2015 Christmas Message - Pastor Bawi Cung Lian

Thuhmai hruai:

Christmas kan thleng la la. Christmas hi ziang so a si? Theih ol zet in kan sim a si le cu, Christmas ti mi cu “Jesuh Khrih suahni lawmnak pui pi” tin kan ko thei. Cuih pui cu inn sang lawng a si lo, lei tlun za ih tuah mi pui a si (cosmic celebration). Christmas ih a sung mu ril simfiangmi cu “rundamnak” a si. Kan nauhak lai ah, Falam khuapi ih Baptist Sunday school nauhak pawl Christmas kan hmang tin ten, a veng veng ih ring zet ih kan au theu mi cu .. “Jesuh Khih, Jesuh Khrih… a suak zo, a suak zo/ Leitlun hmuah hmuah run dam tu … a suak zo, a suak zo” ti a si. Tu ni tiang ka hngilh thei lo, tu ni ning Falam nau hak pawl cun nauhak Christmas puai an tuah tin ten an au ring ring ko.

A si nan, tu ni cu, Jesuh suah nak ah “rundam ding ah” tin si lo in Jeush suah nak hi kan hrang ah “tangdor nun nei ding ih zohthim ding in a rung suak” (a model of humility for humankind), tin kei ka hrilh fiah duh. Jesuh in nunnak in kan zir ngah thei mi cu, kan milai sinak leh kan milai neih nak ah porh aw ding a si lo ti mi hi a si. Ziang ah ti le a mah Jesuh ro ri hman “Pa” thawn sinak bang rep ten nei mi a si nan, Pa Pathian thawn kan bang aw ro ri tin a ti awk dah lo. A sim sawn mi cu, hi lei lung tlun a rat san nak hi “mi dang hrang ah nung mi a si nak” leh “tangdor nun a neihnak” sawn hi in sim fiang duh mi a si sawn theu. Cu ruang ah, Christian hrang ah tangdornun hi a thu pi ngai ngai mi nuncan ziaza tthatnak a si tin kan ti thei, (Being humble becomes a virtue in Christian living), cu vek tho tho in Chiristian pawl in cuih sinak cu kan nun tluan kan nun pi leh kan cawng ring ring tul mi a si fawn. A si nan, khat lam kap ah, tangdornun kan ti mi hi pulpak ih thinlung nuncan dan hrampi (personal ethics) leh nun ziasia (weak character) lam sawn ah a tlu pang a si le cu Paul ih a sim leh a zirh mi “Nan thinlung putdan cu Khrih Jesuh ih thinlung putdan vek in si seh” (Filipi 2:5), thawn cu a kalh aw men thei. Cu cu ral ring a tul mi asi.
(Personal ethics leh weak character in cu … a poi lo ding, kei thawn ka saing lo, a dik si le tla kan neh thei cuang lo ding … no fighting for rightness. Hi vek lung put keng mi kha a sawh duh mi asi)

A. Tangdornak leh Pathian Kan Theih Dan

Jesuh hi Lei tisa ah a hung cang (incarnation) ti hi cu Kawl pawl, a hleicein Buddhist, hrang ah cu a har ngai ngai. Cu vek thiam thiam in, Jewish leh Greek pawl hrang ah cuih thu cu co hlan a har zet mi a si. Thuthimnak ah, Jewish pawl hrang ah Pathian cu a thiang hlim tuk mi a si ruang ah cuih a thiang mi Pathian cu a thiang lo mi Leimi pawl thawn cok bolh in a um thei lo. Cuih thianghlimnak cu Pathian leh mi nung a tthen (separate) bik tu a si. Cu raung ah, Jewish pawl hrang ah cun Pathian minung ah a hung cang ti cu a cang thei lo vek in, cuih thu a zum tu cu a rak hnih suak zet ve. An hrang ah, Jesuh cu minung taksa ah a hung cang ti mi cu “Jesuh ih tangdornak leh Pathian kan neih te ah a um” (Humbleness and nearness of God) a si tin hmu ding cu a rak har tak tak a si. Cu raung ah, Jesuh ih lei tisa a rak cangnak cohlan kan ti mi cu, Jesuh ih tangdornak kan nun in kan thei ti lawng a si lo Pa Pathain kan thei dan ro ri tla a thleng ter ti nak a si. Cu le, Pathian cu milai ih theihtheinak leh milai ih kan tlaang khamnak (frame) thawn thiehfian a theih lo ti nak a si. Cu ruang ah, Lei tisa a cang mi Pathian sinak (Incarnated God) in in zirh mi cu “Pathian cu a cak mi leh sunlawih tlak Pathian asi” ti hnak in “Pathian cu kan hrang ah duhdawtnak leh tangdornak nun thawn kan sualnak in tuar sak tu Pathain a si” ti sawn hi in hmuh ter mi asi. Cu vek thiam thaim in, tangdor nun nei mi kan si le lawng tangdornak thawn a sinak hi leilungmi hrang a pe tu Khirh Jeush ih puanawknak (revelation) cu kan hmu, kan thei, kan tep thei ve ding ti nak a si.

B. Hlawhtlinnak (success) ai ah Tangdornak

Hlawhtlinnak hi “Ziangtluk a lian? Zung tluk a fim? Ziang tluk in cak, a mawi, a thei? Ziang tulk a nei?” ti mi pawl in kan tah thim theu. Khat lam in kan ti a si leh economically, socially tah fung hnuai ah cuih lawhtlinnak cu hrilh fiah a si ring ring theu. Jewish pawl tla “Messiah” ti ah an rak hngak mu cu, kan sim cia mi fahfung pawl thawn a ra ding mi siangpahrang kha a si. Hman seh la, kan Bawipa Jesuh cu cuih tah fuang pawl thawn melawkmi sinak in a ra lo. Cu tin kan ti tik ah, cuih hlawh tlinnak pawl cu Jesuh in a do ti a si hrim hrim lo. Lei tisa sinak (incarnation) in leitlun liannak, neinak, cahnak si lo le milian, micak, mifim pawl a do ti a si hrim hrim lo. (Falam hla pakhat ka mang ro ri… cu cu.. miaa pawl ih Pathian, Farah pawl ih Pathian tivek kha. Cu ti ciah tla a si cung lo.) Ziang si Jesuh ih do mi cu? Jesuh in hi nah zawn ih a duh lo sawn mi cu, minung sinak (Value of human) kha munung ih tuahsernak pawl thawn tahfung lak ta hrat ih, (Tahfung question pawl kan tar lang zo), a hlawn tlin mi si leh si lo thencatsak mi kan si nak kha a si. Milai ih kan si nak cu milai ih tahfung men in a si nak sim fiang a theih lo.
Thuthimnak ah, tlawng na kai ih degree na ngah. Hnatuan sang zet na ngah ih na inn sang thawn nuam zet in nan um. Inn tha zet na lei thei ih na thlahlawn thawn na inn sang nun nuam zet in nan um. Hi pawl hi a tha maw? Tha tuk ee. Hlawhtlin mi pa/nu na si maw? Si tuk ee. A si nan, a fam kim maw? Cu mi cu a thu pi zet mi a si. Misenpi in cuih din hmun a nei tu cu hlawhtlinnak nei tu tin ka ruah ruah ah cuih din hmun kan thlen cun kan di a riam ih kan hna a ngamnak cu a si. Jesuh Khirh nun nak kan zoh sal a si le cu, cuih tahfung pawl a tlin mi a mal zet ding. Hnatuan sang a nei lo (Manager a si lo). Inn tha zet tla a nei lo, tangka tla a nei lo ih milian tla a si lo. A si nan Jeush cu a nun ah sunmang (Vision) fiang zet mi a nei (Luka 4:18-19). Cuih sunmang in cun a nun nak ah lei mi pawl ih tahfung ih hlawhtling mi pa si ding ah a feh pi lo ih Cross par ah khenthat mi pa si ding mi din hmun sawn kha a pe a si. Cu ruang ah, tangdor nuh ti ah Jesuh ih in zirh re ro mi cu sunmang tha nei ih nunnak ah thih cih ngam mi zumnak nei kha a sim duh dawn mi a si. Thihcih ngam mi vision leh zumnak na nei lo le cuih na nun cu ziang hman lo a si. Sim duh mi cu, tangdor nun kan ti tik ah, mi lian si lo ding ti nak a si hrim hrim lo, tangka nei lo ding ti nak a si hrim hrim lo. Lian cing leh pei sa nei cing khal ih nun ram ah thih ngam mi zumnak thawn nung mi nun kha sim duh deuh mi a si. Leitlun ih hlawhtlin nak tahfung pawl ih hlawh tlinnak kha a si lo. A famkim mi nunnak thawn nun sawn kha a sim duh sawn mi asi.

C. Tangdornak cu Cohlan leh Hlawmawknak nun a si

Jeush ih Lei tisa sinak (incarnation of Christ) cun mi nung pawl ih “milai kan sang bik ti mi lung put” (hierarchical mentality) kha in thleng sak a si. Paul in Filipi 2:7 nak ah hi tin a ti “cu ai-ah, a mah ih lungtho tein, a sinak hmuahhmuah a taansan ih, hnen-um sinak la tajratin, minung ah a cang ih minung pianzia a piang,” tin a ti. A sim duh mi cu, leimi sinak cu Pathian sinak hnak in a niam zet tinak a si ih khat lam ah tangdornak kha fiang zet in a sim cih fawn. A si nan, mi lai nun nak hi man a nei lo (value a nei lo) ti nak cu a si hrim hrim lo. Pathian sinak vek cun a si lo nan, minung si nak ih “man” (human value) cu niamzet in a hmu cuang lo. Pathian leh minung cu a bang rep cek ci mi sinak dinhmun an nei ti nak si sawn lo in, minung in tla man (value) a nei mi nunnak a nei ve ti duhnak a si. Khat lam zawng in kan hril fiah a si le, ramsa pawl tla minung vek cek ci ih sinak dinhmun nei tu an si lo nan a mah leh sinak leh man (value) cu za ah za a nei ve mi an si ti nak a si.
Cu ruang ah, Jeush ih Lei tisa sinak (incarnation) ih sim duh mi cu, mi lai cu Pathian hnak in an niam sawn ti si lo in, cuih milai sinak ah Pathian cu “umhmun a rak la” ti nak a si. Jesuh cu Pathian sinak kha tan ta in Leimi sinak a lak kan ti mi ih sullam cu, Pathian cu vancung ih sidan um zia (divine nature) si lo in leitlun umdan si zia (human nature) thawn a thuam aw ti nak a si. Cu ti thiam thiam in, Jesuh ih incarnation cun “Pathian cu leimi sinak kha a cohlang ih a hlawm aw a si” ti mi hi fiang zet ih in sim mi a si. Cu vek thiam thiam in, minung pawl in the Pathian ka cohlang thei ve maw, a mah ih in cohlang vek in? Cu le, kan sinak leh dinhmun pawl kha kan ruang pi, sung khat leh uu nau pawl hnen lawng si lo in kan ram leh kan king kang ih satil (non-human) hen ah teh kan hlawm thei ve maw? Hi hi kan ruah tul bet mi a si.

Conclusion:

Lei tlun mi hmuah rundamnak co theinak ding ih Jeush ih Lei tisa sinak a rak hlawmawknak cu pulpak hrang lawng a si lo (not just for personal salvation). Pathian ziang tin ka hmu, ziang tin kan thei, ziang tin kan ruat ti mi pawl le lei tlun nun ah ziang tin kan nung tul ti pawl tla khat lam zawng in in hmuh mi a si. Jesuh ih Tangdornak thawn lei mi si nak a thuam awk nak cu, nang leh kei ih rundamnak hrang ah cu a si. Cu vek thiam thiam in, nang leh kei in kan zum mi Pathian si seh, kan kiang kap ih nunnak a nei mi thingkung ramsa hmuahhmuah teh ziang tin kan zoh ding ti tla in zirh cih mi a si. Thu net nak ah, Leimi sinak laknak (incarnation) cu thlarau lam (spirituality) lawng a si lo, tisa sinak (humanity) tla a sim fiang mi a si.

Pastor Bawi Cung Lian
Hong Kong