Pathian nih lam a kan hruainak thawng in Ramthlo khua khal santhar sining zulh in kan kal kho vima ii thatho ngaite a si. Kan pupa san ii an hmuh an theih dah lomi thil tampi kan hon hmuh, theih kho ve cang. A lamkip in tthanso kan panh ti cu mithmuh kuttongh in theih cio a si. Kan mang hmanh ii kan manh dah lo mi USA le a dangdang ram tiang kan phan kho ve cang. Fimnak lam khal ah nai in kan hong ii hlipar deuh a bang. Chawlehnak lam, zuatkhalhnak lam, cinthlaknak lam le thil dangdang kan tuahtuannak pawl von thlir saal ding in hi capar hi ka rak nganmi a si. Famkim a si lo nain a tlangpi in langhtermi pawl an si.
Uknak Lam
Ralkap uknak le lam hruainak in a kal mi ram kan si bang in khuate lam uknak tiang in a kan hnursuan dih ii duh bang in khua sung caah rianttuan cu a har. Cunglam nih ka khat an simmi paoh cu tuah dih a hau ii el awk a tha lo. Mipi duhnak zoh lo in ii hruai hi a tam deuh cang. Hi uknak nih cun tthansonak lam a kal pi kho lo ti cu an rian tuanning zoh ah a fiang ko. (eg. Laphet le ciatsu hranhram in cin ter tbk.) Cui ruangah khua sung ii biaknak lam le mino ii hruaikaihnak hi a thupi ngaingai.
Pumcawmnak Lam
Kan pupa ii an tuahmi lopil nam hi tuisun ni tiang kan hmang hrih. Leikuang kan neihmi nih ei khawp ngaingai cu a suah pi lo. Dokcat in kan ii cawm ti sehla kan palh lo lai. Nai hrawng in Lothlo bu tla an um ii cui pawl nih a phunphun in khua an khan cuahmah lio a si. Kumkhua lo kan tuah ah a ttha cang lai an ti nain a ngamh taktak mi an tlawm hrih. Lopil ngaite lak lo in cun kan ii cawm kho lo lai tiah mi tam pi cu thinphang in an um. Dum tuah hi naisan in a lar phahphah. Kan tuah tuan ning kan thlen lo ahcun hmailam caah lungrethei cu a si ko.
Zuatkhalhnak Lam
Zuatkhalh lam in ai cawm ngaingai mi kan tlawm hrih. Vok hi a tam bik in zuat cio a si. Caw le na hi cu lo tuantu ah an zuat. Naisan in sia zuat a lar lala ii atu hi sia zua an karh thluahmah ko. Nga zuat hi a um phahphah. Pa Lian Nawl hi nga a tawlreltu bik cu a si. Thungaithlak in zuatkhalh lam ah a tuan mi an um ahcun thansonak ah a tha bik a si lai tiah zumhnak ka nei.
Fimthiamnak Lam
2000 hnu in fimthiamnak lam ah kan kal ning ai phun dang ngaite cang. Fimnak lam ah thapek kan hon thiam deuh. Bible lam in siseh Secular lam in siseh kan thangso vima. Ngaihsia ngai a simi cu nai in mipa tlawngkai an tlawm vima cang. Phun 7,8 an tian in tlawng an ii phuak cio ii thil poi ngaingai a si. Nu le pa nih fak pi in kan ngaihtuah saal a hau.
Nunphung Lam
Kan pupa nih a kan roh takmi nunphung dawhdawh tampi cu an lotlau cang. Kan bia, hla le nunphung hi kan thlau pang citcet ahcun miphun pakhat kan sinak kan thlau a si ko. Kan rothil tam pi khal an tlau vima cang. (eg. Liandang lungphun a umnak ah a um nawn lo tbk..) Phung kan theih lo ruangah thil tha lo tam pi an suak. Kan ii ralrin a hau cang hih!
Mizo ram in Malay lam ah
Kan ram ah duh bang in tangka hlawhnak a um lo ruangah tuihlan cu mizo ram lam hi zapi nih rak panh cio a si. Asinan, Malaysia lam kal a hong lar ciamam ii naisan in cun Malaysia lam kal hi zapi nih cuanh cio a si cang. Thatnak ii kan hman thiam ahcun kan ram a hninhno tertu a si te ko lai. Kan hman thiam lo belte le cu ram caah nganfaak pakhat bantuk in ai cang khomi a si ve thotho. Thatnak lam tuin hman ii tum cio uh sih.
Mino le Zu
Laimi le zu hi kan ii then kho hmang lo. Kan pupa pawl nih an ngaihsiat khal ah an ii nuamh khal ah zu hi a sun a zan in an rak din nain Pathian kan hon theih hnu in zu kan kal taak ii thil tha ngai a si. Asinan mi tampi cu kan then siang kho ngaingai hmang lo. Mino tampi cu zu ah an ii ciah dih cang ko. Ramthlo ii kan ralpibik cu zu ti sehla kan palh lo lai. Zu nih a kan hrawk taktak cang. Uknak lam nih a kham nain ca lawng in a um ii tuantu taktak an um lo tikah a hlawh a tling kho lo. Biaknak nih fak pi in tuan sehla ai tizia men ko lai.
Acozah tangka cawi
Naisan in acozah tangka cawi ding a phunphun in a suak ciamam ii kapkhat in cun thil tha a bang nain hmailam caah thil poi a si te lai. Kumkhat ii kan cawimi tangka hi a ti ii ticawk a si lo. Leiba nih a kan nenh dih cang ai! Tangka cawi hi hrial awk cu a tha lo lai nain kan sining le tangka kan cawining zoh tikah kan lungput a rawh tertu an si te lai ti phan a um. Rawhralnak suahtu si hram hlah seh!
Thing le Ram Lam
Kan ram cu a tettiam dih cang ko. Kum tin ram a kangh ruangah ram a phong dih. Thingfa khal an kho kho nawn lo. A cin lam si loin a theh lam ah kan khul a rang tuk. Thingat awk khal a um nawn lo ii inn puah ding hmanh hi thilhar a si ko. Thing a um lo ruangah kan tihna tiang in an reu dih cang. Ti a reu ruangah tizu ngacel tiang in an kan kal tak dih i Saram khal nih kan ram an hlum duh nawn lo. Ruahnak thar lung thar kan neih lo ahcun kan ram caah ngaihsia a si ko. Kan vawlei hi kan pupa hnenin kan ngahmi ro a si lo. Kan tufa hnenin kan ii hlanh sungmi ram a si ti hi kan hngilh theu hmang. Tha tein kan kilven sak hni awk a si.
A tlol pang lai fawh
Thangthar mino nih rian kan ii khinhmi hi a tam taktak awk a si nain ruah bang in rian kan ii khinh lo tikah thil poi ngaingai a si. Kan pumcawmnak, fimthiamnak kan hawlnak, inn sungsang kan cawmnak le kan unau kan zohnak ah a kan dawtu kan ram cuanh ta hi kan hngilh cio theu. Kan ram hi zeiseh a bangh? A tettiam tuk maw? A rocar tuk maw?...etc... ti le thli teh an thiaghlim hrih ko maw? Ramsa teh ram an hlum nawn maw? Tizu ngacel teh an um hrih ko maw? kan ruah awk a si cang. Pumpak kan duhherh ii caan kan pek sungah kan lohma a rak tlol ahcun a luan hnuah kan ngaih a siat khal le san a tlai nawn lo lai khah! Na suahsemnak, na thanlennak, an dawtu na ramte hi khawi na kal paoh ah hngilh lo in na hnakkar ah rak tenh ve law na ramte cu ram sunglawi ah ai suah saal te ko lai.
Ask not what your country can do for you, but ask what you can do for your country. John . F . Kennedy
(Ka ram nih zeiseh a ka thathnem ti hnakin ka ram caah zeiseh ka thathnem ti hi kan ti awk a si ve cang lo maw hawidawt unau)
Salai Cung Thawng Lian,
Ramthlo Students Union President
No comments:
Post a Comment