Khrihfa kan sinak nih a pemh lomi fimthiamnak

Zumtu tampi cu kan piangthar, Pathian kan biak, pumh kan fel, peknak ah kan i zuam phah ko kan ti nan kan nunnak taktak ah nun duhdim kan ngah kho lo. Jesuh nih nun duhdim pek dingah hi vawlei ah ka ra a timi hi zei nun duhdim seh a si hmang? Thlarau nun duhdim lawng maw a si lai? Satan cu thah duh le hrawh duh ah a ra a ti. 

Zumtu kan nunnak ah minung kan si bangin taksa i a nungmi kan si lio ah nun duhdim ngah kho a si lo maw ti hi ruah lo awk a t'ha lo. Pathian nih thu a kan kam mi sung khalah ka thu nan ngai a si ahcun cawitu si loin coihtu ah kan ret hni lai, taw ah si loin lu ah kan ret hni lai a ti. Cucu minung kan nun sungah hin kim kho ve awk a si ko lo maw?

Kan pupa san ahcun fimthiamnak an rak zir lo i an thiammi cu lothlawh fangfang hi a si. Cui dirhmun in Khrihfa ah kan i thleng i zircawnnak ah kan tlasam tuk. Zumtu tampi nih fimthiamnak a hau lo tiah a aupitu an tampi. A taktak ahcun fimthiamnak hi Pathian hnen in a rami a si. Phungthlukbia sungah fiang tein ai ngan. Amahbelte cui fimthiamnak cu Satan nih a hman kho ve. Ramthlo kan dirhmun ah teh?
Zumtu kan si dih ko nan, kan harsat ning, ramdang ah kuli kan i hlawh ning, pumcawmnak ah khual i kan va thih ning, ...Kan khua hi Pathian nih thlawsuah a pekmi ram a si lo maw? Kan khua in t'hansonak a um lo maw? Pathian nih ningcang tein a sersiammi thil kha minung nih ningcang loin kan hrawk. Cui kan hrawkmi cu minung lila nih remh sal le tuah sal a hau. Cuti remh sal le tuah sal dingah fimthiamnak a hau. Cucu Khrihfa nih kan pemh lo t'heu i Pathian, Pathian, Pathian kan ti ko nan minung nih tuah a t'ulmi le zir a t'ulmi kan zir hlei lo ahcun nun duhdim ngah a har ko lai.

Zumtu tampi cu Theory (ruahnak) lam ah kan sang tuk ko nan practical (tuahnak) lam ah kan tlasam tuk. Ruahnak le tuahnak ai tluk kho a hau vel. A ruah lawng ruah lengmang i tuahnak a um lo ahcun i sersiam a har ko lai. ? = ?

Cung Thawng Lian, LL. M