Camibuai Ong Pawl Hnenah Thucah
Tuikum 2018-2019 cazir kum ah phunhra a ongtu pawl siseh, ong kho ding in cazirhtu pawl siseh, sumpai le thlacamnak thawn a bawmtu nulepa, ulenau pawl vialte siseh nan zaten ka thinlung takten kan lungawi pit taktak hni. Hmailamcaan ih nan fimthiamnak lamtluan ah hihnak ih uak le sang mi hlawhtlinnak hmu sin vima hram ko uh tiah khal duhsaknak kan hlan hni asi. Phun hra ka on ahcun a za cang timi lungput nei hrimhrim hlah uh! Phun hra nan on cu hmailamcaan nan nuntu khuasaknak ding cah innka tampi lak in a hmaisabik nan on kho bantuk asi. Innka on ding tampi a um hrih. Kan khua kan ram fimthiamnak thawn kan tundin a hau. Cui fimthiamnak cu pehzulh ih kan zir vima lawngah kan ngah kho ding mi asi. Nulepa khal nih kan fa le hihnak in tlawng sangsang an kai kho ih degree sangsang an ngah kho sin vima nak dingah thazaang le ruahnak pe uhsila sumpai khal in bawmsan hrih ko uhsi! Kan ram a tthanso ter kho tu ding le kan ram a thleng kho tu ding cu hi kan fa le pawl hi an si.
Camibuai Sung Pawl Hnenah Thucah
Tuikum 2018-2019 cazir kum ah ca fakpin nan ii zuam ko lai nan a ong kho ve lo pawl siseh, cazirhtu pawl siseh, sum le pai tampi ek heu tu nulepa pawl vialte siseh nan ngeihsiatnak kai hrawm ve asi. Atui tan ih camibuai ong mi cazin ah nan hmin ai tel lo ruangah ningzak le beidong in um hrimhrim hlah uh! Hmaikum ah hihnak in zuam kho nak caan ttha nan nei hrih. Mi seukhat cu nulepa nih fialsom ih tlawngkai nan si kho men. Mi seukhat cu mah nih tlawngkai a duh ngaingai mi nan si kho men. Mi seukhat cu a phung men ih phun hra tian sawhsawh duh mi nan si kho men. A zei khal va sisehla tlawngkai le cazir timi hi zapi zate cah asi lo timi cu kan theih ah a ttha. Singapore ih tlawng sayakyi nih a sim mi cu mi hlawhtling mi si dingah kan zir mi subject zaten hmat ttha kan ngah dih thengtheng a hau lo ih kan mai pahrang le kan pawcawmnak ding thawn ai pehpar mi subject ah a thiam mi kan si ding a thupi deuh a ti. Phundang in sim ahcun sibawi a ttuan te ding mi tlawngta cah music subject ah a hmat a tthat thengtheng a hau lo ati duh nak asi. Vuleicung mifim tampi lakah pakhat asi ve mi Albert Einstein nih ati mi cu nga pakhat ih a thil ti kho nak khi thingkung cung a kai dan in tah ai tum ahcun a san sung cui rian cu aat rian asi a ti lai ih a tuah kho dah fawn lo lai. Cubantuk in phun hra on le tlawngkai khal hi zapi cah asi lo ih phun hra ong lo khal in milian le hminthang tampi an suak kho thotho. Cuti ka ti tikah fimthiamnak le zirsang ka zohniam ruangah asi hrimhrim lo. Thluak nih ca a duh bak lo mi le ca a thiam kho bak lo mi cu pumpi hnek in hnek ding asilo ih cui hnak in kut thiam pakhatkhat zir in sumsaw a hlawh silen a tthanso a rang deuh hoi lai.
Thunetnak
Camibuai a ongtu kan si ah siseh, a sungtu kan si ah siseh Pathian lamhruainak thawng in kum khat sung ih kan zonzainak le kan teirialnak theipar cu kan hmuh cang. Tui kan hmuh mi hlawhtlinnak le sunghnak hi kan nunlamtluan ah fim an kan zirh tu le an kan remhtuahtu si ter kho ii zuam uhsi! A ongtu nih Pathian hnenah le camibuai ong kho ding in ca an in zirhtu le tlawng an in retu pawl hnenah lungawi thu sim hngilh hrimhrim hlah uh! A sungtu khal nih Pathian hnenah vuihram lo ten lungawi thu sim kho tu si ii zuam hram uh! Pathian nih a mi le fa cah a tthabik in khua a khaan ringring asi timi hngilh hram lo ten kan hmuhtonmi thil zei poh ah a cohlan zia thiam ii zuam uhsi!