Tuisun ah na tuah kho mi thaisun tiang hngak hlah!

Kan hawitha nih simaw, kan riantuan pimi nih simaw, kan cungah palhnak a tuah tu pawl nih ngeihthiam an kan deih tikah va ngeihthiam kho lo ding khop in au seh kan si ti hi kan i ruat dah maw? Tuisun ah sim cawk lo rel cawk lo pakhat le pakhat an i ngeihthiam kho lo ruangah ai hua, ai that, ai nawn, thawng ai thla mi le a dangdang simrel ngam lo khop in i dohdalnak pawl nitin suntin zaantin kan hmuh kan theih. Unau, kan palhnak le kan mawhnak an kan ngeihthiamtu Jesuh Khrih zumtu kan si kan ti ko lio ah kan milai hawipi ngeihthiam kho lo in kan um pang maw? Micung i kan aithawhnak ruangah le kan lung an kan ton lo ruangah tuisun ni ah an cah i thiltha kan tuah kho ko mi tuah duh lo in kan hngak ter hni pang maw? Kan mai khul hnuam nak ruangah kan minung hawi pi zeitluk in an sungral i an innsungkhar ah buaibainak a suak pit ti kan ruat sak ban maw? Ngeihthiamnak le tuisun kan ti kho mi rian a caan te i kan tuah ding a thupit zia kan Bible sungah tampi kan hmuh (Luke 13:10-17). Culawng hmanh silo in Abraham Lincoln khal nih “tuisun i na theh kho mi rian kha thaisun tiang va hngak hlah” tiah fakpin a mipi American pawl a cah hni. Bible ca tampi siar pawl nih cun Judah pawl i an Sabbath ni an upat zia le an ulh daan nan theih ko lai. Fiangfai deuh i a thei lo kan um pangah, Judah pawl cun Sabbath ni ah riantuan, mifak damter, thil cawk/zuar…tbk tipawl hi a zarh i au hmanh nih an tuah dah lo mi an si. Asinan, Jesuh nih cun hi Sabbath ni theng te ah mifak a dam ter hni. Aruang cu a dam ter mi mifak pawl kha a cui sun thengte ah damnak a pek kho hni ti fiang tuk in a theih ruangah asi. Judah miphun le kohran upa pawl nih sual an phawt tikah a ti hni mi cu, “Sabbath ni i vunzimtan cu sual in nan hmu lo i, Sabbath ni theng te i damnak a tul tu mifak ka dam ter mi cu sual uakpi in nan hmuh” ati hni. Kum hlei hnih sung thi a dok i a fak mi nu nih cun Jesuh puanzim te tel ka dai kho ah cun ka dam hrimhrim lai ti ruahsannak a nei i cui a ruahsannak nih cun damnak a pek ngaingai. Hi minu hi a minung hawipi pawl i zei rel lo mi, relsiat mi, komh ngeih duh lo mi, minung cazin hmanh i ret duh lo mi asi men ko lai. Asinan, kan bawipa Jesuh nih cun hi Sabbath ni thengte ah a dam ter. Jesuh nih hi ni thengte i a dam ter nak hi aruang tampi a um kho mi asi. Tahthimhnak ah, “minu, na minung hawipi nih cun zei ah an in rel lo in poi an in sa lo nan an sersiam tu Pathian nih na dam lo nak le na tuar nak an theihsak i poi an sat ruangah tuisun ni ah na dam cang” tin asi lo ah, “minu, Pathian siar lo nih an in dam ter kho lo ti na theih ruangah le na zumh ruangah dam ter na si cang” tin asi lo ah, “minu, kumpi kum hlei hnih sung na thi a dok i dam lo in le hawi hnen i pawl ngam lo in na umnak sung in tuisun ni thengte ah dam ter na si cang” tin a phunphun in a ruangah kan hawl kho ko lai. Hizawn ah cui a ruang pawl vialte hnak in athupi deuh mi cu Jesuh nih khan khai minu kha thaisun a hngak ter lo. Hmaizarh khal a hngak ter lo i hmaithla khal a hngak ter lo mi kha asi. Unau, kan bawipa Jesuh khrih hmanh nih mifak dam ter dingah a thawh a rit lo mi kha ziah nang le kei nih tuisun ni i micungah thiltha kan tuah kho ko tiah kan theih rori mi tuah duh hrim lo in kan um? Kan lung kan i thumh i toidornak lungthin kan neih a cu cang lo maw? Duhdawtmi kan pa, kan nu, kan u, kan nau pawl cu thawngvangtha thei manh lo in mual an liam. An lungthinsung ah a tang i mual an i liam pi. An kal tak mi an innsungkhar pawl cu kan lung a rong fak i liamcia caan khirh sal kan duh dukmak. Zei saan a tlai nawn ta lo. Sumpai fangkhat fanghnih te ruangah sungkhat unau ral bang in kan um, mihringpi le theih hngalh lo bang in kan um. Khurkhua fak pin kan ruat i kan dung kan hmai kan zoh caan a cu cang. Pakhat le pakhat i entei caan asi nawn lo. Pakhat le pakhat i namneh caan asi nawn lo. Pakhat le pakhat i tihrim caan asi nawn lo. Tuisun ni ah mi lung a awi ter kho tu cu nangmah lawng na si. Thaisun ni tiang na hngak ter pangah cun siaherh bu in mual ai liam pi pang lai. Mithi cia ngeihthiam daih awk an tha nawn lo. Na awkam ngai ding khal ah an ra kir sal nawn lo lai. Remhnak caan na nei hrih.