Ramthlo khua thawhkeh nak hi kan theih cio bang in Ticawm ii ttafar te in ai thawk. Ticawm an um lio in fa le pawl tampi an nei. Cupawl cu Cenhrang, khingtin, Thlathang, Laikham, tipawl an si, (Mi pakhat ii ngan daan in cun fapa hleikhat le fanu pakhat an nei a ti.) Ticawm in sak lam ah an kai vi ma. Kulhmu le Congla veng a rak si lio in Ramthlo ti ii kawh a rak si deuh hmang.
Kulhmu le Congla in an kai vima hrih. A hlan Ramthlo veng pawl cu Hmunpi, Ngaizaang, Rawncung, Tatang, Khuathar, Dokthek, Khuatthu tipawl an rak si khah. Cuihnu in Pu Sa Kulh le Pu No Kulh nih Vantualrawn ah veng an sat.
Ramthlo pawl ii ka ni palh ttheu mi ah Pu Sa Kulh le Pu No Kulh nih khua an toh kan ti. Khua an toh lo, Veng an sat a si deuh.
Cu ti thotho in Tlangzar khi khua an toh mi a si lo. Veng tu an sat tthiamtthiam mi a si deuh.
"Vantualrawn" ti mi hmin hi Ticawm hlan pi Faifa san lio in rak um dawh a si. Mithi pawl hi an thlarau Zinghmu ah an kal ti rak ti a si. Cui zumh mi le ruah mi cu Ramthlo pawl lawng ii zumh mi a si lo. Lai ram khua tam pi ii rak zumh mi a si. A tui Mizoram pawl tiang ii rak zumh mi a si. Hi tuanthu hi Sam Liana, Sui Lian Nu'i ttapa, Champhai um mi nih a ngan lengmang lio ii a ttheh nawn cang lai. Mithi thlarau pawl hi tualzam lei in an hong kai ii Tuarthlua tlang ah an ii hnga ti a si. Tuarthlua tlang in an kal vima ii Zinghmu ii um mithi thlarau pawl nih an rawng dawn ti a si. Cui Zinghmu thlang ii mithikhua pawl ii an rawng don nak hni hmun le hma cu Vantualrawn ti ii kawh a si ti a si.
Cui ruang ah a tu Ramthlo ah veng thum a um ti nak a si cu. Dokthek, Vantualrawn le Tlangzar an si. Cui veng ii a um mi pawl nih Ramthlo kan si dih.
No comments:
Post a Comment