Chindianapolis le Ramthlo unau - Mai Esther Dimte (HLD)

           

 Vuleicung pumpuluk ah raalpi ruangah siseh, tilian thlisia le ruahsia ruangah leimin lomin ruangh siseh, biaknak lam ah himten mah le zumh mi pathian biak kho lo nak ruangah tin a phunphun in mah suahsemnak khuaram a suah tak tu mipum hi rel cawk lo an si cang. Hivialte lakah Laimi khal nih raal tek sinak in tampi nih ramthangso kan tiang cang. Raal tek kan si ngai le si ngai lo cu kan mah hlei lo nih a thei tu an um lo lai. Sihmanhsehla tuisun ni ah Laimi tampi ram thangso a tiang mi lakah kan nih kan khua mi khal in mipum 176 rori North America ramthen ah kan um cang. Kan khua kan ram minung kan i zoh dih tikah kan i thei dih ko. Kan sumsaw le kan neihsiah nih a tlinh ruangah a phan kho mi kan um lo. Kan fimthiamnak nih a tlinh ruangah ram pumpi ai-awh ih ra phan kho mi khal au hmanh kan um lo. Pathian nih kan khua kan ram mi hawi dung kan tan nak a sau tuk cang ati ih hawiphanh zawng phan ve hni sehla, hawi hmuh zawng hmu ve hni seh ti an kan duhsak ruangah kan phut lo le kan tawk lo pin vuleicung vanram an ti mi America ram ah minung hizat kan um kho nak asi. Kan khua mi nih USA vulei kan pal hmaisabik nak hi 2005 ah asi ih tuisun ni ahcun American ram mi sinak a co tu tla 25 kan nei hni cang. Tlawngkai lio mi 42 kan nei hni. Kan fa le an tlawngkainak ah fel man, thiam man, hleicet man tin laksawng dong tu tete tla an um ih kan lungawi pit hni ngaingai.

            Kawlram raltek mipum 50,000 lenglo an umnak peng Indiana ah laimi sung in mipum 10,000 tluk an umnak khua Indianapolis ah kan khua mi tla mipum 26 an um kho ve. Hi kan khua mi sung in inn nei tu khal pathum an um. (Hi khua hi laimi an tamtuk ruangah Chindianapolis tiah Laimi tamdeuh nih duh kawh ah a hmin an phuah sak hngehnge). USA Ramthlo Pawlkomh pi nih kum khat le seu sung timhlamhnak a neih hnu ah July 4-6 tiang kan khua mi pawl a vei(3)nak tonkhawmnak puai pi cu Indianapolis ah hlunghlai ngaingai in kan tuah suak kho. Lam an kan hruai tu Pathian a hmin thangthat in um sin ko seh! Hi tonkhawmnak cangsuak ding in a kakip in tuanvo an kan laksak tu tuanrel committee le fund hawlnak ah khua kip in an kan zonzai sak tu pawl vialte cungah siseh, Cawpi le Vokpi an kan thah ih tirawl thawthaw an kan do tu le tlunnak inn lungawi aipuang ten an kan onh tu inntek pawl cung khal ah siseh lungawinak tampi kan nei.

            Hitonkhawmnak ah ka hmuhtonmi tampi sungin ka lung a ka awi ter tu bik cu mai hringtu nu le pa a kumkum ih hmu lo in an um hnu, mai suahpit unau a kumkum ih hmu lo in an um hnu, mai duhdawtmi hawikomh le sungkhat unau pawl a kumkum ih hmu lo in kan um hnu ah hibantuk tonkhawmnak nih hmunkhat te ah lungawi aipuang ten an kan ton ter mi hi asi. Unau le, innsungkhar pawl, hawikomh pawl hnisiamsi ten an za an i tlaih lio, an i pom lio, thunuam an rel lio pawl ka hmuh tluk ih ka lung a ka hmui ter tu a um lo. Ka mit thlam le ka hnathlam ah an cuang ringring. Mitampi nih cun hibantuk tonkhawmnak hi meeting ruah ah asi ati tu an tampi lai nan kei ka hmuh ning ahcun meeting le i pawlkomh nak ai cem tin kan hmuh. Ngairiamten au hmanh thuhla kan i ruah manh lo ih kan i lengkai manh lo. Tirawl khal hmunkhat ah kan dum khat manh thitha lo. Sihmanhsehla mah le rian cio ah buai celcel cio a rak si ruangah hruaitu dirhmun ih rian nei pawl cu nan rak theih thiam cio lai tiah ruahsannak ka nei. Sunnihlawh hramlak ah nuamten sa kan em ih nuamh nak tete kan tuah hnu ah zaan ah hloptlo ngaingai in Pathian thu le hlaremh dawhdawh, bible zohlosiar le solo dawhdawh thawn kan von i pumh mi te khal ka hngilh kho fawn lo. Kai lunghmuih ngaingai. Kan i za bak ka ti. Kai lawm ngaingai.

            Atuitan tonkhawmank ah saduh ka thah mi tampi sung in a tam deuh cu kan tuah suak kho hni nan then nga ih then hnih tu cu a tuah nak caan kan nei nawn lo. Ka sim cang bantuk in hi tonkhawmnak hi meeting cah lawng sisehla riantuan kho upa vial lawng kan i sawm tur ih kan tuah tur. Sihmanhsehla meeting lawng asi lo ruangah Ramthlo asi mi pohpoh sawm dih kan si ih cuiruangah a ra suak tu pohpoh nih bangran ten caan an co ve awk le an i nuamh ve awk hrimhrim asi. Tuihlan khal ah ka sim lengmang kan khua mi nih kan i remh dingah a tul bik tiah ka hmuh mi pakhat cu CAAN hman hi asi. Kan mah upa puitling cang pawl caan hman dan kan thiam lo ruangah kan pumh veikhat le activity pahnih kan cancel. Hi pahnih ngelcel cancel an si mi hi zeidang hnak in ka pamhmai cem. Zeiruangahseh cancel an si ti cu meeting kai tu vialte nih kan theih dih cio ko lai. Lethnulam hrimhrim ah khabantuk in meeting kan tuah nawn lo dingah khua kan ruat cio a hau. A caan hman ten thawh kho le theh kho tu kan si kho nak dingah siseh, rin cia bang nolh lengmang lo in tawifamkim ten thusim thiam tu kan si kho cio nak dingah siseh, dunghmai zoh bu ten mai duh nak langh ter thiam tu kan si kho dih nak dingah siseh tuisun ni in tantha kan rak lak cio ding ka duh. Kan cancel mi activity kongah tlawmpal ten von kal ta sehla: Kan hngaksia mino hoklak pawl nih timhlamhnak an neih thepthep cang mi fashion show & talent show le Ramthlo thawhkehnak le Ramthlo thawn pehpar in theihkau zirh nak an si. Hibantuk tonkhawmnak caan ah kan mah upa pawl hi a poi mi ah kan i rel i kan hngaksia pawl cu an mah ten kan tlan ter hni men. Hihi kan thil tuah mi vialte lakah ka duh lo bik mi asi. Meeting khal ah minu pawl kutzung khat rel lawng kan si. Zeiruangah Ramthlo nih minu le hngaksia poi kan sak hni lo timi khua ka ruat ah ka ngeih lehlam asia.

            A dang pakhat ka siaherh ngaingai mi le hmuh awk a um lo tluk asi mi cu zeiseh asi tiah cun khual khua nupi an kan thit sak tu le pasal an kan neih sak tu pawl hmuh awk an um lo mi asi. Angaingai ten kan ti ahcun hibantuk tonkhawmnak caan ah nan nupi/pasal nan suahpit lo ah zeitinseh kan khua mi dawtnak lungthin an neih kho lai ih an tlaihsan kho lai? Zeitinseh kan khua mi nih teh kan theih hni lai ih kan mai khuami zoh in kan zoh kho ve hni lai? Damten kan um ih 2016 kan i ton sal tikah cun mikhual a thi mi poh nih nan nufa nan rak i suahpit dih lai ih khualkhua pasal a nei mi poh nih nan pasal fate nan rak suah pit dih ve lai tiah kan nawl hni.

            Hibantuk in upa te nih khua an khan mi cungah vuihram lo ten sumpai kan suah ih kan nihlawh samphal heu in kan ra suak cio mi ka hmuh tikah ka lungkil ten kai nuam ngaingai. Kan khua mi hi a ngaingai ten ti ahcun au van hai lo kan si ko ka ti. Fimthiamnak lam ah master kai lio tiang in kan nei cang. Biaknak lam ah tiah pastor hmanh kan nei ve. Pumcawmnak lam ah tiah mah te rawl dawr nei mi hmanh kan hnih thum phah cang. Riantuan mi poh mawtaw nei lo khal kan um huaha nawn lo. Mai inn le lo man bill ai pek kho lo khal kan um lo. Hipawl vialte hi Pathian that nak ruang ah asi. Kan zaten a hnen ah lungawithu sim ringring ding hi kan rian uak bik asi. Khuaram duhdawtnak lungthin nei ih a ra suak tu unau pawl vialte cungah keimah bulpak in lungawinak tampi ka nei. Hmailam caan khal ah hi hnak ih tam kan suak kho ih hihnak ih tha in kan tuah kho nak ding khal ah a kenkip in ruahnak thatha rak suah cio hram uh!