Pi Ram Taang (75) thlahnak capar!

Kan nih innsaang riahsiatnak ah in rak riahsia pitu zumtu unau, sungkhat unau le kawhhranpi pawl nan zate parah lungawinak tampi kan nei asi ti a hmaisa ah sim ka duh. Ka pi nan rak duhdawtnak cu tuisun a ruak ni ih nan ra thlah nak hin nan langter mi asi ruangah a nih khal in vancungram in hnisiamsi ten a lo hmu hai ko ding. A dam lo pek te in sizung ah in fehpi ih in um pi tu, in veh tu le thla in cam sak tu nan zate parah kan lungawi zet asi.

Ka pi hi sungkhat unau tampi nei mi asi lo. Fimthiamnak tlawng kai dah khal asi lo. Mi lian le mi neinung khal asi lo. Sihmanhsehla thlarau lam ahcun milian zet asi. A mah um lo sehla tuisun ni ah a tefa, a tufa le pawl hivek dinhmun kan thleng lo ding. Ka pi ih sunzaan catbang lo le a dam lo lai khal ih catbang lo ih a thlacamnak liolio ruangah Pathian nih thlasuah malzaa in ron sawm asi. Kan innsaang sungkhat unau rual hrangah thlasuah in phurh tu bik cu ka pi hi asi. A dam lai ah mi vek in nunnuam zet in kan ret thei lo nan ziangtik lai caan khal ah a phunzaai dah lo tu le mi kawk dah lo tu asi. Ka pi vek Pathian thei, rinh um, hmuhton mi kip ih lungawithei nupi nu cu kan khua le kan ram ah simaw, kan kawhhran pi ah simaw a mal bik pa hra tel um hai sehla kan khuasung le kan kawhhranpi cu taksa, thinlung le thlarau thumkomh in a harhdam ngaingai ding asi tiah ka zum. Ka pi vek ih mi piangthar le mi thinsau, thlacam nun nei le mi ngaidam thei nun nei tu si hi ka saduhthah asi ringring. Pathian ih thlasuah a pek mi damnak ruangah simaw, sumpai ruangah simaw, umnak inn le lo ruangah simaw, in ei ding tirawl ruangah simaw, sinfen ding hnipuan ruangah simaw lungawi thusim a bang dah lo tu asi. Pathian hnen ih a sim lawng tawk ati lo ih Pathian ih mifa pawl umnak biakinn ah zumtu dang pawl ih zohthim ding tlak rori khal in lungawithu asim ringring asi. Ka dam lo lai tinten sibawi ka hlam hlan ah ka pi ka hlam hmaisa ringring. Ziangruangah tilen ka pi in Pathian hnenah “Na fanu hi ron dam ter hram aw tiah Nazareth Jesuh Khrih hmin in zaangfah ka lo dil” tin thla a cam ah cun Amen a tuah manh hlah ah ka dam zo in ka thei awk theu. Cucu ramsung ka um lai thu asi ih atu ramleng ka um hnu khal ah ka dam lo caan ah simaw, innlam ka ngai caan ah simaw ka pi hi ka hlam hmaisa ringring theu. Ziangruangah tilen a nih cun phone biak tinten “Dimdim, ka lo ngai tuk. Bawipa nih thlasuah tampin lo pe sehla kan ram le kan miphun hrangah lo hmang ko seh” tin ziangtik lai khal ah ti lo in a um dah kel lo. Manh lo lai tak le phone card thun rero tul cing khal ih biak phu tuk mi cu ka pi hi asi. Keimah vek pi nei tu hi cu Pathian thlasuah co ngaingai tu an si. Atu khal a dam lo ti ka thei cingcing in “Pipi, America ah Master tlawngkai ka duh ih thla in cam sak aw maw” tiah ka ti ih “Um” in ti. A dam lo cing ten thla a rak cam rero ih tuisun ni ah Pathian in a thlacam a ron let asi. Ka pi cun a thei manh nawn lo ziangruangah tilen a thlacam lai in a it that lan ta ruangah asi. A thawthawt netabik tiang rori ih a te le fa, a tu le fa, a sungkhat unau, khuapi le kawhhran pi hrangih thlacam thei cu ka Pi Ram Taang hi upat lo theih lo asi. A nun hi cawng uh sila kan tefa, tufa le sungkhat unau, kawhhran pi zaten a mai fehnak hmun vanramnuam kan thlen thei ve nak dingah thlacam uh si!

Ka pi hi Pathian thawn a zaanmang in an biak awk ringring ih Pathian ih a fial daan vek in thlacam ringring tu asi. Inn khat ih kan um tlang lai ah zaantim mi kan it that rero lai ah tho in thla a cam ciamco theu ih cucu tuisun ni ah ka ngai bik mi asi. Kan nauhak deuh lai ah biakinn ah lungawithu asim rero ruangah mi nih in sawi theu ih ka thinlung ten ka thin a rak heng zet theu. Asinan, tuisun ni ah in rak sawi tu um hai sehla ziangtin ka let hai ding timi cu ka pi nih in zirh ta mi a um ruangah ka thiam zo asi. “Kei cu minung thangthat ka si lo. Minung mithmai zoh khal ka si lo. Pathian mithmai zoh in toidor ten a thusim ngai tu le lungawi thusim nunnak in a hnatuan tu a siahlawh men ka si” tin ka pi nih in sim ta ih cui thu cu tuisun ni tiang ka thinlung ah a caam. Ka pi vek rori in mi ngaidam nun ka nei thei ve nak dingah le minung mithmai zoh lo in Pathian mithmai zoh tu ka si thei ve nak dingah thla ka cam asi.

Tuisun ni ah nan nihlawh le nan tikcucaan sunglawi kan nih innsungsaang hrangah in rak pek ih ka pi nan upatnak nan rak lang ter mi cu kan san sung kan hngilh thei lo ding ih a kumkhua kan thei ringring ding asi. Kan lungawi tuk ti lo bak lo sim ding kan nei lo. Kan hrang ih nan eh heu mi le nan cemnak hmuahhmuah cu Pathian in a let sawm a let zaa in thlasuah lo pek hai hram ko seh! Kan lungawi!

                                                                                               

Bawikrih ah nan unau,

Dimte, USA