Thlisia Cyclone Komen le Laimi kan dinhmun - Mai Esther Dimte (HLD)

            Minung kan si vek in kan hmuhton mi thil tinkim ruangah puhmawh nak kan nei ttheu. A tui tan ah nasa zet ih a hraang mi thlisia Cyclone Komen khal “kan sual tuk ruangah Pathian in nun in sim nak a si” ti tu an um vek in “kan sual tuk ti kan theih awk lo ruangah Pathian in ralrinnak in pek a si” a ti tu khal an tam zet ve. Laimi hi kan mipum zatek 92/100 hi cu Khrifa kan si kan ti awk ko nan kan hmuhton mi thil ziangkim ah “Pathian khuakhaan cia mi a kim a si” ti a pom thei ngaingai tu cu kan mal nasa. Laimi khrifa kan sinak kum 116 a kim zo nan kan zumhnak cu hmaisabik khrifa rak si tu kan pi le pu pawl kan tluk lo lawlaw a si. An nih cu an zumh nak ruangah thih tla an rak ngamh ih an nunnak tla an rak pek ve tho. Sihmanhsehla tuisun ni ah zumtu tampi cu kan zumhnak ruangah thih cu kan ngamh lo ih thih ngamh ding tiang ngai khal in kan rampi le kan cozah pi nih in singkhaw (challenge) hrih lo ti sehla tamtuk in ka palh ding ah ka zum lo.

Tuisun ni ah laimi pawl leilungtlun ram cangkaang le ram tthangso an tinak ram tinkim ah kan um thluh tluk a si thlang. Ziangtin kan thleng ih ziangruangah hitin zalen zet in mi ram ah kan um thei ti cu sim rero ttul lo in kan thei thluh cio ko ding. Hivek dinhmun ah thleng thei ding in thuphan ttihnung rapthlak zetzet pawl phuahcop tahrat ih thusutnak (interview) tuah tikah mai nu le pa hmin hmanh cing nawn lo tampi kan um si lo maw? Ralkap ih hrem mi, thawi mi le sualpi mi ngaingai tla cu tampi an um ko nan a tamsawn raltlaan an sinak thuanthu cu thuphan hlir a si. Raltlaan dang pawl cu an ram ah ralpi a dai thei lo ruangah, an ram a farah tuk ih ei ding a suak lo ruangah, an ram ah umnak ttha lo khop in leilung a siat ruangah, an ram ah an Pathian zalen zet in an biak thei lo ruangah tin a phunphun in raltlaansinak ih tahfung an tling ko. Sihmanhsehla kan nih laimi cu cui tahfung a tling tu hnak in a tling lo tu kan tam sawn. Tuisun ih kan lairam/rawn ih thil cang mi kan zoh sal tikah ram dang feh duh rori ih kan rak phuahcop mi thuanthu pawl an kim/cang ngaingai si pei maw ti ding khop in a um. Ram lian le ram cangkaang ah kan thlen tikah an fimnak, an thiamnak le an theihnak pawl kan zir ih an mah ram mi vek in duhtawk in kan nungcang thei. An mah ram mi sinak co tu khal kan tampi thlang. Hitikah Pathian in kan thuanthu kan hngilh ding ih amah kan dungtunh pang ding ti a phan ruangah a tu ah minung nunnak tampi lak siang lo ten kan zapi ten kan tuar thei fangfang ding in nikhuasia, ruahpitak le leimin, tilian pawl thawn in kawh nak a si pei maw tin ka ruat nasa. Sihmanhsehla, ka thuruatnak hmanh a cem hlan ah Pathian ih khuakhaan cia mi pawl pakhat hnu pakhat a sangsang ten an kim vivo a si ti ka fiang awk.

Atui kan ton mi harsatnak in ziangmi si in zirh ti ah cun Pathian cun a fa le nih kan tuar thei lo ding khop in harsatnak le hniksaknak in pek lo timi a si. Zumtu mi piangthar hrangahcun hiti ih ruat in thinlungah hnangam deih nak neih a olsam zet ko ding nan zum dok zum dok lo mi laklawh pawl hrangah cun a har nasa ding. Hi thlisia le ruahpi ruangah harsatnak a tong tu pawl hin sumpai lam in, ei le in lam in, hni le puan lam in tin a phunphun in bomhnak cu mi tinkim hnen in an dong ding ih caan malte rei ahcun an mah kel ah an hong suak sal leh ko ding. Himi ah bomhnak pek tu pawl nih ralring dingah a thupi zet mi cu zo, ziangzat, ziangah kan bawm timi cazin felfai ten nei in le bawm a ttul ngaingai mi lawng bawm ding hi a si. Cutin felfai ten hnattuan lo tu pawl cu harsatnak tongtu mipi pawl hnen in lungawi lo nak le ttongkam mawi lo pawl an tong a si. Harsatnak tong tu pawl khal in an inn le lo pawl amah vek cekci in an ngah sal tengteng lo men ding nan ngah thei sal ding in an mah ten khal an bawm awk le hna an ttuan ve a ttul ti an theih ding hi a thupi zet ve a si. Ngah mi bomhnak cu a tum/fate, a tam/mal ti lo in lungawi thu sim nak nun an nei lawngah bawmtu le bawmmi an pahnih ten an lungawi thei ding a si.

Hivek harsatnak kan ton caan ah zohmanh in kan neih mi sumpai, inn le lo, hni le puan, sui le ngun cu thlanmual ah kan keng awk thei lo ti kan fiang sinsin ding ka zum. Tidai ih phum ding ttih ah le leimin ih khuh ding phang ah a suk a so ah kan tlaan ih beunak kan hawl lai caan ah kan kut lawng in maw kan tlaan? A si lo len ziang thil so kan kut in kan keng phah? Mi hrekkhat in an fa te an puak, an cawi, an liang par ah to ter tahrat in an tlan pi. Mi hrekkhat in an uite le an zawhte an tlan pi. Mi hrekkhat in an hnipuan bag an tlaan pi. Mi hrekkhat in an puan an tlaan pi. Nang teh ziang si na tlaan pi ve? Kan tlaan pi mi thil le ri in kan nunnak in humhim thei lo zia cu tilian parah kan thlak lawng ah kan nunnak a luat ding ti kan theih hnu lawngah kan fiang si lo maw? Pathian siar lo in run thei tu an um lo ti kha thihnak thawn second pakhat hla ih kan din lai ah kan fiang sinsin si lo maw?

            Thlisia hrang le tilet tho lak khal ah ih hmuh thaw ten it thei ding in harhdamnak in pek. Tilian le lei min lakah kan nunnak a liam ter thei mi a si ko nan in humhim. Kan Pathian in kan hrangah duhsakmi a nei ti cu a fiang tuk. Kan sualnak hmuahhmuah sir aw in kan tuah cia mi vek sualnak kan tuah sal nawn lo nak dingah thlacam uh si! Mi ngaidam thei tu Pathian in kan sualsirnak aw a ngai ding ih thlasuah in pek sal ding a si. Kan mah hmang in a kutcak lang ter a duh. Kan mah hmang in Pathian a si zia leitlun mi hmuahhmuah in an thei ding a duh. Unau, tuini ah harsatnak tong tu hmuahhmuah na bawm thei lo men ding nan pakhat te cu na bawm thei sokhaw. Neta len na ti pangah cun neta hrangah nangmah si lo in midang sawn Pathian in a hmang hai ding sokhaw. Harsatnak tuartu pawl ih tuarnak le ninghannak tuarpi cio uh si la cui kan tuarpinak cu kan tuahttuannak in lang ter uh si! Nan parah Pathian thlasuahnak um hram seh!