Vawleicung ah mino timi hi a thu pi tuk. Khua pakhat le
ram pakhat a thanso nak cu a sung um mino pawl in tah a si. Tuisun ah mino te a
si ko kan ti hmanh ah thaisun ah cun hruaitu ding a si. Mino nih lung rual te
in hruai mi ram cu a nuam i a thangso mi ram a hung si te. Curuangah tuisun ah
mino pawl hi thaisun ah hin hruaitu ding kan si.
Khua pakhat le ram pakhat nih a tul bik mi cu hruai tu tha
hi a si. Hruai tu cu tlak bel tuah tu ban tuk a si ii zul tu cu tlak bel bantuk
kan si. Bel tuah tu nih dawh te in a tuah ah cun tuah mi bel khal ai dawh. Cu
bantuk in kan nih mino pawl khal hi tlak bel bantuk kan si ii an kan hruai tu
dung a zul lengmang mi kan si. Hruai tu a that lo ahcun a hruai mi mipi pawl
khal lam hman lo ah an pial theu. Curuangah hruaitu khal hi dai thlan ding a si
lo. Zul tu khal nih hmaisa an kan hruaitu ih tlaksamnak kha i zoh ii cu hnak in
tha deuh in hruai kho ii zuam ding. Mino poh poh hi hruaitu tha an si kho lo.
Pathian tih zah lo mi nih kan ram an kan hruai ah cun kan ram cu ruahsannak nei
lo mi ram a si kho. Asinan Pathian a tih zah mi le vision tha tha a nei mi mino
nih an kan hruai ah cun kan ram cu a thangso tengteng. Hruai mi mipi pawl lam
kip in an than so kho nak ding ah mai ca-ah si lo in ram ca-ah ti in lung tak
le tha tho te in a tuan kho ding mi hruaitu tha kan ram nih a tul. Mino nih
tuisun le thaisun lak kar caan te ah a nunnak ai thlen a si le hruaitu khal a
si kho bantuk in tang ah a tum mi mino khal a si kho. Mino an vai vuan lo nak
dingah Pathian tihzah mi hruaitu khal a tul ve. Kan khua le kan ram caah mino
hi mei far bang in a tleu ding kan si. Kan mino pawl lam hman lo ah an pial i
zu le sa thawn an i ciah ah cun kan ram cu ni khat hnu ni khat thangso lo in a
tum suk lai. Kan ram sung um mino pawl an so sulh ahcun thaisun caah tih nungza
thil a si. Tuisun hruaitu nih teh thaisun hruaitu caah zei tluk in seh lam on
saknak le timhlamhnak a neih, thaisun hruaitu ding nih teh zei tluk in seh ral
rin nak a neih i ai timh lamh cia timi hi a thupi tuk.
Mino hi thingkung note bantuk kan si i hruaitu pawl nih
an kan remh dan in kan thang. Tha ten an kan hruai si le kan tha ve ii lam hmaan
lo ah an kan hruai si le kan hmaan ve lo. Caw pawl hruai tu caw a that si le a
dung um mi caw pawl khal an paw khawp ii an hna ngam. Hruaitu lawng si lo in a
hruai mi mipi pawl khal zawn lun nak thinlung kan neih cio a hau. Mino um lo
nak ram cu a ro a car i an tha tho kho lo. Mino pawl khal nih zawnlung te in
kan um a si le mit hmai tha kan ngah lawng si lo in Pathian thlasuahnak khal
kan hmu lai.
Mino pawl nih kan no lio ah fimnak hi kan hawl cio a hau.
Phun hra ong le ong lo ih hruai daan khal ai bang thiam lo. Fimnak cu lungvar
hnak in a man a sang deuh i zei hmanh thawn tah thim kho a si lo ruangah mino
nih fimnak kan tul tuk. Thusimtu 12:1 sung ah “Mino na no lai ah a lo semsuah
tu thei aw” ti a um ruangah mino pawl nih caan a tlaih hlan ah kan biak mi kan
Pathian hi thinlung tak in zumh a hau. Kan umtlan kan ziaza, kan hmurka kan thu
sim, dawtnak le zumhnak lam ah mino pawl cu zumtu dang ih zoh thim tlak in um
ding. An kan hruaitu hi kan mah hnak in a hngak sia khal le nau tat lo ding.
Mino pawl lungrual te in rian kan tuan khat ahcun kan ram
cu thangso lo in a um lo lai. Cutin mino pawl rian kan tuan khat si ahcun neh
nak hi kan co lai. Tuisun ah mino te kan si hmanh ah thaisun ah cun hruaitu
ding kan si ruangah mino pawl nih hruai tu tha si ding in kan i zuam cio lai. Mino
pawl nih tha tho tein kan tuan khat si ah cun zei poh kan awngmin tengteng.
Curuang ah tuisun mino pawl nih hi kan catlang hi lungrual te in kimh kho kan i
zuam lai. Mi tang ah si loin mi cung um mi mino si kan i zuam lai. Hruaitu tha
hi a tul tuk i mino nih si kho ding in i zuam ding. Forhfial nak an kan neih
sak mi khal i nau tat lo ding. A tu caan kan neih lio ah hruaitu tha si ding in
i zuam ding a si. Zei poh ah zoh thim tlak in nun i zuam ding. Curuang ah
tuisun mino hi thaisun hruaitu kan si ruang ah daithlan lo ding. Dung sip lo in
hmai norh sin ding kan si. Mino pawl thasia lo ding.
Hminsin: Mai Thian Len Sung hi Pastor Piang
Bik le Sayamah Rem Za Mawi fanu a si. Aveihnihnak Ramthlo Hrin Tonkhawmnak April 15-20 ih tuah mi cangan zuamnak ah pahnihnak a ngah tu a si.
No comments:
Post a Comment