Zokhal Khrifa asi mi nih cun Christmas hi ziang asi ih zo pawl in an lawm ti kan thei thluh ko ding. Sihmanh sehla, Christmas thawn kan pehpar awk nak, Christmas ih a sul lam le Christmas kan hmang dan ciar cu a dang awk thluh ko ding. Christmas cu na hrangah ziang asi ih midang hrangah teh ziang asi ding ah na zum? Christmas ti kaa ih sim rero tu lawng maw kan si a nunpi tu teh kan si cih maw? Christmas timi hi ttonglettu pawl in a phunphun in an let ko ding nan a sullam le a tiduhsan mi cu a bang awk thluh ko ding. Judah daan ah cun nunau kum hleihnih le mipa kum hleithum an si in upa cazin ah ret an si. Kum hizat an kim lawngah nupi pasal nei an cu ti asi. Kum hizat an kim tikah nupi pasal ih hnattuan pawl le an dinhmun pawl zirhnak an nei. Fala thianghlim Mary kan zoh silen fala note asi. A kum ciah hi sim theih a si lo nan kum hleithum hrawng asi ding tiah zumh asi. Joseph thawn nei aw ding in a ham awk cia mi an si. Thlatang khuasik zaan ah vancungmi in Mary cu thlarau thianghlim nau a pai ding thu le cui naute cu leilungtlunpi rundamtu asi ding thu an sim tikah a rak el lo. Ka tling lo a ti lo. Ka fimnak nih a deih lo a ti lo. Hamtu nei cia mi ka si a ti lo. Milian le mithmai ttha nei tla ka si lo ati lo. Nau nei dan le fingkhawi dan tla ka thiam lo a ti lo. Fala thianghlim ih naupai ding cu a mualpho thlak tuk ti a thei ko nan a ttih lo. Zianghmuah ti thei tu Pathian ah a tthum awk ih lungawi sopar ten Pathian vancung mi Gabriel ih thu a ngai. Unau, Pathian nih kan kil thei lo khop in thlasuah in pek lo ih kan mualpho nak ding khal ah thlasuah in pek lo asi. Kan hrang ih thlasuah in pek mi hmuahhmuah hi amah sunlawinak ding ah an si. Cutin in pek mi thlasuah cu ziangtin kan hmang ih midang hnen ah teh ziangtin kan hlawm timi zoh in zumtu pitling kan si le si lo mi in in thei thei asi.
Asilen Christmas thawn
kan pehpar awk dan hi kan fiang awk maw kan zoh tlang hnik pek. Laimi tamsawn
cu Khrifa innsungsaang ihsin a tthanglian mi kan si tikah kan mah nih kan zum
ngaingai maw zum ngaingai lo ti hnak in kan nu le kan pa, kan pi le kan pu nih
an rak tuah cia mi kan ttawm pi hai ih cutin kum khat hnu kum khat kan tuah ve
rero. Laimi pawl ih Christmas kan hmang dan cu December ni kul hluan nga khi
kan hmang tlangpi. Ni kul hluan li zaan ah zaan meng in lengkhawm nak kan nei
ttheu. Mi hrekkhat lala cun ni kul hluan li zaan ah Santa Claus in laksawng an
dil mi hmuahhmuah an it lai ah a rak keng ding ih an innsung ih an ret mi
Christmas kung hnuai ah a rak ret ding tin ruahsannak an nei. Phundang in kan
sim silen Christmas hi laksawng pek awk le laksawng ngah nak caan ah ruat in a
pehpar awk mi kan rak si hai. Christmas ih a sullam kan zoh sal asilen “Pathian
in leilungtlun a duhdawt zet ruangah a fapa neih sun a pek” Johan 3:16.
Laksawng lak ih a sunglawi bik mi le a tum bik mi laksawng in pek. Cuvek in kan
nih khal in kan duh dawtmi pawl hnen ah laksawng peknak in kan duhdawtnak kan
lang ter ve. Christmas ih a sul lam cu peknak caan le pek mi parah lungawi in
kan lawm caan hi a si bik ko.
Himi pek awk nak caan
le pek mi pawl in lungawi thu an sim lai ah nang teh zo hnen ah ziangvek
laksawng na pek ih zo in laksawng an lo pek ve? Mi ttha le mi tluangtlam pawl
hi Christmas caan ah a thei ol bik ding tin ka ruat. Ziangah tilen duhdawttu
tampi nei pawl cu laksawng tampi an ngah ih duhdawttu nei lem lo tu pawl cu
laksawng siar ding khal an nei cuca lo. Cuvek pawl ih nunram kan zoh tikah an
mah khal laksawng pek a hmang lo mi pawl an si tin kan sim thei. Zo pawl si
laksawng kan pek ding? Pathian nih in duhsak mi cu nuhmei farah le cawmtu nei
lo tar pawl laksawng kan pek ding in duhsak. Culawng hmanh si lo in thawngtla
pawl le sualralnak ram ih a tlongleng tu pawl hnen ah lungawinak thuthang kan
sim ding in duh sak. Asilen, thusim ka thiam lo, laksawng pek ding ka nei lo,
laksawng lei nak ka nei lo tin kan um men pang maw? Laksawng kan ti tikah kan
hmuh thei mi le kan tham thei mi thilri lawng khi laksawng asi lo. Mit ih hmuh
thei lo mi, kut ih tham thei lo mi, ka ih ei thei lo mi laksawng ttongkam mawi
kan nei kha hngilh hlah uh si! Sumpai cem in laksawng pek ding kan nei lo lai
khal ah paisa ih lei thei lo mi duhdawtnak kan nei. Cumi duhdawtnak kan nei mi
te cu zo hnen ah ziangtin kan hlawm ve pei? Kan dung kan hmai zoh in le kan
kiang kan kap zoh in a rilbah mi pawl hlawm uh sila a ttawnttai mi pawl bawm uh
si! Dam lo in sizung ah a um mi pawl hrangah le thawngtlak pawl hrangah kan um
hmun ten thlacam sak uh si! Pathian hnattuan tu pawl le kohran upa pawl hrangah
thlacam uh si! Kan ram uk tu le ca in zirh tu pawl hrangah thlacam uh si! In
duhdawt tu kan innsungsaang hrangah thlacam uh si! Kan khua kan ram le kan
miphun hrangah thlacam uh si!
Kan mithmai hnisiamsi
ten um uh sila in hmu tu pawl in Pathian zumtu kan si zia thei hai seh! Mi in
na dam maw ti sut hmaisa mi si lo in kan mah sawn in na dam maw ti ih mi a va
sut hmaisa tu si zuam uh si! Sualpalh nak kan tuah tikah ngaithiam dil ding ah
kan phur rit hlah uh si! Kan kiangkap um mi hmuahhmuah hi Pathian ih sersiam mi
an si ti thei cing in ttihzah upatnak thawn biak thei ringring zuam uh si! Laksawng pek ding ka nei lo, laksawng pek tu
khal ka nei lo, laksawng pek ding mi khal ka thei lo tin um men tu si lo in
tuini ah zo tel ka lungawi ter thei mi an um maw, zo tel ka thlacamnak a ttul
tu an um maw tin bawm duh nak thinlung thawn kan nitin caan kan hmang ding
Bawipa in in duhsak asi.
Casiartu nan zate parah
Christmas lungawinak le hnangam deihnak um hram seh!
