Thihnak le Pathian Khuakhaannak - Mai Esther Dimte (HLD)

Zumtu mipiangthar a ti aw tu pawl tampi in kan fiang awk lo ttheu mi cu thihnak kan ton tikah a liamcia caan ih kan sual nak kan puh ttheu mi khi a si. Pathian zumtu kan ti awk fawn, thihnak le harsatnak, damlonak le retheinak, zonzainak le farahnak kan ton mi pawl cu Pathian ih in hrem nak a si kan ti, daan in tat kan ti, in kawh nak a si kan ti, kan pipu an rak sual tuk ruangah hivek in kan tuar nak a si kan ti. Pathian ih khuakhaan cia mi a kim a si tin kan pom thei lai hlanlo cu kan piangthar ngaingai lo a si. Ziangah tilen Pathian cun kan nu’i pumsung ih kan sem hlan ihsin zovek kan si ding le ziang dinhmun ah kan um ding, ziangtikah kan thi ding tivek pawl khua a rak khaang cia thluh mi a si. Curuangah, tuisun ih accident nak ih thih loh kan ton ruangah siseh, thawng kan tlak ah siseh, sizung kan um ih operation in tuah ah siseh, a liam cia caan ih pipu, nupa, unau le sungkhat pawl ih sual ruangah a si tin mawhphurh rero tu si lo in Pathian hnen sawn ah tuartheinak thazaang dil in neta ah hivek harsatnak le dam lo nak kan ton lo nak dingah thlacam ding kan si sawn.

2006 lai ah kan duhdawt zet mi kan laicin sempi kan  upa Salai Than Hrang (23) in Thantlang peng ah mawtaw accident nak in mual in rak liam san. 2012 ah in hringtu kan duhdawt khop lo mi kan pa Pu Con Iap (53) in Kalaymyo ah innsaknak par in a tlak ih accident in mual in liam san lala. Lai dan ahcun accident nak ih thih hi “saar thih” kan ti. Thih ciocio a si ko nan ziangruangahso “saar thih” cu kan ttih cuang ih kan zoh niam cuang? Hivek vansiatnak kan ton tikah minung lam in mawhphurhnak le mah le mah phuhrun/puhmawh awk nak tampi a um ttheu. Mihrek in “nan pu Suntei pawl an rak sual tuk ih an nunziaza a rak mawi lo tuk ruangah mi nih siat an sirh mi cu an tufa le pawl in nan tuar mi a si” in ti. Mihrek lala cun “tuahmawhnak fate an ton lai ah nan thla hnaat (nun ham nak nan tuah lo) hai lo ruangah a si” in ti. Hivek ttongkam pawl hi accident ruangah thih loh a tuar tu taanta mi innsungsaang pawl ih hna sungah a khaa zet mi ttongkam an si. El thei nak huham kan nei lo vek in an sim mi Amen thei nak huham khal kan nei cuang lo. Sihmanhsehla thuhla cu a kil kip in mi an ruat ter nasa.

            Zumtu pawl hitin ringhelhnak nasazet nei in kan um ih vansiat kan ton cu kan pi le pu pawl ih sual tuk ruangah a si tin sualpuh kan hman mi hi kanmah san lawng ah kan tong mi a si lo ih Jesuh Khrih leilungtlun ih a rak len lai ihsin zumtu tampi an rak buaipi rero zo mi a si. John 9: 2-3 ah kan zoh silen hitin kan hmu thei.

A dungthluntu pawl in, Sayapa, zo ih sualnak ruangah so mitcaw in a suah? Amah ih sualnak ruangah maw, a nu le a pa ih sualnak ruangah so?” tiah an sut. Jesuh in, “A mit a cawtnak hi amah ih sualnak ruangah a si lo, a nu le a pa ih sualnak ruang khalah a si lo. Pathian thil ti theinak hi hi pa damternak ihsin a langnak ding ah a si. 

            Minung zokhal leivut ih sersiam mi kan si ruangah leivut ih kirsal ding kan si ti cu ttong kan thiam ih Sunday School kan kai pek ihsin kan zir mi le kan thei mi a si. Sihmanhsehla, thih loh nak kan ton ngaingai ih leivut ih kan kir ngaingai ni a thleng tikahcun zumtu tampi in kan tuar thei lo ih Pathian hnen ah thusutnak phunkim kan tuah ttheu a si. Zumtu mi piangthar cun thihnak kan ton khi kumkhua kan tthen awk tin ruat lo in a laangten kan tthen awk a si tin kan ruat ih tthennak um nawn lonak vanram ah kan ton awk sal ding a hngakhlap zet tu kan si sawn ding a si. Leilung mit in thihnak kan tong kan ti mi khi thlarau mit cun kan nun a rak thok sawn khi a si.  John 5:24 sungah cun:

Thungaite in ka lo sim: zokhal ka simmi a thei ih i thlahtu a zum ahcun kumkhua nunnak a nei. Thuṭhennak a tong lo ding; cutiin thihnak ihsin nunnak ah a lut zo. 

Zumtu mi piangthar kan si ahcun kan biak mi kan pa’i hnen ah feh thluh ding kan si ko ruangah kan lei taksa cu ziangvek in ziamral hmanh sehla kan fehnak ding hmun kan theihfiang ding hi a rak thupi sawn a si. Leitlun kan dam sung caan tawite ah duhdawt awk zet in pakhat le pakhat sunsak awk ding kan si. Cuti kan duhdawt awk zet lai le kan ralring lo zet lai fang ah mihrek cu Pathian hnen ah vanramnuam ah kan tlung ko ding. Cutikah taanta mi pawl in a pit tawp tiang khuaruat ih thinbaang le zuunngai in um kan hmang ttheu. Cucu lei daan a si! Thinbang tuk ruang ih nung peih nawn lo dinhmun tiang kan thlen lo nak dingah ruahsannak thar in pe ih a fa le in duhdawt ringring tu kan Bawipa Jesuh Khrih hnen ah kan riahsiatnak le kan ninghangnak hmuahhmuah cu hlan uh sila cutin kan phurrit cu a hnen ah tthum uh si! Amah in van lam ihsin kan phurrit in sawng ding ih thin hnangam deihnak famkim in pek ding a si. Thuphuan 21:3-4 sungah cun;

“Bawi tokham ihsin aw ringzet ka thei ih, “Pathian umnak inn cu minung hnenah a si zo. Amah cu an hnenah a um ding ih annih tla cu amah ih minung an si ding. Pathian Amah rori an hnenah a um ding ih an Pathian a si ding. 4An mitthli hmuahhmuah a hnul sak ding. Thih a um nawn lo ding; ninghang riahsiat, aihram ṭahnak le natnak a um nawn lo ding. Ziangah tile thil hlun pawl cu an hlo ṭheh zo,” tiah a ti.

Pathian nih in duhdawtnak sungahcun lehrul awk nak a um lo, thleidannak khal a um lo, mawhphurh awk nak le puhmawh awk nak khal a um lo a si. A duhdawtnak sung ahcun ngaidamnak le thilcang mi a cang dan vek ih pomtheinak le tuar thei nak pawl an um a si. Cui hnangam deihnak cu kan Bawipa Jesuh Khrih ih bomhnak lawnglawng in a cotu ding kan si. Curuangah, ka u le ka nau tla, mithi ngai in ttap nawn hlah uh! Liamcia duhdawt mi unau, nupa, pipu, ni le rang ngai in nan lung zur nawn hlah uh! An nih cu hi lei harsatnak ram ihsin an cawl hahdam thlang ih kanmah pawl khal an hnen thleng ve ding in mithmaipanh le hnisiamsi ten vancung ihsin in rak cuan ringring a si. Anmah hnen kan thlen thei ve sawn nak dingah atu ihsin thok in Pathian thawn nai awk uhsila kan nunnak ah Pathian cu a pakhatnak ah ret ringring uh si! Tuisun ni ah nu le pa nei lo, suahpi laihritlai unau nei lo, pi le pu kawh ding nei lo, ka fanu/pa ti kawh ding nei lo kan si pang maw? Ninghang lungsia le thlaphang in kan um pang maw? Kan kiangnai ih a um mi zumtu nu le pa u le nau pawl kha Pathian nih kan hrangah thlasuah in pek mi an si ti thei phah in kan lunglennak ti dam ter uh si! Kan duhdawtmi tla in mual in liam san cu kan pipu pawl ih sual ruangah a si lo ih anmah nih mual in liam san hnu ah ziangtin Pathian thawn kan pehtlai awk ih ziangtin kaar kan hlang thei timi zumtu dang pawl ih in hmuh thei dingah Pathian khuakhaan a rak si men thei. Pathian khuakhaan cia lo mi a cang mi thil pakhat hmanh a um lo a si. Kan Bawipa Jesuh Khrih ih duhdawt lainatnak le zaangfahnak thawng in kan ton mi thil tinkim parah tuartheinak thazaang nei thei zuam uh sila Amen ti thei tu si zuam uh si!