Ka duhdawtmi ka miphunpi ka uu le ka nau tla ral lo kap pawl kan do nak ah kan bang tuk hai cio thlang ding ti cu sut ttul lo in ruahdamh thei cia mi asi. Mihrek in huaisen tak in thazaang thawn ralttha zet in kan do. Mihrek in siangzet in sumpai thawn kan do. Mihrek in thinlung tak ten thlacamnak thawn kan do. Mihrek in a nem zawng ih cangannak in le thusimnak in kan do. Kan do mi ral cu a bang awk ko nan kan do dan cu an dang awk cio. Kan hmuitinh mi cu nehnak thantar le zalennak asi.
Kan raldonak lamzin tluan ah mihrek cu a rilbah mi le a tluk mi tla an um. Mihrek silen cuu lo cing in pangpar bang leipar ah an ttil tuan nasa. Hrekkhat cu ziangtik hmanh ah innsaang an kim thei nawn lo ding. Mihrek cu kiangkap boruak ruangah dungsip mi tla an um. Mihrek cu hliamhma tuar in kumkhua kutke kimlo mi banglo dinhmun an thleng. Mihrek cu nunhimnak ruah ah ram leng le hmun dang ah a tlan tu le a relh tu tla an um. Mihrek cu hnattuan ding a um lo tikah in ei harsa in an um. Kan lamzintluan kan zoh cio asilen zohmanh a harsa lo le a bang lo kan um lo. Kan zaten kan bang thluh thlang. Kan zaten kan harsa thluh thlang. Kan bang rualrual le kan harsa rualrual in kan cawl thlang ding tin thinnau ding asi hrimhrim lo. Kan neh cuahco zo. Zalennak nitleumawi kan hmu zikte thlang. Nehnak thantar kan phun zikte thlang. Hnget zet le cak zet in a net tiang do hrih ko uhsi!
Ram leng um pawl in kan rak aukio rero ko nan a ngaingai ih thinna lungkuai sawn tu cu ram sung um pawl nan si. Nitin nan tuar mi, nan hmuhton mi, le nan thinbangnak pawl cu kan lo zoh nak men in nanmah vek in vicarious trauma kan nei thluh ve asi. Trauma ciocio ah tla upa hnu ih ngah mi trauma le nauhak lai ih ngah mi trauma tin phun hnih in a um. Kannih upa hrangahcun nehnak thantar kan phun ni ah kan trauma an hlo thei men nan atu’i kan fanau pawl ih tuar mi trauma cu an san sung a daih hai ding asi. Ziangtluk riahsia le ninghang za so asi. Kan tesin fapar san tiang ruat hrimhrim ih kan do a ttul mi ral lo kap an si zia hi kam kiangkap kan zohnak in tampi kan fiang sinsin thlang ko ding. An hram in kan phawi ih an ci kan hmit rori a ttul asi.
Ziangtluk a rei ding ti kan thei lo ruangah pakhat le pakhat thazaang pek awk tonh uhsila bawm awk tonh uhsi! Kanmah thawn a nai awk bik innsaang, sungkhat unau, khuapi unau, rualpi, kawhhran pi, hnattuan pi le kan hmel thei mi harsa deuh pawl kha kanmah le kan ti thei nak zawn cio in kut za samh in bawm hai cio uhsi! Cutin kan bawm awk hai tonh asilen hi kan do mi ral hi kan neh tengteng ding ih cutikah kan di a riam tuk leh ding asi. Ram leng um pawl in ram sung um pawl ral kan dopi thei dan phun khat khal asi fawn. Phone bill tivek top up sak nak in simaw, paisa malte ciar kuat nak in simaw, pawlkomh dinh mi tete ah sumpai thawn ttanpinak in simaw, tin thla kan cam leng ah, ca kan ngan ih thu kan sim lengah a hlei in dopi hai uhsi! Keimah khal nih ka tuah thei mi le ka tuah rero mi thawn ttan kan lak cio pei uh tiah ram le miphun duhdawtnak thawn ka lo sawm hai asi. Ram sung um pawl khal nan ruah vek le na ttul vek in ram leng um pawl in kan lo ttanpi/bawm thei lo asi pang hmanh ah nan thanau in nan riahsia hrimhrim hlah uh! Kan ti thei tawk in kan lo bawm cio ko timi te kha in rak theih hngilh sak hram hlah uh!
Kan neh hrimhrim ding! Kan neh rero zo.