nih Pathian hnen ah lungawi thu sim hngilh hlah uh!