1.Khoi ka in dah na rat?
Kei cu Falam peng, Ramthlo khua in Kalaymyo ah a ra mi ka si. Kalaymyo in Yangon ah a ra mi ka si. Yangon in USA, Washington, DC ah a ra mi ka si.
2. Zei ti ah dah na rat?
Ramthlo khua in Kawl ah ka rat nak cu;
1. Ka hngakchiat deuh lio ah ka nu le ka pa nih an ka vaih pi. Kawl cozah kuttang um kan si bang in laitlang khuate ah cun kawlholh duhpoah in kan thiam khawh lai lo tiah awthiam duhnak in an ka rat pi.
2. Kan khua ah tang-10 siangin a rak um rih lo ca-ah khuapi sung ii Nu/Pa hen danghram ii kan um lai an kan sian lo ruang ah inchungkhar hmunkhat te ah um in fa le nih fimthiamnak kan cawn khawh nak lai ruat in aa kan rat pi.
3. Lai khuate ah thihhlanlo lothlawh bu ii pawcawm awk a harsat zia an theih ruang ah "Tifim deuh nak le Ramno deuhnak hmun" ah aa kan rat pi. Ka nu le ka pa ii ruahnak ah "Khuakhat in adang khuakhat kal lo ah cun mitha an si kho lo" tihi asi. Biadang in kan chim a si ah cun an khualeng ii thil cang mi zei hmanh an hmuh khawh lo ca-ah zir awk a tlawm tuk. Fimthiamnak lam in siseh, biaknak lei in siseh, pawngkam le communication level pawl every angle ii kan ṭhancho khawh nak lai lam awng kawl awk ah an ka rat pi.
Kalaymyo in Yangon ka rat nak cu;
Kawlram pumpi ii khuapibik arak si bal mi ah um to kho ve si ding ka duh ruang ah phunsangtlawng Kalay University in ka dih le cangka in ka kal ii USA ka rat lai tiang Company pakhat ah rian ka ṭuan. Phundang in ka chim a si ah cun kumtling cang upa pakhat von si ve hnu ii Nu/pa thlanhrichuak man ei len ka ngamh ti lo ca-ah keimah ten ka kecung ii dir khawh nak lam ka kawl.
Yangon in USA ka rat nak cu;
A cak tuk mi santiluan dawi awk ah ka rak ii thawh ve. Ka dawimi ka phak khawh lo hmanh ah a dawitu ka si nak lawng hmanh nih tampi lungsaknak aa ka pek.
3. Khoi Zei ah dah na kal lai?
Ka chuahkehnak khua, ka laihri tan nak hmun in ka Nu/Pa nih an ka vaih pi hnu tang-10 siang ka kai tiang cu an kut tang ah ka um na-in nihin ni ah cun keimah ten tluangdang ah ka um cang. Ka rat nak hmun ka theih ca-ah ka kal nak ding hmun zong ka theih chih ko. A dong kho bal lo mi Destination ah ka kal lai. Ka kal pah ah hmuhnak, theihnak, thiamnak phunkim hna cu ka hawi ah ka ser hna lai. Ka hnak ii upa hna cu ka U le ah ka ruah hna lai ii a hngakchia deuh hna cu ka nau le ah ka ruah hna lai. Ka nu/pa kumzat asi mi hna cu ka nu/pa bantuk in ka zoh hna lai ii an hnak ii upa deuh pawl cu ka pi/pu tiah ka ti hna lai. Ruahnak ṭha aa ka petu poah cu mifim tiah ka ti hna lai ii ka thih hlan lo tiang in ka upat hna lai. Ka hmuhton mi hrelh lo ten ka Nu/Pa sin ah ka chimh peng hna lai.
Khrih ah dawtmi hawi le hna,
Kan rat nak inchungkhar, fimthiamnak, nunphung pawl ii background fiang in kan ii theih khawh lo chung paoh cu zeitik hmanh ah mi kan lo kho bal lai lo. Thilthar tuah cu cawn ding asi ko na-in a hlun cu philh ding asi fawn lo. Asiat mi remh ding asi lai ii a ṭhat deuh nak ding lam kawl ii zuam ding asi lai.
Kawlram ah zu le sa a um lo le maw Ramthangcho kan ti mi kan phanh nak hmun poah ah lai mi nih zu din rumro in ro kan ling hna hi? Hawi dawt fakpin ruat cio uh si! Kan ratnak, kan rat hnawhchan, kan sunmang zeidah an si ti khurkhua fakpin ruat cang hna uh si! Kan lungfim tik ah khua an tlai tuk te sual lai! USA le Ram dang ramsangsang kan phanh khawh hi mi cheukhat cu cathiamh ruang ah, sumsaw ngeih ruang ah an si cio ko lai na-in laimi a tam deuh cu zeitin kan phan ti cu chimh len zong khi a hau ti lo. Hibantuk in kan don mi thluachuah hna hi a hman zia kan thiam lo ah cun kan pathian nih aa kan lak piak dih te ko lai. A ṭhangcho tuk mi ram ah fimthiamnak zir awk ah le an sumsaw tuahser ning cawn awk ah thlah mi kan si. Cui kan hmuh, theih, ton mi vial te cu kan rat nak inn, khua, ram ah kan hman ṭhan awk an si lai.
Let hnu bik ii chim ka duh mi cu " kan liang can pi kan ii tinh ah khin kan khuk can lawng kan ngah" timi te hi asi ee. Thil zeipoah kan tuah ah ruahchannak sangbik ngei uh si! Kan tuaktaan ning in 100% cu kan ngah kho peng lai lo. Sihmanhsehlaw saduhthah atlin lo tik zong ah lungrawhnak ah ii hmanh lo in thaizing ah nithar ka cah a chuak ṭhan ko lai ti'n thazaangthar lak thiam cio uh si law thluachuah petu pathian hminsunlawi ter tu Lai nu/pa kan si khawh nak lai kan mah le kan um nak hmun cio in ii zuam cio uh si! Ramsa nih cun a ngei tu ii a thah ding ni lawng a hngak na'n, nang le kei cu kan sunmang a kim ding ni hngak uh si! Atui ka hluhchuah khawh lo mi ka sunmang hna hi ka vawlei dihnak asi lo ti hngal peng uh si law Saya tu ah hmang uh si!
Pathian duhnak kawl hmaisa thiam tu laimiphun zumtu Unau kan si dih nak lai thlacam bute in....
No comments:
Post a Comment