Zeidah kan ttih? – Mai Esther Dimte (HLD)

Nifatin kan nunnak ah kan ttih mi hna hi zeidah an si? Zeiruangahdah kan ttih hna? Aho nihdah cu kan ttih mi hna chung in an kan chanh khawh lai? A taktak ten kan ti a si ahcun cu kan ttihnak hna chung in an kan chanh kho tu cu kanmah kan ruahnak le kan lungput lila kha an si. Ttihnak timi hi atui kan mah chan lawng in kan ton mi thil an si lo. Bible ca chungah ni hin ah zohchun awk tlak tiah kan ruah mi cheukhat hna zong nih an rak ton len mi a si. Zohchun awk tlak tampi chung in pali hna ih an ttih mi zeidah an si ti cu Bible ca kan rel ahcun kan theih ko hna lai.

     Abram (Genesis 12:10-20, 20:1-18)

A nih cu Pathian nih ka hawikomh tiah a auh mi zumhnak pacang pakhat a si. An ram ah paam a tlun ca-ah din ei kawl in Egypt ram an panh. A nupi Sarai hi mi dawh tuk a si ca-ah a nupi lakpiak duh ah amah an thah sual lai ti a phaan ca-ah Egypt siangpahrangpa sin ah a nupi cu ka far nu a si tiah a hlen. Cu kong cu Siangpahrang pa nih a theih tikah a thin fakpin a run ih a ram in a dawi hna. 

     Jacob (Genesis 27)

A nih cu a nu Rebecca nih ro co ter a duh ruangah a pa Isaac hlen a fial mi kha a el ngam lo tu faphir hna ih hngakchia deuh a si. Phundang in kan chim a si ahcun a nu thinrunh ter lai a ttih. Cu ca-ah a pa a hlen ih a upa Esau nih a co awk thluachuah vialte ai lak dih hnu ah an ram in a tli. A pa’i ruun-inn ah a um ngam ti lo. A pa nih a theih sual a si ahcun a thin a run lai ih chiat a serh lai. A upa nih a theih sual a si ahcun a thah lai. Curuangah amah le amah a nunnak ii humhim awk ah a zaam. Mihlengtu a si bantuk in a pu Laban nih a rak hlen ve ca-ah nupi kum sarih ah a tthit kho ding mi cu kum hleili hnu lawngah a duh mi a co khawh. 

     Reuben (Genesis 37:12-36)

A nih cu Jacob nih fa le a ngeih mi 12 lakah upacem a si. A nau a hniang cem changtu Joseph cu nahchuahnak le remlonak ruangah a u le dang nih thah an timh lio ah Reuben nih a rak runh ih a nunnak a hum khawh. Sihmanhsehlaw ramdang mi khualtlawng pawl sinah zuar ding an ti tthan tikah cun a ttih hna ca-ah a el ngam ti hna lo. A naupa a nunnak hum duh ah sal ah zuar ding in ruahnak a chuah tu a si. Mah chuahpit laihritlai sal bantuk ih zuar ding cu thil ttha lo a si ti a theih ko bu in mi tamdeuh biakhiahnak a zulh. 

     Aaron (Exodus 32)

A nih cu Moses hen Israel mi hna Egypt ram in Kanaan ram ah kum sawmli chung a kalpi tu hna a si. Pathian nih Moses cu biakam pahra pek awk ah Sinai tlang cungah ni sawmli chung a auh. Cuchungah Israel mipi hna nih Aaron “kan hmuh kho mi le kan tham kho mi pathian kan ser piak” an ti ca-ah an bia a el ngam hna lo. Phundang in kan chim a si ahcun a hmaisong hna. Cu ca-ah sui le ngun, lungvaar phuntling an pek mi cu a lak ii sui caw a ser piak hna. Cutikah Pathian nih "keimah lo a dang pathian nan bia lai lo" timi biakam a pah. 

            Nifatin kan nunnak ah ttih mi kan ngei dih hna. Mi cheu ih an ttih mi cu mi dang ih an ttih mi hnak in a hme deuh mi an um ih a ngan deuh mi zong an um ve. Kan ttih mi cu ii khat hna hlah hmanhsehlaw zeitindah cu kan ttih mi kan pah hna timi tu cu zumtu tampi cah cun ai khat ko lai tiah ka zumh. Zumtu Pathian bia mi tampi hna nih cun harsatnak kan ton caan ah siseh, vanchiatnak kan ton caan ah siseh, kan zawtfah caan ah siseh, camibuai kan tuah caan ah siseh, kan lung a dongh ih kan van a san caan ah siseh Pathian sinah khukbil in thla kan cam tawn. Cucu a hmaan mi khrifa thil tuah ning a si ko. A palh nak pakhat hmanh a um lo. Sihmahsehlaw kan mah ten kan ttih mi le kan ttihnak a ruang kan theih lo a si ahcun thlacamnak lawng in cun a mahten zeihmanh ai remh lai lo. Kan tthihphaannak zong a ho hmanh nih an kan chaang kho lai lo. Kanmah nih ralttha in biahmaan kan chim caan a um lai ih, a thei lo bantuk in kan um a herh caan zong a um ve lai. Cubantuk tthiamtthiam in kan hawikomh le rianttuan tti hna hen kan ii sik caan le mithmai kan ii chiat caan zong a um lai. Zeibantuk ttihphannak kan ngeih a si hmanhah ralttha in biahmaan a ttanpi zungzal tu kan si kho nak lai Pathian sin ah thazaang hal uh si! Kan minung hawi hna ih bochan tlak, zohchun tlak le ttihzah upat awk tlak mi si ii zuam peng uh si! Biahmaan kan chim ruangah mi huat lai kan ttih a si ahcun nutling patling kan si taktak rih lo tinak a si. Kan mah le kan rian a si mi kan ttuan lo ruangah mawhchiat kan ton a si ahcun san kan tlai lo tinak a si. San kan tlai lo ti thei bu in mawhchiatnak kan cohlan kho lo a si ahcun dawtnak lungthin kan ngei taktak lo tinak a si. Na ttih mi hi ttih awk a si maw? Midang nih ta an ttih cio mi a si maw? Minung nih na ttihnak chung in in chanh kho hna hlah hmanh sehlaw Pathian sin ah na ap a si ahcun amah nih khua an khaan piak ko lai.