Zinghmuh Tlang in Khua Ka Cuan (part I) - Cung Thawng Lian (Salai Thawngpi)

Falam peng, Ramthlo khawlu Zinghmuh tlang tupi ah ramsapawl rawl-ul in thla an cam. An thlacam mi thulupawl cu hitin a si. 1. Chin mipawl an piangthar theinak dingah. 2. Ramsa duhdawtnak an neih theinak dingah. 3. Thingram thupit zia an theih theinak dingah le a dangdang..... Pu Vompi - Maw Bawipa.. Kawlram cozah khal dimukaresi a hmang rero ti kan thei ih kan lung a awi zet. Chin mipi in dimukaresi kan ngah asile kan lian deuh ding an timi \ongkam khal kan thei. Bawipa.. An lian deuh ngaingai asile kannih ramsa hrangah kan nuam deuh ding tin kan ruat. Tucu an farah tuk ih sa leinak khal an neih lo tikah sualnak nei lo kanmah ramsa riangri in ra that rero. Maw Bawipa kan Pathian.. Chin mipi hrangah thla kan cam. Liannak run pe hai aw! Cu lawngah thin nuam in kan tlangleng thei ding. Pi Zukneng - Bawipa kan Pathian, Chin mipawl an piangthar theinak dingah ziang kan tuah le a t’ha pei? Ka pa ka Pathian.. Chin mipawl ka \ih hai tuk. Veikhat cu kan nupa in khua pakhat kan thleng ih cui khuapawl cun kan thleng timi an thei. An khaw senpi in in hual ciamco ih kan nupa in kan thi maw, kan nung ti’in kan tlam ciamco. Bawipa.. Kan pa thawn hmunkhat ah kan tlan thei lo ih tu tiang kan \hen-aw lanta. Kannih zukneng tla cu kan tam tuk nawn lo. Bawipa ... Na mipawl hi Hitler an timi pa vek an si hmang. Kan ci rori hmih in tum. Kan hrangah Chinram ih um cu hell vek a si ko. Maw Pathian... nangmai duhmi piantharnak run pe hai thlang-aw. Zawngte - Zaangfahtu Pathian.. Kei cu Chin mipawl hnakin Kawlpawl hi an piangthar sawn ka ti. Kawlpawl cu thingkung ramsa duhdawtnak le zawnruahnak an nei an ti. Bawipa.. Chinram hi Budda ram si sehla kannih ramsapawl cu kan nuam deuh ding. Na mipawl hi Budda-pawl hnakin an sual sawn. Bawipa.. na mipawl hin asun azan in in hual. Umngaihnak kan thei nawn lo. Kan Pathian.. na mipawl hi an duh khalah, duh lo khalah duhdawtnak le zawnruahnak thinlung run pe hai hram aw. Varit - Sersiamtu Pathian.. Ziangruangah hi tluk lawmman in harsatnak in tonter. Kristian ram an ti rero mi Chinram ah kan um ih kan nuam deuh ding hmang kan ti laklai ah thinphang le thlalau in kan um ringring. Bawipa.. rawl khal \ha ten kan hawl thei nawn lo. Hrekkhat kan unaupawl tla cu rawl an hawl thei lo ruangah an karh thei nawn lo. Bawipa.. in zangfah hram awla na mipawl hi piangthar hi ziang a si timi run theihter hai aw. Cule fimthiamnak le theihthiamnak tla run pe hai aw. Kan \hatnak an hmuh theinak dingah zawnruahnak tla run pe hai aw. Sakhi - Jehovah Pathian.. Kan pupapawl in na parah ziangvek sualnak lawmmam si an rak tuah ih hitluk a har mi Chinram ah in umter. Bawipa.. kan sualnak ruangah maw hitluk in harsatnak ram ah kan um. In run zangfah thlang aw. Na mipawl in kan piangthar an ti ringring fawn. Kannih hrang ahcun an piantharnak hi san a tlai lo. Bawipa ka Pathian.. Na mipawl hi kanmah thah ding le siatsuah dingah khua an khang ringring. Na ram karhzai theinak ding hman ah nihlawh pek an siang lo nan kanmah thah ding ahcun zan 2/3 tla an riak \heu. Tuksumza an si ko. Bawipa.. Kan unau hrekkhatpawl fa an vawn lai ah an kap that rero. |hal caan hi fa kan vawn caan a si ti an thei lo si pei maw. An parah sualnak kan tuah mi a um in kan thei lo nan.. Bawipa.. na mipawl hi ziangvek Baibal si pei an zirhawk? Na thupek mi cu a \ha zet ti kan thei. Asinan na mipawl cu anmai tuahmi daan thlun an paih sawn. Bawipa.. kan sualnak in ngaithiam awla na mipawl parah zangfahnak le zawnruahnak run pe hram aw. Ngal - Cungnungbik Pathian.. Kannih unaupawl cu dai ten kan um thei nawn lo. Na mipawl in saram par ih an tuahmi hi a siakhaa tuk. Bawipa.. na mipawl ih an lorawl kan siatsuah hi na duh lo ti cu kan thei. Asinan na mipawl hi zoh hai hman aw. Kan hrangih in pekmi ei ding hmuahhmuah an siatsuah thluh. Bawipa.. an tirawl cin mi kan ei lo ah ziangsi kan ei nawn ding. Na mipawl an piangthar ih kan tirawl in siatsuah sak lo a si ahcun kannih khal dai ten kan um ko ding. Bawipa Pathian.. Na minungpawl hi kan upat zet hai ko. Asinan an luar tuk thlang. Anmah nunnak petu thingkung hman ziang an siar nawn lo. Bawipa.. hitluk ruahnak neitu na minungpawl hi na zoh menmen ding maw si? An ram ah tleunak thar thlenter sal hram aw. Vazuun - Bawipa.. tu ni tiang dam te’n Chinram ah kan um thei ruangah kan lungawi. Na mipawl in Kawl kut sung ihsin an luat theinak dingah an cangvai rero ti kan thei. Bawipa.. hrekkhat tla cu zalennak (independence) rori kan la ding an ti. Bawipa Pathian.. kannih khal na mipawl kut sung ihsin luat kan duh ve. Tu vekih in tuah ringring a si ahcun zalennak kan dil a \ul ko ding. Bawipa.. na mipawl hi kan upat hai zet. Nikhat khat ah an ruahnak an thleng leh ko ding tiah thinsau lungsau in kan hngak ringring. Bawipa.. kan ruahsannak a cem thlang. Na mipawl hi an ruahnak an thleng tum lo a bang. Na mipawl hin kan ram khal in cuh thluh. Nuam teten in nor vivo ih a \hatnak cu a cem zik thlang. Kan ramri khal kan thei thei nawn lo. Bawipa.. Na mipawl cun Kawl kut sung ihsin zalennak an ngah theinak dingah hruhrang (non-violence) loin kan cangvai ding an ti. Kannih cu a ngah lo ding a bang. Bawipa.. zalennak kan ngah ding a si ahcun ziangvek khalin kan cangvai ko ding. Kan thisen khal suak ko seh. Kan ram kan ngahsal tak ah kan nunnak liam ko seh. Poi kan ti lo. An kut sung ihsin luat rori kan duh thlang si ko. Kan nunnak in a celh hrimhrim lo si ko. Sabek - Bawipa kannih ramsapawl cu hmunkhat ah hna kan \uan thei. Hihi kan nunphung kan thlun ruangah a si bik. Kannih cu khua pakhat ah Tlangbawi pakhat lawng kan nei. Tlangbawi hi a sangbik a si. Bawipa.. na mipawl vekin khua pakhat ah pastor tam pipi kan \ul lo. Kan nunphung le kan biaknak hi hmunkhat an si. Cu ruangah ruahnak khal a phunphun a suak lo. Bawipa.. na mipawl vekin zirnak a sang deuhdeuh ih ruahnak phunphun a suak tivek kan nei lo. Kan nunphung le biaknak kha hmunkhat ih feh an si ruangah ruahnak dangdang suahpi a theih lo. Cucu kan nunphung a \hatnak a si. Hivek nunphung in pek ruangah na hmin kan lo thang\hat. Bawipa.. na mipawl kha khawsia khuavang an rak biak lai san ahcun Tlangbawi pakhat lawng an rak nei ve. Khua pakhat ah tlangbawi pahnih a um timi kan thei dah lo. Tucu an piangthar ciamco ih khua pakhat ah pastor pa 3 tla an um. Cule pakhat le pakhat khal an ruahnak a bang-aw lo. Bawipa.. na mipipawl in tlangbawi tam pipi sersuah an tum. Nangmah ih na hril lomi cun tlangbawi an \uan thei ngai pei maw? Bawipa.. na mipawl hi fimnak run pe hai awla hla pipi zohter nawn loin an kiangkap zoh thiam thlang hai seh. Hla pipi an zohnak ah an mit a vaivuan ih an ruahnak a hlo vivo a bang. In lainattu Pathian.. fimthiamnak in pek ruangah kan lungawi. Kan nunphung khal hlo lo tein tu ni tiang kan kil thei ruangah na hmin kan lo thang\hat. Na mipawl vekin mi nunphung hi kan uar ciamco loih kanmai nunphung te hi a \ha zet tin kan ruat. Bawipa.. in pekmi nunphung hi san a man lomi cu kan rem rero. Ramdang nunphung ngai lo kan si ve ko. Sumbuh - Bawipa.. in pekmi ram hi a \ha zet kan ti. Hivek ram ah kan um thei ruangah na hmin kan lo thang\hat. Cule na mipawl in kannih cu in ei duh lo ruangah kan lungawi zet. Ka pa Pathian.. na mipawl hi theihthiam an har zet. An ram ah duhtawk kan tlangleng thei nawn lo. Kan rinsanmi kan unau tampi cu ramdang ah in tlansan zo. Tu a tangmipawl hi cu zianghman ti thei lo kan tam. Cule ram duhdawt ih a tangmi mifim khal cu an um phahphah. Bawipa.. kan ram tanta ding hi a har lo. Ramdang ah hmun \ha\ha a um ti kan thei. In pekmi ram a si ruangah tu tiang kan um hrih lai. Asinan Bawipa.. na mipawl hi an cang thei nawn lo. Thinkung rampi khalin a celh hai lo. Sualnak nei lo vate fa tete khalin a celh hai lo. Bawipa.. ruat ve hman aw.. Hitluk a fate mi vate tla na mipawl in an hual rero. Ei tlak teh an si maw si? Bawipa.. tu tla cu khua a \hal thlang. Vatepawl bu an tuah ih fa an karhzai caan a si. Tu caan hi thinphang le thlalau ih kan um caan khal a si. Bawipa.. na mipawl in \hal a hung kim cun ram an ur ih vate bu khal a kaang thluh. Hrekkhat tla cu an ti le an fate khal a kaang. Bawipa.. Kristian ram um hi a nuam zet ding ti’n kan ruat. Asinan kan ruah vekin thil a cang nawn lo. Nikhat hnu nikhat an besia deuhdeuh. An lung a hak deuhdeuh. Bawipa.. na mipawl hi anmai zawn lawng an ruat thlang. Na daan an thlun lo hlei-ah minung ih tuahmi daan khal an thlun paih lo. Theih khal an thei duh lo. Bawipa.. na mipawl hi Sodom le Gomorah khua vek an si ko lo maw. |ih an nung tuk thlang. Cule Bawipa.. ram dang ih tlan zo kan unau hrekkhat tla kan ramte ah kan kir ding tiah an ra hal nan na mipawl in an rak hual ciamco ih riahsia zetin an kir sal. Bawipa.. na mipawl hi an mit vangter thlang aw. Na parah an ruahnak le an hmuhdan an thleng theinak dingah fimnak pe hai aw. Bawipa.. Chinram hi ramsa phunkim umtheinak ram ah si sal hram seh tiah Jesuh krih hmin in thla kan cam... Amen