Kan fim te tik ahcun - Cung Thawng Lian (LL.M)

Ni khatkhat ah kan hmuhnak a kau lai i kan ruahnak a sang te lai. Cui dirhmun cu kan tiang te hrimhrim lai. Cu tikah tu in rak i timhlamh cia a hau. Chinmi kan lungput le kan ruahnak zoh tikah Chinram cu a t'ha lo, pumcawmnak tlak a suak lo, kan t'hangso kho lo lai ti a si dih ngawt. Pathian kan bia ko nan Pathian nih Chinram ah t'hansonak a ret timi kan hmu kho hrih lo. Dr. Hmuh Thang nih "Chinram ah zeihmanh a suak lo nan minung kan suak ko" a rak ti dah. Simduhmi cu minung kan um phot ahcun zeipaoh a si kho dih ti a si. Asinan pakhatnak ah fimthiamnak kan neih rori a hau. 

Israel ram kan zoh tikah an ram cu nelrawn ram a si. Tidai a har. Asinan vawleicung ah cinthlaknak ah hminthang an si. Zeilam paoh ah an sang tuk. A ruangcu Pathian nih a pek hni mi Fimthiamnak hmang in an ram an sersiam ruangah a si.

Ramthlo kan ram cu a t'ha tuk. Kan vawlei khal a t'ha i kan tidai khal a t'ha hrih. Thingram an him i ramlak thilsuak a tampi. Kan t'ulhherhmi a um dih. kan pupa san lio ah caanphio, tlawngkhen, thlalang hmang loin innpi an rak dirh kho ko. Bel le kheng t'hat'ha a rak um lonan anmah te an tuah kho dih. An t'ulhherh an i zalh kho dih. Cucu anmai fimthiamnak a si.

Tui san ah Kawlram le hmundang in thil zeihmah cawk ngah lo siseh la kan i simhlawm kho tur maw? Kanmai thiamnak rori in thil kan tuah kho ve tur maw? Mi tampi cu arbawm sak hmanh kan thiam nawn lo. Simduhmi cu thiamnak lam ah kan tlasam tuk cang. Computer san ee, mirang aw san ee kan ti ko nan thiammi taktak kan nei bak lo hih.

Tu lio ah ramdang ah kan um i duhtawk in tangka kan hlawh kho i khua lam ah kan kuat kho. Kan duhmi innhmun loram kan cawk kho. Asinan hmailam ah thazaang in kan i cawm kho ringring lai maw? Cun US le Australia lam a ummi unau nih teh tluangtluan in khua lam ah tangka an kuat kho ringring lai maw? Telefa an nei lai. Tlawng kai an duh lai. Tlawng sang kai an duh lai. Innlo cawk an duh lai. Cu tikah nulepa nih thazaang hlawh mi lawng nih a za te lo lai. Mai fale caah ruah a si lai i khualam i nulepa, unau sungkhat cu ruah a har cang lai.

Cui caan cu a tiang te lai si kawh, tu in kan i timlam cang maw? Kum 1/2 cah men khua ruat lo in Generation tiang ruah a za cang lo maw? Ramthlo nu le pa tampi nih an rak i ruah sualmi cu anmai hmin neihnak ding le an san sungah duhdim um ding lawng an rak ruat. Generation (san) an rak ruat ban lo. An fale, an tule le tusin pawl zei rian seh an ron t'uan te lai i zei in seh pum an i cawm te lai timi an rak ruat ban lo. Cunih a suahpimi cu tu lio mino tampi cu Malaysia, Singapore, Mizoram ah mi kuttang ah thir le phang in tangka hlawh a si.

Kan ruah cang dingmi cu Ramthlo khua sung rori in lianhnak tlak rian a um ko timi a si. Ramthlo khua rori ah rian t'hat'ha kan tuah lai. Mizoram tiang in thil kan hon kuat hni lai. Ramkip ah kan tlawng lai. Thir le phang in mi ram ah rian t'uan hau loin kan khua ah rian neitu dirhmun kan si lai. Kawlram ah rian neitu dirhmun kan si lai. Mi a va riantu si loin mi a va sortu kan si lai timi kan teih a hau cang.
Minung thazaang (human resources) kan neih ko ruangah hihi t'ha tein hman i zuam hraam usih.
Human resources hi ningcang tein tuah cang usih. Unau.. nai timlam cang maw? A tlai hrih lo..

Salai Thawngpi