Zinghmuh Tlang in Khua Ka Cuan (part II) - Cung Thawng Lian (Salai Thawngpi)

Tui tum Zinghmuh tlang ka so cu manhla ka ti zet. Tlangzim ka hung thlen veten thlatang zilthli in ka biangno i hran cu sunglam tiang a rah thluh thei. A dai zet nan a sannak bik hmun Ungpi ka va thlen cun mero a kiang ih khua khal tla pempem in a langfiang zet. T’ha zetin khua ka cuan tikah ka hmuhfiang mi cu Falam mi hi kan tenau zet si si maw timi hi a si. Ziangruangah timi a hram ka zingzoi tikah ziangdang si loin kan lungput ruangah a si bik. Kan lungput a dik lo ruangah kan ruahdan a dik loih kan hmuhnak khal a dik nawn lo. Kan hmuhnak a dik lo tikah pakhat le pakhat ral vekin kan hmu-aw thlang. Cu tikah hmunkhat ah kan fehtlang thei nawn lo. Hmunkhat ah kan fehtlang lo ruangah lenglam ral in in t’hio ih in t’hekdarh thluh tum. Cucu kan theifiang thei hrih lo. Ziangruangah hi dinhmun kan thlen kan ti asile kan Calai nathrik in a thokmi a si tiah ka ruat. Falam calai thu ah thupom pahnih in kan t’hen-aw. O le Aw Party tiah pahnih kan ding ih pakhat le pakhat ral vekin kan zoh-aw ih kan dokalh-aw ringring. Cuvek in kan do-awk sungah midangpawl cu heh-le-chet tiah lungrual in hmainor in an rak tlan rero. Calai ah kan niam tuk tikah mi kan bang thei nawn lo. Calai a t’hansolonak hmun ah mipi khal an t’hangso dah lo. Kan Calai a t’hanso theilonak khal O le Aw ruangah a si bik. O in ca a ngan tikah Aw in a lei duh loih Aw in a ngan ve tikah O in lei a duh ve ce lo. Cutikah kan Calai ram a fiak vingvo ih nuam teten a pil vivo. O le Aw hin t’hathnemnak an suahpi mi ka hmu hrih lo. An suahpimi rah cu ralawknak, Calai t’umsuknak, Calai zuar harnak le lungruallonak tla an si. Curuangah hi nathrik hi a dam lawngah mi tenau in mi pipa ah kan suak thei ding. Calai timi cu milai t’hansonak hram a si. Falam t’ong in Calai a mawitawk a suak ve thlang. Asinan Calai in sumdawnnak tlak a si thei lo. A san cu Calai a hlutzia kan thei loih O le Aw in tahfung kan rak tah lok men ruangah a si. O a t’antu mipi in Aw cangan mi cu kan lei duh lo ee an ti ih Aw a t’antu mipi in O cangan cu kan lei duh lo an ti ve. Hihi mi tenau zet pawl ih lungput a si. O le Aw hnakin A Sungthu ah kan buai ding a si sawn. Kan nunram a remtu, kan khawtlang a remtu, kan biaknak a remtu, ramkhel a remtu, innsang a remtu le theihnak a petu Calai a si maw ti sawn in zoh ding a si. T’ahpi tlak Falam kan si thlang ti hi kan thei-aw thei lo. T’ah ben emem tar cun hitin t’ah hla a lawh ding ka zum. “Ai-ze-law, Maw! Falam hnianghno, kan fim ee, kan thei ee, mi ropi kan si kan hei ti-aw t’heu. Zanmang hman i ka man ban lo, hnuaiah kan thleng zo si maw! Falam cu ee Kawlram ah dimukaresi hmang hmaisa a si kan ti maw, Chinram khawlipi a rak si dah kan ti maw, Kan umnak hmuntin ah hruaitu kan si thei kan ti maw, ai..ai..ai.. cui ka thin nat cu ee.. ziang lawmman so kan thlen thlang. kan sinak, kan thilri pakhat hnu pakhat hmundang ah an t’hawn ziarmar thlang lo maw, kan itthat rero lai maw ee... mi khua cu ee.. kutkai in an fehtlang lai ah kannih unau cu maw nukhat pakhat si cingin Esau le Jacob bangin dokalh-aw cingin kan suak tlang ih bum-awknak in kan t’hen aw thlang si maw.. cui ka thin nat cu.... ai-yaw!” a ti ko ding. Ruat thlang-aw unau. Kawl in “vainam har hnakin Cafung a hriam sawn” an ti kha! Ca timi cu milai nunram ah a pakhatnak dinhmun a si. Calai thapek hna thiam uhsi. O le Aw san a si nawn lo. O le Aw san ah na um hrih lai a si ahcun pitar nui t’ahhla sungah na taang lai tinak a si cu. Falam t’ong in cabu an suah tikah bu 1000 in 2000 hrawng tiang an suah t’heu. A ngaingai ti ahcun hi zat cabu hi veikhat an suah ah cem thluh thei ding a si. Falam minung hi zat liangluang ah cabu 1000/2000 hman cem ko kan lei thei lo a si ahcun hi hnu kum 50 khalah sirhkhat/hnih hman kan t’hangso lo ding. Falam t’hangso seh ti na duh a si ahcun Falam Calai hmuahhmuah lei tum t’ent’o aw. O le Aw lungput in Calai zoh nawn hlah. A sungthu ah na thinlung benkhum aw. Cutin Calai t’hathnemnak na thei dingih Falam hrangah na ruahnak le na thazaang na pe-aw thei ding. Rei tukin itthat nawn hlah. T’hangharh thlang aw. Zinghmuh tlang zim ah Cerlian Ninu a thleng thlang. A tlai hlan ah tho in pok thlang aw.