“Vision” tiih kan theih leng mang mi a sullam tak tak cu, kan ii timh mi le si kan duh mi khi, kan hmuh tak tak cang tiin kan ruah ii, kan hei cuan kho mi khi asi. “Vision” neih hi Bawipa mi le fa kan caah thluasuahnak Zeizat/Zeibantuk hmuh kan duh timi ri khiahtu a si. Vision a nei lomi nunnak cu a rawk. Vision kan neih lo ah cun, zei tik can ah zei ban tuk, ka si lai ii zei tin ka um lai ti mi khi kan tuak kho lo . Cu, kan tuak kho lo ah cun, a nung ko fawn ii, a thi mi ban tuk kan si.
Abraham cu Lot thawn an i then hnu ah BAWIPA nih ai thawh ii " Na umnak hmun khan, nichuah-nitlak -chaklei -thlanglei vialte cuan tuah hna; na hmuhmi ram vialte kha nangmah le an tefa cu kan pek hna lai i a zungzal in nan ta a si lai" a ti (Gen.13:14-15). (Zoh = cuan = Vision) Abraham nih a cuanh kho zat or a zoh kho zat le a hmuhkho zat paoh kha, BAWIPA nih amah cu a pek dih. A zoh kho lomi le a cuanh kho lomi le a hmuh kho lomi ram cu BAWIPA nih a pe lo. Amah nih zeitluk kau Vision an neih timi kha a thluasuah hmuhnak caah a thupi bikmi rikhiahtu cu a si ko. Abraham nih a umnak hmun in saupi le kaupi in vawlei kil li tiang khi a zoh dih; a zoh ning le a hmuh ning Vision a neih ning tein Bawipa nih ram cu a pek ve. Cuve bantukin kan umnak le kanhram kan i thawknak hmun; kan no lio le kan hngaksiat lio tein Vision kaupi kan neih ahcun Bawipa nih a an ka pek ve ko lai..
Zeibantuk “Vision”, zeitluk kau le zeizat kau seh “Vision” kan neih, timh tuahnak kan neih ii zumhnak kan neih timi hi BAWIPA thlasuah kan hmuhnak ding caah rikhiahtu (thuthentu) an si ring ring ve. Kan “Vision” a auk , a kau ahcun kan thlasuah hmuhmi a uak lai i a tam ve ko lai. Asinain, kan “Vision” a bit tuk ahcun kan thlasuah hmuhmi le comi a bite, a tlawm te a si ve ko lai.
BAWIPA nih " ka hal law miphun vialte hi nangmah kan pek dih lai; Vawlei hi a dihlak in nangmah ta a si lai" a ti (Ps. 2.8). Tlawng kai mi nih Degree sang pi pi le Degree tampi le Doctor degree pawl kha, tlawng kai ka i i thawkka tein hmuh ding le ngah ding ah Vision uak pi le kau pi kan neih ahcun Degree tampi le sangpi cu BAWIPA nih a sunparnak caah an kan pek ve ko lai. Kan “Vision” ah phunhra awn cun, a za ti a si ahcun, phunhra awnnak te lawng an kan pek ve ko lai. Kan “Vision” ah B.A le M.A lawng a si ahcun cu te lawng cu nan hmuh ve ko lai.
Kan rian tuan nak hmun dir hmun cio in, a sang deuh mi Supervisor tuan kho nak maw, manager tuan kho nak maw, si lo le, mah dawr (own business) neih kho nak “Vision” sang pi kan neih kho ii, kan ii timh ah cun, pek kan si ko lai. Abraham kha Pathian tlhasuah pek a duh lio ah khan, ram le khua kha zoh duh lo le cuan duh lo in, Bawipa nang mai thu thu si ko seh tiin um men seh la Pathian nih thlasuah a pe duh tur maw? Pe naisai hlah.! Kan Vision neih ning le neih zat in BAWIPA nih mi vialte hi thleidannak um loin thlasuah a kan pek dih ve. Nang na Vision zeiseh a si ve ? Abraham thlasuah a pe tu Pathian nih nang mah khal thlasuah pek an duh ve!
No comments:
Post a Comment