Rev. S. Ni Luai Interview!

HLD: Na chuahnak khua, chuahnithla le chuahpit unau pawl nan kan chim kho hnga maw?

NL: Ka chuahnak khua cu Falam Peng, Ramthlo khua asi i July 22, 1958 kum ah ka chuak. Pu Sui Hnin (tleicia) le Pi Zu Taang (tleicia) te'i an fapa upacem kasi. Ka nau le cu Pa Hmet Al le Nu Zing Cer an si. Ka nau nu a hniangcem Sung Par nih a kum 7 cam ah mual a kan liam tak i nihinni tiang ka philh kho lo. Ka hmin hi ka nu’i ta pa pu Khar Kung (tleicia) nih San Piang le Ni Luai tiah a ka sak i ka pa le nih cun Sante an ka ti na in ka nu nih cun Ni Luai tiah a ka auh ca-ah nihin ni tiang Ni Luai tiah an ka auh colh nak asi.

HLD: Vuleicung fimthiamnak lei ah tang zeizat tiang dah siang na kai i Bible ca lei ah tah zeitiangdah na kai timi zangfahten kan chim hram.

NL: Vuleicung fimthiamnak lei ahcun taangli tiang lawng ka kai kho. Hringtu ka nu nih taangli ka kai lio ah a kan thih tak i siang ka kai kho ti lo. Kalaymyo i Emmaus Theological Seminary ah Bachelor of Religious Education (B.Re) ka kai i 1999 kumah ka dih. Cun, kum 48 ka kim hnu ah ka tu le ka fa le tampi an umnak Malaysia ram ah pathian riantuan ah ka kal. Cuka i GOON Institude ah Certificate of English Course zong ka kai i 2007 kum ah ka dih.

HLD: Pathian nih a riantuantu dingah an auh ning hi zeitindah, khoi ka in dah na theih? Cui an auh nak na cohlan veten a riantuan nai domh colh maw?

NL: Piantharnak ka co nak cu 1980 kumah Dr. Thein Hte nih Mandalay ah crusade a tuah lio ah asi. Ka pianthar hnu ah Police rian ka kal tak i Say Thein Hte sinah Discipleship Training thla 6 chung ka kai. Mah hnu ah ka chuahnak khua Ramthlo ah ka tlung. 1991 kumah ka pi Bawi Pian nu nih ramthim (missionary) ah thawngthabia chim dingah nan innchungkhar in kal uh tiah bawipa nih chimh a ka fial ti in zingfatin zingthum chung kan in lengah a ra au. Cucu bawipa auh nak asi tiah ka co hlan i Rakhine ram, Ann khua ah 1992-1995 tiang kan innchungkhar in kan kal. A cui hmun ah cun ka fapa Van Bawi Ceu nih a kan thih tak. Atu zong hi Ann khua ahcun ka chungkhar le hen bawipa rian tuan ding ah kan um than. Atu ah kan umnak ah zumtu 700 lenglo bawipa nih te le fa le u le nau a kan pek cang. Pathian auh nak ka fian vete in vulei cung chawva lam hnak in pathian sin i ka rak kal ngam nak kha amah vel thawng in asi ko.

HLD: Malaysia ah kum ziat chung dah pathian rian na tuan? Malaysia i kan laimi le kan khuami pawl na hmuh hna ning le saduh na thah piak mi hna nan kan chim kho hnga maw?

NL: Malaysia ram ah kum ruk dengmang ka um. Malaysia ram ah Mission riantuan kho ding in lam a ka hruai tu pathian cungah siseh ka khrihfabu hruaitu Bishop Dr. C.K No Chum cung zongah ka lawm tuk. Kan laimi le kan khuami ka hmuh hna ning cu kan laimi cu sifak ram i a ummi kan si bantuk in ramdang kal cia mi pawl hi kawlram ah pathian riantuantu tampi a kan bawm tu tha an si lai tiah ka hmuh hna. Pathian thawngtha ka chim zongah atambik cu zu ding le sa ei men in um hlah uh pathian nih kan ram sifah nak le kawlram ah missionary fak pi in kan tlah khawh nak lai ca-ah amah nih ram dang kal nak lam an kan onh tiah ka ti zungzal. Kan khua mi hi ka tu le ka fa le lawngte ansi i saduh ka thah cem mi cu vuleicung ram rumnak ah ka khua mi le ka fa le hi va kal kho hna seh law siang hna va kai kho hna seh law ti tluk in a dang saduh thah awk ka thei lo. Ka thlacam nak zong asi cem. Zeihmanh ti khawh mi le tuah piak khawh mi ka ngei lo na in hruaitu pawl sin ah kan khua le kan ram minung pawl ka philh piak hlah uh tiah an hmin te te ka chim tawn hna. Pathian thawng in USA ram hna ah tampi an kal khawh cang i ka lawm tuk.

HLD: Malaysia na um lio ah UN i lut ding in opportunities tampi na ngei ko na in na lut duh lo nak kha zeiruangah dah asi? Kan ram na tlaihchan ruangah maw, pathian riantuantu nih lih le hrokhrawl bia chim phung asi lo tin tuahsernak in langhter na duh ruangah dah asi timi nan kan chim kho hnga maw?

NL: Malaysia ram in ram dang kal nak lam tampi le caanremcaan ka hmuh ko. Bawmtu hawi komh tha zong ka hmuh hna ko. Kan chungkhar tein ramdang um zong ka duh tuk ko. Kawlram ka tlun ih Rakhine ram theng ah missionary kan kal nak asan cu kan lai miphun pathian vel thawng in ramdangah an tling dih. Rakhine ram i a um mi kan laimiphun tinghnih lenglo nih Jesuh hmin in pathian sinah thla an cam ve lo ah cun zeitin dah thlachuah an dawn kho ve hnga ti mi aw thlam ka hna ah a khat tuk. Cun pathian rian kan tuan ih Rev. kan lak lio ah khin ka thih tiang thawngtha ka chim lai i pathian rian lawng ka tuan zungzal lai tiah biakamnak kan tuah. Kan bawipa Jesuh sin i ka kam mi ka bia ka tlin ter lo ah cun pathian ka tih ruangah le a thiangthlarau aw ka theih ruangah kawlram ka tlun nak san asi ko. Ka dinfelnak le ka that nak pakhat hmanh a tel lo. Kei cu kan laimi vialte lak ah hin a sual cem atling lo cem ka si ko ee. A si nain thiangthlarau aw fiangtein ka theih mi cungah lung aw tawm nak ka ngei lo.

HLD: Malaysia in na tlun hnu Rakhine ram ah missionary na kal ti thawng kan theih. Hi na riantuannak ah ho nih dah thlahlawh an in pek? Aho hmanh i thlahlawh pek mi na si lo cun zeitindah mah rian hi nai thawh kho? Zeitiktiang dah hi rian tuan nai timh? Atu lawlawse i na rian kongkau le harsatnak tete nan kan chim kho hnga maw?

NL: Cathiang nih thlahtu an um lo ah cun zeitindah thawngtha an chim lai. Thawngtha an theih lo ah zeitindah an zumh kho lai, an zumhlo ahcun zeitindah thla an cam khawh lai, thla an cam lo ah cun zeitindah thlachuah cu an hmuh lai tiah ati bang in Rakhine ramah ka kalnak I ka thlahlawh hi USA ka fa le pawl le Thantlang khua mi pu Aluai le pi Ngun Hliang te chung nih an ka thlah. Ka khrihfabu sin in nawl a ka pe tu le a ka bawm peng tu Bishop Dr. C.K No Chum te chung an dihlak cung zongah ka lawm tuk. Pathian nih rem a ruah tiang Rakhine ram ah ka um ko lai. Kan laimi nih Jesuh hmin an theih dih hlan tiang khua te le khua pi ah ka kal leng mang ko lai. Kum ri khiah ka ngei lo. Thiangthlarau aw ka hngak ko. Harnak kan ton kan ti mi cu chim ngam ding an si lo. Kan bawipa Jesuh le zultu hna i an tuar mi harnak he cun kan nih kan ton mi harnak cu chimawktlak a si lo ka ning leh lam a zak. Ka lawmhnak bik cu ka fa pa Siang Lian Thang nih a ka zulh khawh peng mi hi asi. Ka tar cang i ke hen kal lengmang a hau mi cu kai harh ngai. Thawngtha kan chim i Jesuh cu khamhtu le bawi ah an pom i tipil an in ahcun cu hnak i adang lawmhnak ka ngei lo.

HLD: Nang hi kan khua Ramthlo mi vialte lawng nih si lo in kan laimi lakah zohchuntlak, bochantlak le upat hmaizahtlak na si i mipi pawl nih nangmah bantuk in zumhnak ah a fek khoh mi kan si kho nak lai ruahnak na kan pe kho hnga maw? Ahleice in mino thangthar tete nih thlacam le pumh kal kan huam lo tuk mi hi zeitindah kan i thinh kho hnga? Nang khal mino in a thanglian mi na si ve bantuk in kan pawl mi hawi le nih an kan siatsuah kho maw, kan mah ten dah kan i tuah sual hoi timi nan kan hrilhfiah kho hnga maw?

NL: Malaysia ram ka um lio ah hin ka ziaza le ka thiamnak ka fimnak i zohchun uh ti awk chim ding mi ka ngei bak lo. Asinain pathian ka zumh tluk tal in zum ve uh law, ka zumh ning hi i cawn uh tiah ka chim zungzal. Zumhnak nun cu Heb 11:1-40 zongah kan hmuh. Mino caah a tha cem mi cu thlacam nun ngeih hi asi i cun bible rel zungzal a hau. Ka kum hi 55 ka thok cang ih bible rel lo in nikhat hmanh ka um lo i nikhat ah a ngan pa 5 cu ka rel zungzal hi hi ka cawng uh ti ka duh. Cun thlacam zungzal uh ti asi ko. Thlacam caan ah athacem i ka hmuh mi cu zinglam 12 in 1 kar lak hi asi. Hi thlacam nak nih hin ka nun a than ter. Cun, hawikomh ca-ah bible rel le thlacam hi si seh law ka duh ce. Cathiang ah hawikomh tha lo nih ziaza tha a hrawk ti asi. II Cor 15:33 ah mah le mah nun i chimh kho hi teinak ngan bik asi tiah kan hmuh.

HLD: Tuihnu kumhra ah hin kan lairam asiloah Ramthlo hi thlarau lamah zeitindah hmuh na duh? Cui na vision chungah cun nang nih teh zeibantuk in dah nai tel kho ve lai? Ramdang, khuadang le miphundang cah lawng rian na tuan tiah mi cheukhat hmurka in theih a um theu mi hi zeiruangah dah asi? Na saduhthah le na chunmang an fian kho nak dingah na rak chim kho hna hnga maw?

NL: Kan khua lawng si lo laitlang ka tlawn caan ah hin laimi phun zawn na ruat lo kan mah hi ram mui kan si an ti tawn i ka leh mi hna cu kan lai mi (chaklei laitlang) nih Jesuh kong cu kan theih tuk cang i an zumh duh le duh lo lawng asiko. Kan lai miphun (asu chin, khami chin etc..) tampi Jesuh khamhnak kong athei lo mi an tam tuk rih le asi ko. Kan laimi caah ka saduh thah cu bawipa Jesuh rat than nak a neih tuk cang i vulei thilri ah faktuk in kan lung pe hlah uh si ti hi asi. Jesuh thianghlim ten ton le a rian thiangah thlah tu maw chimtu ah ka tel lai ti hi pakhat nak ah ruat uh si la ka duh cem.

HLD: Hmunzakip um Ramthlo unau pawl sinah zeidah ruahnak pek na duh? Zeibantuk in dah pathian riantuannak ah i tel ve hna sehlaw ti na duhpiak hna? An mah nih pathian biachimthiamtu an si lo ruangah daiten a um men tu an si nak hnga lo kan mah le kan riantuanmi cio, ngeih mi fimthiamnak le thazaang pawl hen pathian riantuan kho asinak lam pawl na rak kan hmuh kho hnga maw?

NL: Hmunzakip um Ramthlo unau pawl sin ah ruahnak pek ka duh mi cu kan biak mi Jesuh khrih i nun thianghlim hi i tawm khawh uhsilaw kan ti khawh tawk te in bawipa riantuan khawh peng u si ti asi ko. Pathian riantuannak ah chim tu maw thlahtu asi lo ah thlacamnak le nuncan ziaza he pathian hmin kauh ter u si ti hi asi bik ko.

HLD: Acung i biahalnak ah ai tel lo na in kan khuami hna nih kan theih ding abiapi tiah na ruahmi zangfahten rak kan chim hram!

NL: Adonghnak cemah ka duh mi cu kan caan a tawi tuk. Caantha hmuh hi ahar tuk ti hi fiang uh si! Caantha kan hmuh lio le kan dam lio caan le tangka kan kawl kho lio caan ah hin caantha hman thiam i zuam uh si! Thawngtha chimtu thlah le nu le pa innchungkhar cawm kho tu si ding in saduh that uhlaw thlacam zungzal uh! Bible ca rel zungzal uh tiah cah kan duh hna. Kei santlai lo hibantuk in interview a ka tuahtu Dimte cungah ka lawm tuk. Ka tu le ka fa le nan umnak cio ah pathian nih thlachuah in pe sin sin ko hna seh! Zeizong vialte hi pathian thatnak ruangah an si ko ee.

HLD: Rev. S Ni Luai, hibantuk in ka biahalnak vialte na ka cohlan sak i na caansunglawi na pek ca-ah na cungah lunglomhnak tampi ka ngei. Pathian nih tuihlan in lam an hruai cang bantuk in atang lio mi caan zongah a ram karhzai tertu ah ron in hmang chin hram ko seh!

Areltu nan dihlak cungah bawipa thluachuahnak um hram ko seh!