Dear Papa ............

Vanram ah an kan peem tak tu Papa,

Ngainak tampi thawn na kal tak mi na duhdawt mi na nupi, na zohkhop lo na sungsuak na fahniang le, na suahsempi na laihritlai na far le pawl mual nan kan liam tak nak kumkhat a rong kim ruahmah cang i Pathian hnenah thazaangthar la sal ding in tuisun ah kan in mang asi. Tikcu le kumcaan cu nikhat hnu nikhat tlaih kho lo in liam lengmang hni hmanhsehla nang nan kan liamtak nak cu kan thinlung sungah mizaan bantuk asi hrih ko e. A thar tuk hrih ko e. Vuleicung ah hin zeihmanh a hmun zungzal mi an um lo. Kan nitin nunnak ah zeiseh a thupi cem hmang ti hmanh ruat huaha manh lo in kan nithla kan liam ter mi pawl hi pam an va hmai ve ka ti. Kan in dawt tuk ti hmanh lungdiriam ten kan in sim manh hrih lo. Papa, nan kan kal tak nak ni 365 a rau cang nan na cah i kan tah nak le kan hram nak mitthli cu a tu tiang a hul kho hrih lo e. Zaanlei ni a rong liam i kan in ngai a zual sin. Thaizing ni ceu mawi ah Papa a tho sal lai ti ruahsan awk kan nei nawn lo. Ni a tlak zawngah kan lunglen le kan cihei a liam ve hmang lai kan ti nan a thar in a suak sal lengmang. Zuunngeihtuar hi nganfak lak ah a fak bik mi asi hrimhrim ko lai. Zeibantuk sibawi hmanh nih an dam ter kho lai ka zum lo. 

Papa, na fa le tlawngkai na thlah le na don hni tla na ron ngai ve maw? Na fa le nih tlawnginn kotka in an in hngak theu nan nang cu tian ni na nei nawn lo. An mah ten uai hninghniangten an zaal rit pi thawn tlawng an tum theu. An hawi le cu an pa le nih an don hni i lungawi ten tlawng an tum theu nan na fa hniang le cu Pa ti kawh awk hmanh an nei nawn lo. A thawt ah, asiat ah vuihram lo ten kan innsungkhar tirawl thaw ten kan dum theu nak cabuai le tokham khal nih an in hlam nan nang cu kir zai na rel nawn hrimhrim lo mu. Kan thil kan ri an siat an rawk ah na rak remh theu hni lio ah khan vuleicungah nangmah na thiam bik kan rak in ti theu tla kha na ron cing hrih ko lai ka ti. Na fa le kan damlo caan ah it lo sing lo in nan kan bul theu. Nan kan thlop theu. Si-ai cawk ah ruahsur lak le nilin lak ah na ke in an kal theu. Sizung ah nan kan pawk nan kan cawi theu. Na fa le kan damnak ding asi ahcun na thawh a rit dah kel lo. Na ihhmuhthu dah kel lo. 

Papa, kan zaanmang i nan kan len caan ah khin thangh taak hmanh kan in siang theu lo. Kan zaanmang peh kan von duh tuk theu nan mu…papa peh awk a tha nawn lo. Na thlanem tang i tlanlen kha nuam kan ti tuk hringhran i kan khop manh hrimhrim lo ee.  Kan in ngai tuk cang. Kan in hlam lengmang nan nang cu na thei nawn lo. Nang hmuah mu vancungram ah nuamten Jesuh thawn nan lengkhat cang. Tonlai kan i caang tuk. 

Papa na dam lio ah hawi bang in kan duhherh mi nan kan zalh kho theh lo nan kan vui in kan hram dah lo. Na ti kho tawk, na si kho tawk le na thazaang nih a tlinh tawk nilin khua al ti lo in a suk a so na kal, tangka hlawh ah Mizoram le Thailand ram tiang na rak kal. Papa na fa le cathiam kan si na kan duhsak tuk ruangah na dangrawl phorh in tlawng nan kan kai ter nan mu nang bel kan zar hmanh na to manh lo. Kan lung a zuur tuk hringhran. Kan lungsia na herh tuk e. Na duhsaknak awkam kan hnathlam ah a thar in a cuang sal lengmang.

Papa, ka fa le nan cuzaa cang nupi pasal tla nei uh la tu le fa tla pomcawi ka duh cang nan kan ti i na fapa nih nupi tla a hon thit. Papa, na fapa nih naute tla an neih sak cang. Na ron hmu ve maw? Tu le fa pomcawi lai nai caang tuk nan mu a hmel te hmanh na hmu manh nawn lo. Papa, kan mah nih maw kan in siaherh deuh hmang nangmah nih simaw nan kan siaherh deuh hmang. Kan lung a kuai. Kan ci a hei. Kan van a sang ko e. Zeitik tel ah kan mitthli hul lai maw. Na kong ruat lo ten kan um lai kan ti ah kan ruat nak sinfa ah a cang. Na kong kan in ruat deuh deuh, kan mang ah kan in hmuh deuhdeuh. Kan um a har in kan li a leng deuhdeuh. Vuleicung ah hin cun e hnangamnak a um hrimhrim lo e. Vancungram in thlacamnak thawn kan bawm ringring mu! Kan in ngai. Sunzaan cat lo bang lo in hnisiamsi ten ron kan zoh ringring ko mu. We Love You Papa!