Leilungtlun minung zovek khal politics thawn a pehpar awk lo mi kan um lo. Ram pakhat le pakhat an pehpar awknak bik khal politics asi. Rualpi pakhat le pakhat karlak khal ah politics a um. Thilri parah siseh, minung parah siseh, ramsa parah siseh, leiram parah siseh, politics a tel lo nak a um lo asi. Politics ahcun thuphan khal a tel cih ringring. Amahbelte a tam le a mal deuh lawng an dang awk. Leitlun pumpi ah kan zoh silen politics tuah thiam deuh pawl cu mizaraan hnak in an lian cuang, an fim cuang, an thiam cuang, an hlawhtling cuang ih hmaizah upattlak an si cuang deuh thluh kan ti thei asi.
Hruaitu cu hruaimi minung pawl ih hril dan asi vek in ziangvek pawlkomh, uknak, biaknak hrang ah simaw hruaitu kan hril tikah ralring zet le fimkhur zet ih kan hril ding a thupi zet asi. A minung a fit bak mi cu zo ih forhfial ttul lo in kan hril cio ko ding nan a fit lemlo mi, fimzirnak le thiamnak sang nei mumal lo, casiar lo mi, sumtuah leilawnnak ah hlawhtlinnak nei phah men ruangah hruaitu ah kan hril pangahcun kan ttul mi kaihruai awk dan (leadership style) cu kan ngah thei lo hrimhrim ding. Hmeltheih si ruangah, mai miphun asi ruangah, mai sungkhat asi ruangah tivek pawl ruangah hruaitu kan hril asi ahcun tuu vek kan si ding. Tuu cun hlapi khua a hmu thei lo ih an hmai ih a fehtu tuu/tuukhal kha an thlun. Khaam lakah hruai bang sehla an thlun thotho ding ih an tlak thluh ding. Hruaitu cu kan zum ding le kan upat ding asi ko nan 100% in zum thluh ding asi lo. A palh thei mi minung an si ve timi kan hngilh lo a ttha.
Hruaitu hril caan a kim tikah a duhdaw aw cia rualpi, hnattuanpi, tlawngkaipi, kawhhranpi, venghnen, khua khat le ram khat ih um khal kan hua awk thluh ttheu. A ngaingai ahcun pakhat le pakhat kan theithiam awk tonh ding mi asi sawn nan. Unau suak khat hmanh kan hmel le kan taksa rong an bang awk thluh lo pi. Cucu sim hlah kanmai kutzung rori hmanh an can/bang awk thluh lo si lo maw? Kan minung hawipi pawl in politics thawn pehpar in kan hmuh dan le kan ruah dan vek in an hmu/ruat ve lo ding timi kan cohlang thei a ttul. Zokhal zalen zet in ttong/thusim thei nak le cangan thei nak kan nei thluh cio ko ding. Sihmanhsehla, kan zaten kan ttong/sim/ngan ciamco lo men ding. Thil ziangkim ah hin pianpi BA hmang a ttul sokhaw.
Politics le Religion hi rawi hniaihniai lo sehla a hahdam bik ding. “The separation of church and state” timi hi ram tampi in an nei nan a tak ih tuah ngaingai thei tu cu an mal zet. Thil dang hmuahhmuah ahcun acozah in a ramsung ih minung, thilri, leiram, leihnuai, island, tipithuanthum, space le rannung ziangzongza parah thuneihnak a nei ih a hrolh awk thluh kha a awm-ang zet ko nan biaknak lak ih a hrolh awk ve pangahcun a buai thok simei. Zalen zet ih mah duh mi biaknak a umnak U.S. tla hi Khrifa si thluh tengteng ding vek in kan ruatsak hai ih kan palh zet ka ti. Ram rak dinh hmaisatu pawl cu Khrifa rak si hai ko hmanhsehla san a thleng awk vivo tikah biaknak dangdang le biaknak neilo khal an karh vivo asi. Cumi cu zohmanh mawhphurh rero lo in kan cohlang ttul mi thuhman asi. Phun dang in kan sim silen “freedom of religion” ih a muril cu asi. Mi pakhat in zalen zet in biaknak a nei thei ih a neilo khal asi thei asi. U.S. um mi hmuahhmuah Khrifa si thluh hai sehla cu kan duh zet ko ding nan thuthluknak tuah tu cu rammi pakhat ciar ih an duhhrilnak asi kha kan theifiang le kan upat thiam a ttul.
Thunetnak ah kan minung hawipi pawl in kan ttanh mi party an ttanh ve lo ruangah zohniam hmang hlah uhsi! Kan ruahnak le kan pom dan in ttawmpi lo ruang khal ah nautat hlah uhsi! Luan tuk ih mi soisel le luan tuk ih mi va do pawl hi a cang thei tawk in hrial thei zuam uhsi! Thil ziangkim in a tawk le a mawi zawnte an nei thluh. Pakhat le pakhat theithiam awk tlang nak (mutual respect) nei cing ten kan ram le miphun hrangah a ttha kan ti mi cio kha zalen zet in le thinlung awlttawm lo ten vote hai uhsi!
No comments:
Post a Comment