Minung a kan baat ter tu bik hi zei dah an si?
1. Kan sining ah kan lungtling kho lo mi asi!
Pathian nih aa kan pek mi kan muisam kan ii lungsak kho lo tikah lungretheih nak aa kan chuah pi. Kan hawikomh hna bantuk in muidawh si kan duh ii Make-up chah tuk in kan ii thuhbuaih nak ah muithla aa kan lawh ler leh lam...Mi nih aa kan soisel thawng kan theih tik ah kan thin a run, kan lung a fak, kan huat hna ii tlingkhan cung ah met zai kan rel kho ti lo. Mah hna pawl nih a chuahpit mi hna cu kan taksa chung ii thabaat nak lawng te an si dih. Tachunnak ah; dawh duh ah tuah mi Plastic surgery. Mah nih hin kum tlawmpal cah cun miaknak tampi an ngei ko na-in a caan a rauh tikah cun an taksa umtuning ai mah ti lo. An thi a zaa/thak, an ii kheuh nak ah an taksa a rawk dih. Let hnu bik ah an lung a rawk chih. An ii ngeihchih ah cun an paisa le an caan vial te cu mupi bang in vanlai ah an zuang dih cang ai..Curuangah hawidawt, kan sining te ah hin ii lungsak ko uh si! "Ka dum nan, Iang ka ngei" ti thiam uh si law "ka mui a chia nan, ka awkam a thlum" ti kho tu si ii zuam uh si! Mah lawng ah mi nih "a mui in zoh hlah, a aan in ngai" timi lainu/pa kan si kho lai!
2. Rian tamtuk in kan ii khinh mi hi asi!
Laimi cu midawt kan thiam tuk hringhran ii kan innchungkhar, chungkhat unau rualchan hna sifak rethei ii an um lai kan sian hna lo ca-ah kan dangrawl kan phorh tawn hna. An mah cah pei ramdang ka kal cu kan i ti. Ramchung um mi hna nih kan seherhnak theithiam lo in ramdang ah paisa thinghnahro char phun ii a char mi ah aa kan rel maw zeidik...Non-stop in paisa aa kan cah tawn. Kawlram ah thlanhriput in rianṭuan ban tuk te khan ramdang zong ah asi ve. A zual hmanh maw a zual deuh lai. Ram ṭhangcho hna ah cun thlanhriput tiang ngai ii rianṭuan awk cu a um lo na in Air-con tang ah Robot bang in Machine hen bangrep ten rianṭuan a si. Mah tluk har fualmal in kan hlawh mi kan paisa hna in kan hmailei khuasak tintuk nak ca-ah hmanh ii tuaktaan kho lo in kan ngeih um ek kan chung le hna kan kuat dih tik ah hin kan tlinh lo mi tiang rian kan ii khinh tawn. A rauh tik cun kan ti kho ti lo. Kan tlinh ti lo. Mah tik ah cun cuihlan liangluang ii chungkhat unau sin in kan rak theih tawn mi " kan ii lawm tuk" ti kha " Mi zuva" ti ah ai thleng. Kan mah nih mah habit hi kan tuah piak hna ruang ah kan thih hlan lo pehzulh ii tuah awk zong kan rian a si chih. Mi tampi nih kan ruat tawn lo mi cu;...kan mah nih bulpak in business kan ngeih khawh ding khop in fimthiamnak kan ngei lo, kut thiam mi rian kan ngei lo...mi sin ah hlawhfa ii rianṭuan peng mi kan si ca-ah ralrin lo pin kan rian dih sual seh law kawlram lei kan chung le nih aa kan bawm kho ve te hnga maw? An kan kuat kho vete hnga maw? Naisai...kawlram sining cu kan zapi theih cia bang a si ko. Kan mah te hmanh kan kecung ii kan dir khawh hlan chung hi cu kan tikho zat lawng in tlawmngai uh si law kan thabaat a dem ngai ko lai. Ramdang um mi pawl ii kan ruat tawn lo mi cu; kawlram kan um lio ii kan sifak kan retheih kan philh tawn, sumsaw nguhdeih kan ngeih lo ruang ah fimthiamnak tlamtling hmanh in kan rak cawng kho hna lo. Kan sifak kan retheih lio ah paisa coih tu hmanh kan rak tong cio lo. Mah hna hi kan saya ah kan ii hman awk an si ii kan nau le, kan fa le, kan tu le cung ah kan rak ngeih bal mi feeling kha an ngeih ve lo awk ah kan bomh hna awk an si. Kan ii cit mi mawtawcar ii a brand ai zuam ding kan si lo. BMW ngei ko na in a bill pek dan a thiam lo tu hna kan si sual maw? BMW a si ruangah cak deuh in kan mawngh kho hlei ttung lo. Mawtawcar ttha ngeih kho cu a ho paoh nih kan duh mi a si ko. Sihmanhsehlaw kan tlinh lo tuk mi thil le kan mah hen ai tlak lo tuk mi thil cu ngeih i tim hlah uh si law kan lungretheih a dem deuh lai. Kan ii tlaih mi phone ii a brand ai zuam ding kan si lo. Kan sinh fenh brand ai zuam ding kan si lo. Thil man sangsang ii hruh, hman khawh ko ṭtung ah cun 'nang hnak in kei ka ngei deuh' ti ii zuam duh nak lungthin bite hna cu kan ngeih awk a si lo. Kan hman mi thilri hen an ii tlak lo. Thil ṭtha kan hman ah cun kan lungput zong a ṭthat ve awk asi. Dawtnak le zawnruahnak lungthin kan ngeih ve awk asi. Mah lawng ah Minung aa kan baat ter tu bik pawl lak in pakhat cu fawi tuk in kan tei khawh lai!
3. Zeipoah ah Hruaitu si kan duh mi hi asi!
Mi rang pawl nih cun "If you can't beat them, join them" an ti. Mah idiom te hi kan mah laimi sin zong ah um ve sehlaw kan thabaat a dem ngai ko hnga. A ruang cu laimi a tam deuh hi ka zoh hna tik ah kan um nak hmun paoh ah hruaitu si kan duh. Kan duh ning aa kan zul lo tu paoh cu kan huat hna ii kutlaih tṭi ding ah kan sawm duh hna lo. Kan angki zaal chung ii paisa thongkhat ca cu pakhat le pakhat kan ii thleng lai ii kan ngeih cia te kan ngah ṭhan ko lai. Sihmanhsehlaw kan thluak chung ii a um mi ruahnak kan ii thlen tik ah cun ruahnak pahnih kan ram dawhnak a chuah pi lai. Hruaitu ṭtha si kan duh ah cun zultu ṭtha kan si hmasat awk asi. Zeipaoh nih hramthawhnak an ngei dih. Thingfa keuh cin na duh ah cun a ci na erh ta a hau. Cu hnu ah cun a hong keuh lai ii na dum chung ah na phun lai. Hitin a herh ning in ti le dawm na pek hnu ah a hong ṭthang lai ii na dum dawh ter tu thingkungmawi ah a hong chuak lai. Curuang ah minung aa kan baat ter tu bik, nahchuahnak, rualrem lo nak, mi zeirel lo nak le mi hen ngeihchiah ii zuam duh nak te hna chung in luat na duh ah cun; ruahnak, sumsaw le thazaang in na tei khawh hna lo mi hruaitu hna hen kut tlaih awk ah na thawh rit ti hlah!
Toidornak lungthin hen kan umnak, kan phanhnak, kan ton mi le kan hmuh mi pawl chung in a kil kip in fimnak ai lak kho tu lainu/pa kan si dih nak lai ruahchannak tampi hen ka rak ṭtial mi asi.
A rel tu nan dih lak cung ah lomh nak tampi ka ngei!