Tuisun Mino Thaisun Hruaitu - Joseph Bawi Thawng Lian

Hruaitu kan ti tikah ziangvek lam hruaitu a um thei ti si le innsungsaang hruaitu, khua le ram hruaitu, church hruaitu si lo le miphun hruaitu ti in a phunphun a um thei. “Tuini mino Thaisun Hruaitu” ding nih cun ziangvek lungput, ziangvek lungthin, ziangvek nuncan ziaza nei a t’ul ti sile ‘zo si ka si?’ ti theiawk ding, t’uanvo lak ngam tu si ding (mipi pawl hnen ah), duhdawtnak nei ding, zaangfahnak nei ding, thleidannak nei lo ding, tangdor nun nei ding, zaangfah ngaithiam nak nei ding, diktak ih thil tuahtu (thu rel ngam tu) cu pawl cu hruaitu t’ha pakhat ih a nei t’ul mi pawl an si.

Tuini mino thaisun hruaitu nih a theih t’ul mi hmaisa bik cu amah leh mah “zo si ka si” ti theiawk a t’ul. Hruaitu tampi cu keimah hi zo ka si ti theiawk lo in mipi hmai ah duh poh in tlanlen kan hmang. Taht’himnak ah zo kip deuh nih kan upat t’ihzah mi church hruaitu pastor nih a hruaimi mipi pawl hmai ah zo si ka si ti thei awk lo in duh poh in nung seh la a mipi pawl ih mithmuh ah cun santlai lo hruaitu (pastor) ti ah hmuh a si ding. Curuangah hruaitu nih cun nitin a nun ah kei hi zo ka si ti theiawk ringring a t’ul. Cun hruaitu t’ha nih cun a mipi pawl ziang an cang, an tuar caan khalah “t’uanvo” lak ngam tu si a t’ul. October 4, 1991 thlanglei Africa ram tipi tlun ah lawngpi pakhat cu thlisia le tisuar in a hnuai ciamco cu tikah lawngpi mawngtu pawl cun lawng totu pawl an tlansan t’heh. Sim duhmi cu hruaitu t’ha nih cun a mipi pawl ziang an can, harnak an tuar khal le t’uanvo a lak ngam. Cun hruaitu t’ha nih cu a mipi pawl parah duhdawtnak lungthin thawn kaihhruai a t’ul. Korin sungah khal kan hmu thei duhdawtnak i a thupit zia. Hruaitu t’ha nih a mipi pawl duhdawtnak in a kaihruai thei a si ahcun amah tla mipi pawl i duhdawtnak a co ve ding. Hruaitu t’ha pakhat nih cun a mipi pawl ziang harnak an tong tikah zaangfahnak a nei. Hruaitu t’ha pakhat nih cun a mipi pawl par ah thleidannak a nei lo a t’ul. Hruaitu pakhat nih thleidannak a neih a si ahcun mipi karlak ah remawklonak, huatawknak pawl a suahpi thei. Curuangah hruaitu t’ha nih cun thleidannak a nei lo ding a thupi nasa. Mipi pawl parah tangdor loin namneh lungthin a neih a si ahcun upat tlak hruaitu t’ha a si thei lo ding. Curuangah hruaitu t’ha nih cun tangdor nak lungthin a neih a t’ul. Hruaitu t’ha pakhat nih cun dik tak ih thurelngam tu si khal a t’ul. A mipi pawl nih t’hatlonak an tuah tikah diktak ih an thu relngam simngam tu si a t’ul. Curuangah hruaitu t’ha nih cun diktak in thu rel ngam tu si a t’ul. Kan Cathianghlim sungah zoht’himtlak hruaitu t’ha pakhat kan hmu thei mi cu Joseph a si. Hruaitu t’ha a rak cannak cu a nauhak lai i sin Pathian a t’ihzah, nu le pa thusim ngaitu khal a si fawn. Amah leh mah zo si ka si ti a nitin nun ah a theiawk ringring. T’uanvo lakngamtu khal a si, a mipi parah duhdawtnak a nei, zaangfahna a nei, thleidannak a nei lo, tangdor nun a nei, diktak in thu a relngam. Curuangah zoht’himtlak hruaitu t’ha ah a cang.

Curuangah mino cu kanmawi lai, kan cah lai, kan fim lai caan a si. Hruaitu kan si lai caan a si ruangah nitin kan nunnak ah Joseph bang in zo ka si ti theiawk ding, duhdawtnak nei ding, tangdor nun nei ding, thleidannak kan nei lo ding a thupi. Curuangah “Tuisun mino thaisun hruaitu” ding nih a ni tin nun ah duhdawtnak, zaangfahnak, thleidannak nei lo, tangdor nun in a nun a si ahcun zoht’him tlak hruaitu t’ha mino a si ding.

Hminsin: Salai Joseph Bawi Thawng Lian hi Pu Bawi Pian fapa a si ih Falam ah um mi an si. Ramthlo hrin tonkhawmnak April 15-20, 2015 ih cangan zuamnak ah pathumnak a ngah tu a si.