Hngaksia nun kan simh tikah - Mai Esther Dimte (HLD)

America ram ahcun hngaksia hi hmaisabik ah an ret hnu ah thil dang vial te an tuah nan kan nih ram ahcun hngaksia le hngaksia tla kan umh ter hni men ih kan duhduh kan tuah in kan tuan. Keimah cu innsungkhar nei ih fate nei mi ka si hrih lo nan kan nu le kan pa pawl ih nun an kan simh ning, ka hawikomh nu le pa si cang mi pawl ih an fa le nun an simh ning le kan pawngkam um ram dang mi pawl ih an fa le nun an simh ning pawl ka zoh sal hni tikah khur khua ruat lo awk tha lo in a um ih thudeihnak khal ka nei cih ve. Cucu zeiseh a si ti ahcun kan fa le nih maw an kan uk asi lo ah kan mah nih seh kan uk hni ti hi asi.

Hngaksia nun kan simh tikah a caan zoh kan thiam maw? An i nuamh salailing ih rian kan fial ahcun kan thu an kan el tengteng lai ti cu theih cia asi. An hawi le hmai ah siseh, an i nuamh lio ah siseh, a caan lo pi ah nun kan simh hni khal silen an ngai lo lai ti cu kan theih hrimhrim awk asi. Kan fa le an mah le lungthok ten an i nuamh lengmang lio ah rian kan fial hni tikah nidang ih an tuah theu mi a si ko hmanh ah an kan el. Cutikah kan ai a thok. Kan ai a thawh nak diriam ter awk ah kan fa le cu kan vuak hni. An nun an i thleng maw thleng lo ti cu kan vuak nak a fak mi a dam tiang lawng a nguh hni. Zeihmanh thathnemnak um lo in kan fa le kan vuak lengmang hni tikah kan mah tih lo in kan funghreu lawng an tih cang. An duh mi thil cu vuak ka tuar lai ti thei bu in an tuah thotho. Kan vuak tamtuk hni ruangah an i ngeihngam cang. Vuak nak nih thil tha hnak in thil tha lo a suahpit tam deuh. Kan vuak mi nih zei ruangah vuak a tuar ti thei huaha lo in a zeimawmen lo ah kan vuak hni. Fa le hi vuak awk ah Pathian nih an kan pek mi an si dingah ka zum lo. Amahbelte a luarpar kai tuk ih an um ah simaw, upa tihzah upat hna thiam lo in an doh teltel ah simaw, an kum khua thawn i kaih lo pin an rin holh ah simaw, an cin ding rori le an i thinh ding rori in vuak bak ding an si ko.

            Vuak a tha lo kan ti. An i nuamh lio ah rian fial lo ding kan ti. An hawi le hmai ah nun simh hni lo ding kan ti. Asilen zeitinseh kan fa le rian kan fial lai, thu kan simh lai ih nun kan simh hni lai tiah thudeihnak uakpi a suak kho. Mirang pawl tampi cah cun hi thudeih nak hi a leh an i tha lo lai tiah ka zumh. Sihmanhsehla kan nih Laimi tampi nih cun kan thinlung um ek in kan leh duh ding ka zum lo. Cuiruangah keimah fa nei hrih lo mi nih a nei cia pawl cah kan leh sak hni lai. Hngaksia an tuah ding na duhsak mi kha a hlan khan ten sim hni cia aw la minute panga duh hrawngah “khah minute panga caan na nei” tin theihternak nei hni. Cuhmanh cu awkam sia le mithmai sia thawn sim hni hlah! Cui an duh hlei lo silen funghreu i lak colh lo in an duh tuk mi thil sung in pakhat khat kan lak sak lai tin ti hni aw la na fial hni ning ten an tuah lai. Cuncun, nan um men caan ah, lam nan len caan ah, pumh tlun kal phah ah sungkhat unau thu, Pathian thu le hawikomh thu tin thu dangdang kha upa thuruah ten ruah hmanh uh an ruahnak le an thinlung amah ten au ih lungfim suah sal hau lo in an i thleng thluahmah lai. Na sungsuak na fa ih a duhnak na theih ahcun na theih mi kha tuah kho i zir. Na theih lo silen deih aw la na duh nak khal sim ve. An mah nih ka rawl tam, ka ti hal an ti tiang hngak hlah. An mah nih ka ih hmuh an ti tiang hngak hlah. An mah nih lam len ka duh an ti tiang hngak hlah. Taksa thinlung le thlarau ah puitlingten an than kho nak dingah thlacam sak lengmang hni. Cuncun, kan dawt tuk timi sim lengmang hni. Khual na um khal silen upa bantuk in phone sawn hni, ca kuat hni aw la na dam le dam lo, na ngai hni le ngai hni lo, na tuah mi thil sim ringring hni.