Minung hi a duhhaam zet mi le ma'i neih cia, co cia, ngah cia mi ah lungdiriam thei dah lo mi kan si. Cui kan duhhamnak ruangah a tawk zo ti kan thiam thei ttheu lo. Midang in rak hmu tu pawl in mifamkim le soisel ding um lo ah in ruat ih in lawm rero lai ah lungawi ten cohlang men lo in kanmah le kanmah kan famkim hrih lo nak le kan tlaksamnak pawl kan hmu awk ciamco ih kan di a riam thei dah lo. Pathian hnen ah kan saduhthah le kan lungthlitum hmuahhmuah ngah thei ding in thla kan cam ciamco ttheu ih kan duhvek cekci in kan thlacamnak in let sal lo tikah Pathian kan mawhthluk ciamco ttheu. Himi thawn pehpar in thuk deuh in kan ruat tlang ding ka duh. Tahtthimnak ah; tlangval le fala in ka fala/nupi (or) tlangval/pasal ding cu a tanglam vek sinak a nei tu a si ding tin rikhiahnak nei in saduh kan that ttheu.
1. Pathian zumtu a si ding
2. Bible siar paih tu a si ding
3. Hnattuan paih le zaangzel lo mi a si ding
4. Farah le zonzai duhdawtu a si ding
5. Phunsang tlawng in degree ngah tu a si ding
6. Hlasak thiam le music lam paih tu a si ding
7. Zu in mi a si lo ding...tvp...in kanmah ten a sangsang ten kan ruat ciamco ttheu. Hitin saduh kan that rero lai ah hin Pathian kan ron lo lawlaw. Pathian hnen ah himi kan tar mi vek cekci sinak a nei tu in pek hram aw tin a hnen ahcun zaantin thla kan cam ttheu. Hinah kan palh zet nak cu ziangmi a si ti silen, kanmah duhnak kha number pakhat nak ah kan ret ih Pathian nih kan duhnak pawl in kimter sak ding kha number pahnih nak ah kan ret mi hi a si. Milai in saduh kan that thei tawk cu kan hmu dah mi, thei dah mi le tep dah mi pawl par ah hngat awk fang khi kan ruat ban cu a si. Cui kan mitthlam ih kan cuan ter thei ban mi lengah Pathian in kan hrangah ziangvek in khua in khaang sak ti cu caan tampi ah theih kan tum ttheu lo. Pathian hi kan duhduh kan fial thei mi kan hnen-um vek ah kan ruat pang ttheu. Leilungtlun pumpuluk sersiam ih a uk tu kan Pathian cu kan duh mi kan tuah ter ding a si lo ih kan duhmi le amai duh mi a bang awk le bang awk lo kan sut ding sawn a si. Kan mai duh mi hnak in kan hrang ih a ttha a ti mi in pek ding sawn kha kan dil ding mi cu a si.
Atlun ih tahtthimhak kan saduhthah tlaangpi ka rak tar zo mi mal lai kan zoh sal asilen mizaan ih kan duh mi le tuini ih kan duh mi an bang awk lo zia kan fiang ding. Tahtthimnak ah #1 nak cu Khrifa si mi hmuahhmuah ih duh mi a si ding ka zum. Kan pasal/nupi ding cu Pathian zumtu an si ding saduh kan that hlanah kanmah lala teh Pathian zumtu kan si maw ti kan cekfel awk hmaisa ding a thupi zet a si. A dang pakhat lala zoh sal sehla: #6 nak hlasak thiam le music lam a paih tu a si ding timi zawn te khi ngah ngaingai bang ta sehla, thildang tuah paih/thiam lo in a cumi lawnglawng tla a tuah ahcun a tuan ah maw a tlai ah simaw kan ning tengteng ding. Cutikah kan saduhthah pasal/nupi ih a sinak kan thleng duh tengteng ding. Kan nauhak deuh lai ih kan lungthlitum pasal/nupi ding le kan upa deuh hnu ih kan lungthlitum pasal/nupi ding hi an bang awk hrimhrim lo ding. Caantampi ahcun kan miduh kan co tin kan ruat awk ttheu. A ngaingai ten ti ahcun kan hrangah Pathian ih in rak retsak cia mi kan co sawn a si kha kan thei hngilh pang ttheu.
Unau, Bible sungah kan zoh a si len Matthai 6:33 sung ahcun a ram le a felnak kan hawl hmaisa a silen thildang hmuahhmuah pek beet kan si ding thu fiangten in sim a si. Sihmanhsehla, mitampi cun zapi hmai ih thlacam le biakinn sung ih hlasak, thuthangttha sim, Bible siar tivek lawng khi a ram le a felnak hawl hmaisa ah kan ruat ttheu. Angaingai ten kan ti a si ahcun ziang kan tuah mi tinkim ah siseh, ziangtik lai caan khal ah siseh, khoi hmun khoi ram kan um khal ah siseh amah Pathian kha number pakhat nak ah kan ret ringring ding a ttul a si. Kan saduhthah le kan planning hmuahhmuah kha number pahnihnak ah kan ret ding sawn kha Bible in in zirh mi a si. Thufim 3:6 nak siar aw.
Zumtu diktak kan si ahcun tisa lam in saduhthahnak tampi kan nei ciamco lo ding. Ziangruangah tilen kan duh mi thil ziangkim ih hmai ah Pathian kan ret hmaisa ruangah le amai duhdan vek ih lai in relsak dingah permit kan pek zo ruangah a si. Kanmahten kan nitin nuntu khuasaknak ding hrangah khua kan khaang a si ahcun kan thin a baang zet ih kan bei a dong ttheu. Sihmanhsehla, Pathian kut ah kan ap hmaisa ih zumhngamnak thawn tumcop Pathian ring in ke kan kaar a si ahcun kan minung thluak ih ruahnak hnak ih sang sawn le mak sawn in lam in hruai ttheu a si.
Pathian cu kan nunram ah number pakhatnak ih kan ret thei a si ahcun duhhamnak thinlung khal kan nei lo ding ih kan nei tawk, hmu tawk le ngah tawk ah kan lungdi a riam ding a si.
No comments:
Post a Comment