Thlakua sung pumpi sungah pawi in le thlahranakah vawleicung pi thawn hmeltheihnak a ka tuah sak tu Sunghno ka NU na cungah lungawinak simcawklo ka nei e. Na fa san ka tlai hrih lo nan ka lung sung um ek in kan dawt zia cu na zanmang tel in cun na rak theih ṭheu ko lai ti ruahsannak ka nei e. Sunghno kanu nafa na ka dawt ning pawl ka von ruat sal hni tikah hin kan hmaisong tuk ṭheu e. Na cung i tuahsak kan duh mi le um ter kan duh ning bang in tuisunni tiang ka tlinh kho hrih lo ee. Cungzingnu hnen tu ah tuihlan na thlacamnak kel in rak ka bawm ringring hrih aw la nikhatkhat ah cun na fa tlamtlin ni ka nei ve te ko lai. NuNu kan dawt tuk ti leng in cun sim dan ka thiam nawn lo e..hawi nih cun an nu le an dawtnak hi tuahsernak in an langh ter ko lai nan; sunghno ka nu kei nafa hawi ka bang kho hrih lo ee. Na ṭangdai cung i zau le na bankhamhtang i ih lio caan kha ka hon ngai hringhran ko ee! NuNu, mi nih na ngeih an in siat ter lai ti ka phan tuk nak i kai ralrin nak ah huat lehlam ka tlaih can a tlawm nawn lo e. Nunu, atla cia mi na mitthli kan hnul sak kho lo hmanh ah let hnu i atlak sal nawn lo nak ding in cun ka si kho tawk in kai zuam ko lai mu! Mitampi cu thil an tuah ah hin an nu le an suahpit unau i siter an thiam ṭheu lo i thil kan ti kho aw pat tiah mi an sokphak ṭheu...NuNu, culak i an rawl meh na si ding kan siang hrimhrim lo ee. Mifim mithiam an ti mi sungthu lengnal mi zirtiang Nu 100 hnak in zei santlaih lo bu in ai porhlaw dah kel lo i fa le cah arkhuang hlan i tho tahrat in khukbilh i thla a cam ringring tu kanu nangmah pakhat kai duh deuh. Nang cu zei hmanh in kan thleng kho lo e...Nunu, thil tuah ka hiar dukmak mi pawl khal nangmai lungkimmi an si lo ah cun na awkam ngai in ka hngak hni ṭheu ee. Ka nun nakah hin Pathian hi pakhatnak i ka ret mi asi i a pahnih nak cu ka Nu nangmah hi na si e. Kan ngai tuk lawmmam i ka zanmangzaa tiang in kai helh dih ṭheu e. Ka von i hlau i ka pawngkam ah ka hnipuan retnak Bizu le cazohnak cabuai lawng nih ring aang lo in an ka zoh hlenhlun ṭheu. NuNu, vuleicung ngai hi duh tlin lo nak ram a si awk ri...Nu le fa siang lo bu ten tluang dang i um dih ngai a har hi mu....Sunghno nu le sungsuak fa pawl thawi ai danghram mi poah i tuar mi asi cio ko lai ti mi te nih ka mitthli aa ka hnul sal ṭheu e. NuNu, na cakuat sung i Bible cacaang na ka kuat mi pawl le phone kan sonh caan poah i na ka cah ṭheu mi Bible cacaang pawl thawn thazang ka la hni ṭheu e. Veitampi minung ai si bang in kan i nuam tuk ko ee kan ti ko hmanh ah mihnen i simrel awk tlak lo kan ngeihsiatnak, lungzurnak le zuunngainak pawl cu na awkathlum siar lo nih an dam ter kho lo e. NuNu ka hngaksiat lio ten tuisun ni tiang na reikiangpawng in hmundang ah kal duh nak lungthin ka nei dah kel lo nan mu...mi nung fam nih ṭhanso le mi bangh duh ah cun a nuamhnak hnak in a ṭulh nak ah um a rak hauh deuh ruang ah si ngairiangmang bu in khawhni um lo Nu le Pai ṭaangdai tang in tluangdang ramdang ah na fa le pawl nih kan in kal tak nak cu asi. Na santlaih lo ruang le na siatvat ruang i na pawngkam um kan huam lo ruang ah a si naisai lo timi hi theih ter kan duh ee. Nunu...na fale kan i zuam cuahmah lio asi ee...a cak tuk mi santiluan kan dawi lengmang nak ah kan tha a baang tuk cang ii na daihnem te kha kan ngai tuk hringhran cang ko ee..NuNu, ka sunmang le ka saduhthah 40% ka kimh kho in cun na hnen ah ka ra kir sal lai mu! Cuihlan sung cu thinsau lungfual ten rak ka hngak ṭenṭo hrih ko mu ka dawt ka nu. Nunu, minih na fa USA ah a um i zeizatseh an kuat cang tiah ramdang um fa le nei pawl an daih ṭheu mi na theih ve tik caanah khin na mithmai a mul tuk ko lai mu..kan ruatsak ah hin ka zaang na fak tuk lawmmam ko e. Nunu aw...a simh zia tu rak thiam in ka fa sumsaw hlawh ah tluangdang kal asi lo e tiah rak sim hni ko mu....
Let hnu bik ah Nunu na fa nih ngeihthiam daih kan duh: Na cung i ka tuah sual, rin sual le thusimhngai lo i ka umnak vialte cungah thihnak i neh lo a thosal tu kan bawipa Jesuh khrih hmin in rak ka ngeihthiam hram aw la let hnu ah khabantuk sualnak ka tuah nawn lonak dingah thlacamnak in rak ka bawm bet hram tiah toidor ngai in nawl kan duh ee!
Tuisun ni ah sunghno nu le thawi ai dang hram mi vial te cah Nu'i dawtnak a thar i von ruat sal in lungawithu hon sim cio uh si!
An thih hnu i an thlan cungah ṭahhla le bezai dawhdawh phunkip thawn na dawtnak va langh ter hmanh aw la a thei nawn lo lai i cutikah nai sir nak nih van a ban te pang lai....Nai cum dukmak lai i zei ṭhahnem nawn ta lo lai...na pawngkam um thil le ri na sit thongh nak ah na kut ke lam an fak lai....
Let hnu bik ah von ruat: Ahmaisabik i hnihsiamsi daan an zirhtu na saya kha au seh asi?
Sunghno ka Nu Biak Leng thok in Vawleicung khuazakip um sunghno Nu poahpoah cungah pathian thlasuahnak um hram seh! Sansaunak le lungdaih hnangamnak thlasuah fam kim cu kan pathian a nun bang in an cung ah ron burh hram ko seh!
No comments:
Post a Comment