Leilungtlun kan dam
sungah a sunglawi bik mi nihnih an um. Cui nihnih cu ziang an si ti cu kan
umnak hmun le kan sinak ciar in an bang awk lo ding. Mi hrek cun kan suah ni le
kan thih ni an ti men ding nan mi hrekkhat lala cun innsaang thar kan dinh ni
le fatir kan neih ni an ti men ding. Kei cun kan suah ni le ziangruangah kan
suak ti kan theih awk ni hi a si ding tin ka ruat. Kan suah ni ah kan nu le pa
lawng si lo in sungkhat unau, khuapi le kohran pi pawl zaten an lungawi ih
hnisiamsi ten an um. A pahnih nak cu kanmah le kanmah kan tthanglian deuhdeuh,
thu kan ruat thei deuhdeuh, kan mah ten kan kepar ah kan hong ding thei zik
zuakzo hrawng caan ih leilungtlun minung billion 7 lenglo lakah pakhat kan rak
si ve nak a sullam, Pathian ih in sersiam hnawhsannak kan theih ni khi a si.
Cui ni ah zo pawl an lungawi ti silen kanmah kha a lungawi tu bik kan si. Ziang
ruangah tilen sersiamtu ih in sersiam hnawhsannak kan theih hnu cu a duhnak
thlun ding le a zirh mi pawl ngai ding lawng kan hnattuan a si zia kan theih
ruangah a si. Pathian cu duhdawtnak a si tin Bible sungah kan hmu (1 John 4:8).
Duhdawtnak a si mi Pathian cu mi duhdawtu a si ih a zirh mi khal duhdawtnak a
si ve.
Thutlangpi ih ka tar mi
hi LGBT (Lesbian, Gay, Bi-gender, Transgender). Lesbian cu nunau in nunau a duh
tu a si. Gay cu mipa in mipa a duh tu a si. Bi-gender cu nunau khal mipa khal
bangrep ten a duh tu a si ih Transgender cu nunau in mipa si a duh ruangah a
zahmawh a thleng awk mi le mipa in nunau si a duh ruangah a thilri a thleng ve
mi a si. Tulai media kan zoh a silen hi pawl ih thuhla hi siar cawk le zoh cawk
an si lo. Mitampi cun (keimah tel in) siar cuca lo in an zuk lawng zoh ih hnar
merh zuihzo tu men fang kan si. An sinak diktak, an dinpi mi diktak, an aupi mi
diktak, an duh nak a theih sak tu ngaingai hi zo an si ding? Media ih kan hmuh
dan vek a si ahcun American cozah pi a si ding ih a pahnih nak ah Facebook an
si ding. A pathum nak ah human rights activists pawl an si ding. Hi pawl thuhla
ih kan buai rualrual in kan biaknak, kan zirnak le kan theih nak hmuahhmuah in
linglet thluh tumtu seihtanpa ih bumnak ah kan lung a mit ve lo ding cu kan mah
hnattuan a si. Fimkhur zet le ralring zet ih kan um a ttul.
An minung ka hua hai lo
nan an thil tuah mi le an tuah dan cu ka ngeih lo nak a tampi. “We are created
equal” ti cu American rampi nih an aupi mi le an nunpi mi a si ko nan Khrihfa
tampi nih cun a thok ten Pathian in a minung pawl karhzai ter ding in nunau le
mipa cu pumkhat si dingah in tuah mi kan si ti cu hnget zet in kan pom mi a si
lala. Atu’i a lingsa zet mi nu le nu, pa le pa nei awk thei nak dan an suah mi
hi ziangruangah kan buai cio si pei? Pitar putar fa nei thei nawn lo pahnih an
nei awk ah zo hmanh in kan buai pi hai lo. Nu pa si cing ih fa nei thei lo tei
innsaang khal kan buai pi dah lo. Asilen, ziangruangah so fa an nei thei lo
ding ti kan theih mi nu le nu, pa le pa neih awk sian nak dan an suah tikah kan
buai celcel? Fa nei thei lo cio cio. Mipum karh zai ter thei lo ding cio cio.
An bang awk lo maw si? Nu le pa nei awk cing ih fa nei duh lo pawl cu mawhthluk
an tong dah lo nan a tui kan unau LGBT pawl hin mawhthluknak an ton hi a nep lo
nasa. Bible ca vek in zoh ahcun an ton ding a si hrimhrim ko. An nunnak tiang
hmanh in lak sak tlak an si ko. 21st kumzabi ahcun laimi pawl cu
tleunak ngah zo tu le Pathian thei/zum tu kan si ruangah kan Bible thawn a kalh
awk mi kan do le kan hua cu kan hnattuan a rak si hrimhrim ko. Asinan, a minung
hua lo in an thil tuah mi kan huat thiam ih an mah thawn hna kan ttuan tlang
thei ding cu a rak thupi ve zet lala. Duhdawtnak Pathian a si mi ih in zirh mi
duhdawtnak thawn kan cohlang hai ih mawh kan phurh hai ciamco lo ding cu a
thupi zet. An thil tuah mi cu a sual silen an mah le Pathian caih awk hai leh
ko seh!
Tuini ah zumtu pawl
tampi ih kan buai bik mi hi Pathian in minung pawl karhzai dingah sersiam mi
kan si ti kan zumh nak pakhat ruang bik ah a si lo maw LGBT pawl kan mitkem ih
kan huat nak bik cu a si? Tuisan ahcun sperm bank timi fa ci khon nak a um zo. Cui
hmun ah fa tuah thei a si zo. Paisa tampi a cem ko nan fa duh taktak tu hrangah
cun a manhla zet ko. Sihmanhsehla mizapi zaaraan hrangah cun ti thei ding ci a
rak si lo. LGBT community pawl hi phundang deuh in zoh sak uh sila kan kaphnih
hrangah ttha sawn men ding tin ka ruat. Mitampi cu laar duh ruangah le mi
thucawng in himi community an thleng tla si men ding nan himi movement a rak
thok tu ngaingai pawl cu an mai pianpi thilri ah lungkim lo (duh awk lo) in an
mah vek an duh ruangah le an neih lo mi neih an rak duh ruang bik ah a si ko.
Hi pawl cun an mah nih fa an nei thei lo ruangah ram farah nak ih hngakttah
pawl, USA ram sung ih cawmtu nei lo nauhak pawl tla an mah fa vek in an cawm
hai ih an fa an si ter. Hivek in Pathian khal zum thotho, farah le cawmtu nei
lo nauhak khal mah fa vek ih cawm thotho tu nu le nu, pa le pa nupa vek cu
soisel ding ka hmu ciamco hai lo. Sihmanhsehla mai sinak ah lungkim lo, mi hur
le laar duh men ruang ih LGBT community ih a tel tu le a ttanh ciamco tu pawl
bel te cu mitkemzaa an si ka ti. Leilungtlun minung hmuahhmuah in nuihrin covo
bangraan ten kan nei thluh nan kan co thluh lo. Atu ih USA Supreme Court pi nih
tuihlan liangluang ih an moral law si lo len religious law cu civil law ah an
can ter a si cu. American cozah pi in kumkhua hrang ih an neih mi thuthentu
pakua sung in panga pawl ih lungkimnak ruangah hivek in leilung pumpi an hnin a
si.
Leilung pumpi nih kan
zohtthim hai ih an hnen ihsin kan zir rero lai mi democracy ih a suahpi mi thil
hmuahhmuah hi ziangtinso tui hlan vek in sangpi ah kan ret thei hai ding ih kan
zohtthimh hai thei nawn ding tin thusutnak tampi a suak thei. Thlarau lam in
zoh ahcun Sodom le Gomorrah dung an thlun zo tin kan hmu hai ko ding. Sihmanhsehla
political standpoint in kan zoh lala a si ahcun society nih a hnong mi pawl, nu
le pa tampi nih an mai hrin cia LGBT fa le an hnon mi pawl, suahpi unau pawl ih
unau ih pom duh lo mi le zahpi mi pawl hrangah cun a tu vek ih a cozah pi in
zalennak saangka a on hai cu an hrangah vanram kai zo vekah an ruat awk ding.
Nang le kei zoso kan si ih kan mai kan minung pi Pathian ih sersiam ve mi LGBT
pawl kutzung khih ngam ding in? Pathian ih in zirh mi kha duhdawtnak a si lo
maw? An minung cu duhdawt uh sila an thiltuah mi bel te cu kan huat khal len
kan mawh lo kan ti pei. Duhdawtnak a tam phot a si ahcun tui kan hmuh mi mitkem
za le duhnung lo za pawl khal kan pomsak thei leh ko ding. Suak pek ih mipa sinan
nunau thinlung nei, nunau si nan mipa thinlung nei kan rual pi pawl ih nitin an
rak ton mi hmuhsuamnak le nautatnak pawl ruat sak phah in duhdawtnak thawn
pakhat le pakhat zawnruat awk uh si tin ka lo sawm hai duh a si. Netabik ah
LGBT a ttanh tu na si khal ah siseh, a do tu na si khal ah siseh pakhat le
pakhat kan duh dan le kan duh zawng an bang awk lo a si timi hi kan theih
hniglh lo dingah a thupi zet a si. Cutin pakhat le pakhat kan bang awk lo nak
theih sak awk uh si la kan mah le kan sinak te ah lungawi thei tu kan si thei
ringring nak ding sawn ah zuam uh si.
No comments:
Post a Comment