Sung Khar Kim in Christmas Caan Hman – Tuan Kip Thang

Zinglam nazi 5:40am hrawng kim in Ka U nih kan tho lai a ka ti i kan tho. Ataktak tin cun nidang ah 6:40am hrawng hmanh ah ka Nu nih a kan thanghsom mi kan si. Christmas zing si kawh kan i caang tuk. Buhti kan lan i a so in fang ka thlah deng ah khin ka U nih “ka Pa tla tuizing cu rawl ka ei ve lai a ti” a von ka ti cu ka Pa rawl tampi a ei kho lai ti phun khin pawnghnih fai ka bet. Lai lam khuate lam cu kan harfe tuk i sa ei hi Puai caan, Pastor rawl ei sawm caan le khual neih caan ti lo ahcun a har ngaite. Christmas zing ti cu Ar kan that i rawl ei ding khal thatho ngai ngai. Cabuai pakhat ah sungkhar kim in rawl kan von dum i ka Pa nih arsa cu a von saam, A thin a von lak i ka Nu a pek. Ka Nu nih amah lawng ei ve lo in kan zaten fate cio a kan pek i a thaw in a sung lawi khun ko lailam arsa ei. Ka Pa nih a sa tthat nak tete an kan pek cio i a nih nih a Ke, a Lu le a Ruh le a dang kan ei duh/kho lo mi ai lak. Ka Pa nih hi pawl hi a duh ruangah a ei siloin Fa le a kan dawt tuk ruangah a tthat nak a kan pek dih hoi si. Ataktak ten ti ahcun ka Pa nih a sa tthat nak hmanh a ei kho lo. Christmas zing a si ruangah innsungkhar kim in hman a duh ruangah a kan topit men mi a si ka rak thei kho lo. Sungkhar kim i rawl dum khat le hmun khat i um a nuam/sunglawi dan pawl khal k arak theithiam lo. A sun cu Puai hmun panh in Biakinn lamah kan Sungkhar in kan pok. Ka Pa nih tuisun cu ka kiang te ah um uh a kan ti cu ka huam lem lo nan amah ka ttih ruangah ‘aw’ ka ti. Hngaksia ai ti cu hawi le pawl thawn nuamten um le vaak kha ka duh deuh. Sungkhar kim ten caan hman khat a nuam dan le tu lawng hi Sungkhar kim in caan kan hman kho a si lai ti ka rak ruat baan kho lo. Kan Sungkhar ten hman kan i thla ii, Upa le nih nuamh nak a kan tuah sak mi pawl kan zoh dih hnu ah a zaan Puai ah Sungkhar kim in kan to i rawl kan ei khat. Cucu kan cah ah a net nak bik a si. A kan khamh tu Bawipa Jesuh suahcam kan lomh, sungkhar kim in caan kan hman le rawl kan ei a si. Kan san sungah kan ton kho nawn lo ding mi tin le, Para bantuk in hngilh kho lo ding mi ni le caan ah ai sir. Sungkhar kim te caan hman khat a nuam nak le a sunlawi nak ka rak thei manh lo. Atu cu kan san ai thleng tuk cang i ram dang le bang ahcun duhdawtnak thawn sungkhar kim in ar thin i seuh ti khal a um nawn lo, a nuam daan le caan hman dan ai dang tuk cang. Zeitluk in caan i dang in i thleng khal sehla kan biak mi Bawipa Jesuh suahni lomh cu ai dang in ai thleng lo. Tui san mi nung tam pi nih cun innsungkhar khat thawn nuam ten Christmas hman hnak in hawi le pawl thawn Party le nuamh nak phunphun in hman a si deuh cang. (Nu nei nawn lo mi nih Nu dawt nak an thei, Pa nei nawn lo mi nih Pa dawt nak an thei, Sungkhar kim lo mi nih Sungkhar nuam nak an thei) an ti bang na si ve pang lai. Atu caan aum lio ahhin Joshua nih Israel mipi pawl hnenah Joshua 24:15 sungah (Mesopotamia khuazing maw nan biak ding Amor miphun pawl ih khuazing deuh so nan biak ding, Kei le ka Innsaang cun Bawipa kan biak ding) a ti bang in, midang nih cun hawile thawn Party ah le Zuu le Sa le nuamh nak hmun ah a phunkip in hmang hni hmanhsehla, kei le ka sungkhar nih cun "A kan khamhtu kan Bawipa Jesuh suahni" ah Sungkhar tling in lungawi ten amah thangtthatnak thawn nuam ten ka hmang lai tin ruahnak thar nei sal uh sih! Unau na tlai hrih lo caan ttha na neih lio ah sungkhar kim in Jesuh suah cam nuamten hman i zuam uh! 

Hi cu sungkhar kim ten hmunkhat um mi pawl cah duhsaknak thawn ngan mi a si i, pumcawmnak le a dangdang ruangah sungkhar kim in a hmang kho lo mi khal ngeihsiat ding kan si hei lo. Kanmah minung hmanh Birthday nuam ten kan hman ah cun, a vancung sunparnak le sui lukhumh hmanh kaltaak in a niambik cawrawl ei nak kuang sungah minung sinak thawn a suak mi a kan khamhtu Jesuh suahcam cu lungawi thlacamnak thawn hman rak i zuam cio uh sih!

Sungkhar kim in caan hman ti mi thu thawn peh par in 2003 alethnubik Christmas sungkhar kim in caan kan hman dan pawl sirhsan in ngan mi a si.