Ka fapa Daniel (2.3 y/o) nih tampi in zirh. Ahleice in Pathian ih in duhdawt zia le in ngeihven ringring zia pawl a tak in nitin in tep ter ringring. Culawnghmanh silo in nauhak vek in thinlung thiang nei a tthat zia pawl tla in zirh asi.
Daniel zing a tho pek ah siseh, sun a it nak ihsin a tho tikah siseh “Mom” tin in hlam/ko ringring ttheu mi cu tuizarh sung cu “Dad” a ti ringring thlang. A kiang ah 24/7 ka um ih ka zohkhenh mi a zin le ek ka fingkhawi sak ih tihal rilrawng ih um lo ding in tirawl ka pek ih a umhar pang hlah seh tin ka lekpi ringring mi rori nih a kiang ih ummi keimah in hlam lo in a kiang ih um lo mi apa a hlam tikah ka feeling malte a out. A mitpar zet vek in ka hmu. Ka thinheng cu silo. Ka riahsia khal asi cuang lo. Apa a hlam ding cu ka duh zet mi asi ko. Apa nih a duhdawt zia le a ngai zia pawl tla ka sim ringring mi asi ko. “Papa nih a lo duhdawt vek in na duhdawt ve ding maw, papa cu ttihzah ding, upat ding le a thusim ngai ding sokhaw asi” tin ka zirh ringring mi asi ko. Apa hnen khal ah a fapa nih a ngai zia le a hlam dan pawl ka sim ringring ttheu. Cutin zo ih fial ttul lo in an pafa karlak ah pehtlaitu hnattuan keimah ten ka pek awk. Apa cu nitinten dawr ah hnattuan mi asi tikah a falepawl in anmah a duhdawt hai zia pawl an hna sungah lut ter ding cu keimai hnattuan vek ah ka ruat awk. A caancaan ahcun apa hnattuannak dawr ah tla bazar kai phah in ka fehpi hai ttheu. Ka falepawl in keimah in duhdawt, tlaihsan, upat vek in apa par khal ah thleidannak nei lo ten an duhdawt, tlaihsan, upat ve ding ka duhsak hai. Apa nih a lekpi hai ih an hni ciamco tivek caan ah anmah hnak in keimah ka rak lungawi sawn. Nuam zet ih an lek tlang lai caan pawl cu movie tthattha Korea Drama, Hollywood, le Bollywood pawl hnak in duh an nung sawn ih zoh an nuam sawn.
Kannih Pathian zumtu pawl tla kan nuam kan har lai caan ih kan hlam/ko ttheu mi Pathian hlam/ko nawn lo in midang sawn kan va hlam/ko tikah Pathian feeling a out ve ding. Tuihlan liangluang thluasuah malza thawn in kilhim ih kan ttul mi ziangtinkim in pe ringring tu Pathian hnak in milai rinsantu sihlah uhsi! Kan harsat caan lawngah thlacamtu silo in kan nuam caan khal ah lungawi thu sim in thlacam ringring uhsi!
Jesuh in “nauhak vek si uh” tiah in fial mi tla a thar in ka fapa nih in zirh asi. Nauhak cun, “hitin ka ttong len ka nu a riahsia ding” tivek an ruat ban lo. Thaisun ziangmi rawl ka ei ding ti khal in an donhar dah lo. Ngaidam dil an duh lo zet mi khal kan fial ahcun paih lo cing ten ngaidam an dil thei. Kannih upa pawl cu “hitin ka ttong len mi thin ka heng ter pang pei maw, thaisun ziangso kan ei ding, tivek ah kan buai kual ringring nak ah nitin thinhar in kan um. Culawng hmanh silo in thil kan ti palh ruangah ngaidam dil a ttul rori mi khal dil duh lo in kan um hrim ttheu. Mathai 18:3 sungah “Fiangtein ka lo sim: nan thinlung nan thleng ih hi nauhakte bangtuk nan si lo ahcun vancung Uknak sungah nan lut dah lo ding.”
Daniel vek fapa duhnung zet Pathian thluasuah ka dong ve cu ka phu lo mi laksawng Ro sunglawi asi. Ka hrangah zirhtu ttha si ringring in ka rualpi ttha si ringring keici. Pathian in lei thluasuah van thluasuah lo pek hram ko seh!
No comments:
Post a Comment