Zu le a ding tu

"Zu" tiah ṭhangthar seino hna nih kan hngalh dih mi le mino "pa" a tamdeuh i din mi hi zeiruangah dah a ṭha lo tiah kan ti tawnnak asi hnga? “Din thiam ah cun Sivai asi i, din thiam lo ah cun mi chiat hrawk tu asi” tiah kawl mifim hna nih an ti. Asiko, an biachim mi hi asi ngai mi asi. Zu dingtu hna i dirhmun von zoh hnik tuah uh si! Nitlaknak ram le Nichuahnak ram i kan zu din ning le a ding tu hna hi kan i khat hna lo. Kawlram ah cun kum ret khiak kan ngei lo naten ram ṭhangcho tamdeuh ah cun kum 21 tang nih zu an ding kho lo i a cawk zong an caw kho fawn lo. Kum tling upa nih zu an din hmanhah khin innlak ah thangchia le mualpho in an um bal lo. Mi nih zuding kan si hi an kan hngalh sual lai tiah an mai innchungtang te ah an din. Cuzong cu an riit tiang an ding fawn lo. An mah ten ret khiak in an din i an riit hlan ah an baan. Inlak i an lenkainak ah an hawi le hen an din hmanhah a nuamhnak cah lawngah an din. An riit tiang an ding bal lo. Cutin, zu nih an bianuam rel a mil ter. Ningzak pang ngai mi hna nih mizapi lak ah nuam ten an i pawl khawh ve. Asinan, nihin laimi nang le kei i zu kan din ning cu ret khiak zong kan thiam ti lo i mah hlei ah mi nih kan zuriit an kan theih lo ah cun zuudinman kan ngei lai lo ti phun in kan um i kan rit lo zong ah a ri bantuk in kan i um ter. Kan aw ngeihchun chia le chia lo in kan kio, kan raak i mi kan phuar hna. Mawtawlam ah kan i tlum ti lo i a ho hen dah kan i ṭhuat ah a ṭhat lai tiah kan hmuh mi kip i palhnak kan kawl. Zu kan din hlanah cun "ka thabaang, ka celh pah lo" tin asilo ah "i hawikomnak ah ding hna uhsi" tiah zupalang kan i lak i si-ai phun in hman kan i tim. Asinan kan von din taktak ah cun kan rit hlanah a baan kan thiam ti hoi lo. Unau "zu ding hlah" tiah nihin ni ah thloh kan tim hna lo. Ziah ti ah cun nangmah tangka in na cawk mi asi. Nangmah thil asi mi cu na duh poah in na tuah awk cu nangmah nawl asi ko. Asinan, tlawmpal te forhfial kan duh mi cu; zu cu ding law a sal ah cun taang sual hlah! Zu i aduhnak hmun poah i mawngh mi va si hlah law, nangmah tu nih na duh nak hmun poah ah va mawng! Zu ruangah buaibainak chuah pit hlah law zu ruangah hawikomṭha karh ter tu i zuam! Na ningzahpan phen tu le na ruahnak, na chunmang mipi sin i chimphuan ngamnak ding ca-ah ralṭhatnak an petu ah i hman. Kan dawt tuk ko ee an ti tawn tu hna i an biathli zong chimh kan duh chih. Mah cucu, Zu na din lio i mipi nih an in hmuh ning le an in chimh duh bal lo mi kaa hnihthum te an si. Ziah ti ah cun nang cu ka chuah pit ka unau tluk in kan dawt mi na si ca-ah mah bia hi na hngalh ding hrimhrim ah a poimawh tiah ka ruah mi hna an si. Zu na von rit i na von au, na von kio, mi na von phuar lio le mi hen nan von i ṭhuat cuahmah lio ah khin na pawngkam um na minung hawipi hna nih minung cazin hmanh ah an in chiah ti lo da kaw. Milai fa asi lo an in ti. Saram fa asi ko lai an in ti. Afak tuk lo maw ka hawi? Mah tawk te in sumpai le ngeihchiah duh poah kawl kho, hmang kho i mai nuntukhuasaknak ah a ho i bomhchanh hau lo in nungcang kho ve ko mi nangma'i ngeihchiah hman thiam lo le i control khawh lo ruang i an kedamtang i an in chiah cu upa lungfim cah cun chunvui ten ṭahpi awk tlak asi lo maw? Culawnghmanh sirih lo in, zu kan rit ruangah kan holh kan i sum kho ti lo i kan ir awm chung um vialte dunghmai zoh thiam ti lo in kan holh dih hoi. An kan dawtu hna an ngeih kan chiat ter hna i an kan hringtu nupa hna mithli kan tlak ter hna. Innpa chakthlang hen huatnak kan chuahpi. Khuahlan Pipu nih an rak ti bal mi cu “chun ah na hnulei zoh law, zaan ah na tang lei zoh! mah hnu lawngah holh" an ti mi kha kan philh depdep. Cui a chuah pit mi cu, kan hawi le a kan duhdaw dukmak tu hna kha kan sung dih. An hawikom cazin in an kan hlonh. Kan mah bantuk zuri le sabah mi hawikomh silai an i siang ti lo. Kan lung a hong fim tikah ngeihthiam kan hal ṭhan hna i veihnihthum cu kan hluhchuah tawn i kan i komhngeih ṭhan ko naten a ni le a thla a hong sau deuh tikah nun ṭhinh zai kan i rel hleilo i kan mah kel ah kan hong chuak ṭhan tawn. Mahruangah thlachiat lai zong ruat ti lo in zungzal an hawikom cazin cun an kan chuah ko. Ral zoh in a kan zoh i kan pawngkam um lai le kan awkam theih lai zong an fih cang. Tuihlan i catang ngei asi, thil tikho asi, mi fim le mithiam, khurkhua ruat kho asi an kan ti mi vial te kha "fanghi thli lak i a zam bang" in an tlau dih ai. Zu kan rit lio ah cun khapkhat can te lawng khurkhua kan ruat kho. Mahruangah mi hen i vuak lai kan ṭih lonak cu asi. Zu kan rit lio ah thaichun ah zeibantuk thil dah a cang lai ti kan ruat kho ti lo. Lawlawse i kan lung di a riam khawh nak asi phot ah ti lawng khua kan ruat khawh tawk cu asi. Mifim le mi hrut theih kan duh ah cun an zudinning zoh in 80/100 fawi ten kan tlaih khawh hna. Zu maw palh a ding tu tiah biahalnak um sehlaw kei nih cun mah tihin ka leh hna hnga. Zu cu holh thiamlo le nunnak thaw zongngei lo mi thil asi ca-ah amahten palh nak a tuah kho lo. Adingtu nangmah le keimah hoi kan palh. Kan mah le kan mah kan sining le ka level hmanh i hngal lo in zudinnak ruangah ai pawrhlaw mi kan si chung poah cu mi kedam tangah kan um peng rih ko lai. Mi va herh tu si maw na duh, mi i rak herh mi si dah na duh ticu nangmahten i ruat ko.