Zinghmuh Tlang in Khua Ka Cuan (III) - Cung Thawng Lian

Chinram dinhmun zoh tikah riahsia za a si. Kanmah ram in mipi kan cawm-aw thei lo. Chinram cu tlang ram a si vekin milai pumcawmnak hrangah hmun ttha a har. Cu lawng si loin kan thiamnak hrimhrim in a ban lo ruangah ram dang thil kuat ding cu sim lo, kanmah ei khop hman kan hawlsuak thei hrih lo. Nitin kan ei-in hrampi a simi buhfai (fang) hrimhrim cu kan ram sungin kan ring-aw(to-delh) thei lo lawlaw. Thlanglam Chinram kan unaupawl dinhmun cu kan thei ban lo nan saklam Chinram kan dinhmun cu tawkfang hmuh thei le ruah thei a si. Saklam Chinram ah khawpi 5 kan nei. Hi khawpi 5 ah milu ting 2 lenglo cu kan um ko ding. Nitin kan ei-in hmuahhmuah sungah zatek 70 hrawng cu Lairawn (Kalay valley) in rak somi an si. Curuangah Lairawn hi saklam Chinram ih kan hrampi (kan suttung) rori a si kan ti thei. Lairawn thilri um loin a ding thei lo ti tluk a si. Curuangah Lairawn thupit zia kan zoh/ruat khawm ta ding. Lairawn hi Chinram cu a rak si dah nan tu ahcun Sagaing ramtthen sungah a ummi Burma ram ah an luhter. Asinan Chinmi umnak hmun a si ruangah Chinram ah kan ruat lawk pei. Lairawn cu saklam Chinram cawmtu a si kan ti zo kha. Lairawn ih a suakmi ei-in tampi hi saklam Chinram ah nitin phurso a si ringring. A tambik in buhfai (fang) an phur bik. Lairawn ih fang um hlah sehla Mizoram le Mandalay lam in luhpi kan ttul ding. Nitin kan ei-in hrampi a simi fang hi ziangvek san kan va thlen hman ah thleng thei ding thil a si lo. Kan hman ringring dingmi a si. Curuangah tu in kan ruah cia ih kan timlam cia a ttul.

Hakha khualipi lawngih an phurso mi fang hman hi a tam nasa. Tedim, Tonzang, Falam le Thantlang tiang Lairawn fang kan ei thluh. Cutluk ih kan hman mi fang suahnak Lairawn cu tulai ah innhmun ah an zuar ciamco ih leikuang a mal vivo ti a si. Tu dinhmun in a feh vivo a si ahcun hi hnu kum 10 hrawngah fang suak a mal vivo ding. Lairawn in saklam Chinram ah fang a kuat lo a si ahcun hmunhla pi in luhpi a ttul ding ruangah mipi kan harsa deuh ko ding. Lairawn mipi in kan ruah a ttul thlangmi cu Chinram in cawmtu cu Lairawn hi a si timi lungput neih a ttul thlang. Lairawn ih a ummi unau khalin kan Lai ruahnak le Lai thluak te in si nawn loin santhar thiamnak le theihnak thawn fang cing sehla duh a um nasa. Lairawn ah fang tthattha suah thei sehla, a cang thei a si ahcun cozah bomnak hman in fang cindan khal zir rero sehla a ttha ding. Kawlram cozah pi khalin Vietnam ram ih mithiam ko in Nahpyidaw ah fang an cing rero. Chinmi sungih miliam kan neih mi pawl khal mipi hrangah ruat in fang cindan hliakhlainak pawlkom hman din in kan Chinram rori hrangah tiah hnattuan thok hai sehla a ttha zet nan. Thildang ei-in tampi khal Lairawn ih ta hman a si. Mandalay in Hakha-Thantlang ih an luhpi ringring mi nga hman hi Tahan in tampi luhter thei sehla duh a um nasa. Mandalay in Hakha khua sungih nikhat a lutmi nga hman hi a mal lo. Chinram ih kan ttulmi hmuahhmuah hi Lairawn ah hman cawk loin suah thei tum vivo ding a si. A fate bik in a tum bik tiang suah thei dingin tumtah ding. Ramdang feh ding lawnglawng ruat loin Lairawn in a ttha bikmi ei-in le thilri dangdang suah thei dingin lam hawl ciamco ding a si thlang.

Chinmi tampi kan lungput cu ramdang ka feh dingih tangka ka hlawh ding ti hi a si bik. Cu hnakin kan ram sungin ramdang tiang kuat thei dingin kan ram ah ziang hna ka ttuan ding ti hi hawl sawn ding a si thlang. Kan thinlung kha ram dang ah kan ret ringring a si ahcun kan ram tthanso a fum tuk ding. Chinram in hmun ttha zet kan neih mi Lairawn hi hmang thiam in Chinram hrang rori ah ttan lak ding a si. Ram dang feh hi a ttha zet ko nan kan ram remtthatnak dingah a harsa zet ding. Ram dinsalnak ah fimthiamnak a thupi zet. Chinmi in tangka tampi nei hman usihla fimthiamnak kan neih lo a si ahcun ramdang mi san ciamco a ttul ding. Kan ram remtthatu ding ahcun kan ram mi rori si sehla duh a um nasa. Kan ram kan duhdawt ngaingai asile mi hrangah kan fimthiamnak va hmang ciamco loin kan suahnak hmun ciar ah kan fimthiamnak hmang sehla hi hnu kum 20/30 ahcun kan ram a ttha hrimhrim ko ding. Cuti si loin tulai vekih thiamnak sang zetzet tiang zir ih mai khua le ram ah hmannak a um lo tiah hmundang pan in kan vaak rero lai a si ahcun ram tthanso cu rel lo, dung ah kan taang ringring ko ding. Chinmi sungin cinthlaknak lam ah thiamsang kan neih a ttul thlang. Chinram ih hrampi cu Lairawn a si. Chinram in cawmtu kan nu Lairawn dam ringring hram seh.