Christmas le kan lungput - Ngun Siang Dim

             Tikcu le caan nih tleih kho lo in an liam lengmang ban tuk in, kan nun nak khal nikhat hnu nikhat a liam lengmang ve. Zei tik kar lo ah December tla kan tiang deng mah ko. Minung tampi thinlung, ruahnak, khuakhan nak khal hi caan nih hin a dang lam ter. Hmuh mi kip le theih mi kip nih, cui thawng cu kan sim seh la bang in, kan thinlung hmunseukhat ah cun a khat ko. Cui caan te tian lai ding cu kan i cang tuk cio. Kum le caan a hung rau i, kan hngilh cang ko hmang kan ti mi liamcia caan pawl cu, zanlam Ni a liam nan zinglam ah kham kho lo in a hung suak sal ban tuk in, kan thinlung ah a hung suak sal ko. Phaizong an par cang i, chokhlei nih par an i dawmh lengmang cang. Facang an thar phah cang i, fang aat nak ding kan i tim lam cang. Khuaruah har Pathian khuakhan nak sung ah, mah le tikcu le caan te cio hmang in sermi hmuah hmuah nih hmunkhat te ah caan kan hmang cio. Cui sung ah cun nang le kei khal kan i tel ve. Kham kho lo mi thikcu le caan nih cun a kal pi thluahmah i, a tu ah Christmas kan tiang sal deng cang. A liam cia mi kan pi le kan pu pawl kan von zoh sal tik ah, sertu Pathian thei lo in thingpi, lungpi le tlang kip bia in khua an rak sa. Hi pawl nih hin kan sual nak an kan ngeihthiam ko lai ti ah rai an rak thawi, zu le sa thawn. Cu tin cun an nun nak an rak liam. Cu pawl cu caan nih a kal pi theh hnu ah, " Jesuh khrih cu kan sual nak tlanh ding ah vawlei ah a ra" (1 John3:5) ti mi thawngtha ruang ah a tu ah nang le kei Pathian fa/Khrih fa kan si. Cu Khrih fa kan si nak langh ter nak ah Christmas puai kan ti i, December ni 25 hi an kan tlan tu Jesuh suah ni tin kan hman. Ngai ngai ti ah cun Jesuh suah ni hi au hman nih fiangten an thei lo. Kha lam cu va um ko seh la. Khrihfa kan si kan ti hnu ah cun sualnak kan hrial awk a si i, sual sung ah kan um ring ring ding a si lo. Cu sual nak kan ti mi pawl cu kan ral pa satan nih kan thinlung sung ah duhham nak, nahneih nak, mi rem lo nak, vawlei sual tuah duh nak, lungput tha lo, ruahnak tha lo pawl a phun phun in rian a rak tuan mi pawl hi an si. Pathian fa a si poh nih cun cu sual nak cu kan i ralrin thiam a thu pi ngai ngai. Zei ruang ah ti ah cun satan cu a hramthawk te in a rak sual cia mi a si, cu sual nak pawl kan zul i kan tuah ve ring ring ah cun, satan fa kan si ti nak si ko. Pathian fa nih cun sual nak sung ah a um ring ring lo. 1John 3:8b nak ah Khrih a rat nak dan cu khuasia riantuan nak siatsuah ding ah a ra a ti. Cu kan thinlung sung i khuasia riantuan nak ruahnak tha lo lungput tha lo vial te siatsuah ding ah cun Jesuh Khrih kan sawm ve cang lo lai maw? A mah thawn cun zeipoh kan hlawhtling hrimhrim ko lai.

Na cah Jesuh a suak cang - Pastor J. Hme Bik

Mi vialte cah thawngtha (Luke 2.:10, I Timote 2:4)

Pathian lamhruainak thawng in 2013 December kan von phan ruangmang cang lomh a um tuk, na bel te in kum u pa deuh cun a liam cia caan vonruah ah lunglennak, zunngeihnak, ngeihchiatnak phunphun kan nei ko lai. Lengfa tlangval khal nih duh mi uar mi  saduhthah mi tampi thawn duhtlinlo nak ram vawlei si hmanh sehla a rauh hlan ah Khrismas kan hmang cang lai. Seu khat nih  Khrismas hi a tul lo, Nero suah ni asi, siasal biak asi an ti. Khirsmas hi ka cin kaa in a dong tu nih lei thla suah cu an don hrimhrim ti hi ka hmuh mi tam tuk a umcang. Mahbelte thlasuah don ruah ah si lo in Jesuh sunlawinak ih tuah cu Patian duh zawng asi. Ziah Kirstmas hi kan hman ti ahcun kan Bawipa Jesuh a nun ruang ah asi. Mithi ca ah birthday kan tuah dah lo, anung mi Pathian sunloih tu kan si hi mi van tha cu kan si hrimhrim.

Luke 2:10 ah vanmi nih cun “nan thinphang hlah uh nan ca ih ka rat nak cu thawng tha he asi. Cu thawng tha nih cun mi vial te sin ah lunglomh nak atlun ter lai.”

Isaiah 61:1 “Bawipa thlarau nih a ka khah ter sifak mi sin ah thawngtha phorh awk le,lungkuai mi dam ter awk le, sal ih thang mi sin ah luat nak thanh awk le thawng sung um mi sin ah luat nak thanh awk ah a ka thim ih aka thlah.”

Kan Bawipa Jesuh hi thleidannak nei lo dawtnak ih khat mi Pathian asinak hi hi Bible nih alangh ter. Mi sifak kan si maw? Na cah Jesuh asuak cang. Lungkuai mi na si maw? Na cah Jesuh a suak cang. Sal taang mi na si maw? Na cah Jesuh a suak cang. Thawng sung um in nai thei maw? Na cah Jesuh asuak cang. Halelluijah!

Biaknak dang nih cun Krismas hi an sipuaizi cha lawngah an hman. An inn ah cun Mary Christmas tiah an ni tarh na in, Jesuh kong simh hmanh an duh lo. Ka hngaksiat lio ah  Krismas hi nan dong kho maw? Vok sum ziat she nan thah, na i lengkhawm maw? Zaan nan vaar maw? Laksawng na dong maw? Social a nuam bak. Ei le din ka i nuam bak kan ti a tha ve ko na in khakha cu taksa nuamhnak lawng asi. Nuamh nak lawng si lo in lomh nak, daih nak in hmang lo in caan tam pi kan liam ter a poi tuk, Tuukhal.. ban tuk in ram lak kan um hmanh ah, sizung kan um hmanh ah hawi hnen ah kan i nuamh kho lo hmanh ah, mi fim a dawt tluk in a ka dawt ve, mi lian a dawt tluk in a ka dawt ve, laksawng ka co lo hmanh ah Pathian laksawng Jesuh pek ka si ka ca ah Bethlehem ah a suak, harnak phunzakip tuar in vailam ah a thi. Ka cah a tho sal ka cah Pathian hnen ah thla a ka cam sak, mi vantha ngaingai ka si, A hmin thawn nak in thil ti kho nak phunzakip pek ka si.  Mi vantha ngaingai, mi thlasuak ka si ti in lawm ve ding hi vanmi nih hla an sak hnawh mi hi mi vial te hnen ah lunglomhnak a tlun ter lai an ti mi cu asi.

A siartu vial te cungah Pthian thlawsuah tlung ko seh! Amen.

Tha Tha pa,

Tahan