Ziangvek Nulepa Na Si? Mai Esther Dimte (HLD)

Ka thinlung neitu ka sungsuak ka fale pawl hrangah hin kanmah an nulepa ih kan thil tuah ttha lo mi, ziaza ttha lo mi le kan thintawinak pawl in cawng pang ding ti hi thinphaang zet cing in ka nitin ruat mi le thlacamnak asi.

Nulepa cun kan fale cu a tthabik siter kan duh ih kan zirh hai rero ko nan an hmai ah zohtthimtlak ih a nung thei ngaingai tu nulepa cu kan mal zet.

Thinsaunak Pathian hnenah kan dil deuhdeuh thintawinak kan tong deuhdeuh. Ruatfel salahcun kan thlacamnak a kim sawn a rak si. Thintawinak dinhmun lawngah si ziangtluk in kan thin a sau thei timi a lang thei ding.

Fate hi nunau lawng in hring a ngah lo ih mipa lawng khal in nei thei mi asilo. Fate pakhat nei dingah nunau le mipa an ttul. Direct contact silo hmanh ah indirect contact (through medical help) thawn a ra suak mi an si. Cumi in ziangsi in khihhmuh ti asilen fate cu nu le pa bawm awk in puitling ih an tthanglian thei nak dingah kan zohkhenh tlang an ttul tinak asi. Fate neilo nupa cu an duhnak an hmu awk lo tikah innsaangtthen awk an hreh lo ih an tthen awk hlohhloh ttheu. Karlak ah fate a um hnu ahcun mi tam sawn cu an fate nu ei lole pa ei tuar ding an siang lo ih thinsau an cuh awk sawn ttheu asi. Phun dang in kan sim silen an fate mithmai an zoh ih an fate hmailam hrang an ruatsak tinak asi.

Innsaang nuam si dingah nulepa kan lungawi a ttul. Fale pawl an lungawi a ttul. Cui lungawinak cu pakhat le pakhat ttihzah upat awk tonh nak (mutual respect) le thusimngai (obedience) nak ih rahsuak mi an si.

Kan nauhak lai ahcun kan duhbik mi (main interest) cu lek asi. Tlawngkai thei dinhmun kan thlen cun fim zir asi. Tlawng kan ttheh cun hnattuan asi. Cutin kan kum tla upa vivo ih fala tlangval cu kan duhbik mi ah an cang. Nupi/pasal kan nei tikah kan duhbik mi kha kan nupi/pasal ah an cang. Fate kan nei tikahcun kan thinlung le kan ruahnak hmuahhmuah cu kan fate hrangah an cang. Curuangah kan fate 100% kan duhdawt ngaingai ko asi ahcun an hrangah zianghmanh harsa lo ten kan fehsan thluh thei ding mi asi. Kan thi hnu ah kan fale hrangah sumpai tampi kan roh ta ding cu a ttha zet mi asi ko. Cuhnak in a ttha sawn mi cu sumpai tampi ngah dan le hmang dan (financial resource & management) kan zirh ding hi asi. Cuhnak ih a ttha sinsin mi cu an hrangah kan hlawh mi sumpai in an nunnak a siatsuah lo nak dingah ziaza ttha (thusim ngai, zu in lo, rit-hai-si tham lo, gambling tuah lo) nei ding in kan kaihruai thei ding hi asi. Cuvek ih fale kaihruai thei tu huham nei mi nulepa si thei nak cu Pathian hnen lawnglawng in kan ngah thei mi asi.

Na fate hrangah ziangvek nulepa si na duh?